Yeremia 21
21
Ohuyiingirwa hwa Yerusalemu hulaangirirwa
1Yino niyo Emboosi y'Omwaami yi Yeremia yanyoola, lu Sedekia omutuki wa Buyudaaya, yatumira Pasihuuri omwaana wa Malikia neende omulaamisi Sefania, omwaana wa Maseya, n'aboola ati: 2#2 Abat 25:1-11; 2 Biha 36:17-21. “Huhusaba, ewe tulomalomereho eyiri Omwaami, olwohuba Nebukadineesa, omutuki wa Bbabbilooni ali ohutuseeta atulwaanie. Naluundi Omwaami anaatuholere esy'amayia, mani Nebukadineesa yaatutulaho.”
3Yeremia yababoolera ati: 4Boolera Sedekia oti, Omwaami, Nasaae wa Yisiraeli aboola ati: “Bona, njia ohubatusaho ebilwaaniso b'eye bi muli ohwehoonyera ohulwaania omutuki wa Bbabbilooni, neende ohulwaania Abakalidaaya abali ohubaseeta erwaanyi w'olukaka lw'esiko. Njia ohubuusa alala ebilwaaniso byeeng'we akatikaati w'esiko sino. 5Ese mweene, njia ohubalwaania neende amaani kaange koosi, mu tima lyaange, neende mu bwaalaba bwaange buungi.” 6Mani njia ohwiita abaandu bali mu siko sino; abaandu alala neende ebisolo; bachia ohufwa oluumbe lubi muno. 7Omwaami aboola ati: “Luunyuma njia ohuleha Sedekia omutuki wa Buyudaaya, neende abahalaabani bae, neende abaandu bali mu siko sino, abo abahawone oluumbe olwo, olugaanga, neende enjala, bahawaambwe neende Nebukadineesa, omutuki wa Bbabbilooni, neende abasuku baabwe badaha ohubeeta. Nebukadineesa achia ohubeeta neende olugaanga, ataali ohukwiira esisa syoosi, oba ohulehaho omuundu yeesi.”
8Omwaami yamboolera ati: “Boolera abaandu bano oti: Bone mbao nda, mu moni weeng'we engira yichia mu bulamu neende yichia mu hufwa. 9Oyo yeesi odoong'a mu siko sino achia ohufwiira mu biita, oba achia ohufwa enjala, oba endwaae. Nae oyo yeesi onaasitulemo, yeyaanayo eyiri Abakalidaaya babaseetere, achia ohuwona, mani obulamu bwae nibwo bwaaba naakulire. 10Omwaami aboola ati, ‘Maliriire ohutakwiira esisa esiko sino, hulw'ebyonoono byaabwe haandi sibula obuhoonyi. Mani sichia ohudiiswa mu mahono k'omutuki wa Bbabbilooni, mani achia ohusisaamba omuliro.’”
Ohuheengera omusaango abomu nyuumba y'obutuki bwa Buyudaaya
11Omwaami yamboolera ati mboolere abomu nyuumba y'obutuki bwomu Buyudaaya endi: “Wulire Emboosi y'Omwaami. 12Eng'we abomu nyuumba ya Daudi! Omwaami aboola ati:
Heengeenge emisaango mubwadyeeri buli ludaalo.
Kayirireenge abo babafwiinyirira,
neende abo ba bayaayaho ebiindu byaabwe.
Ataali ao, obwaalaba bwaange buchia ohwaaduha koti omuliro,
bubasaambe mani abuleo onyala ohubusimya.
Olwohuba ebiholwa byeeng'we bibi.”
13“Bone, ndi ohubalwaania, Eng'we abamenya mu hooho,
Ewe olwaanda lwomu sipaapi,
Omwaami niye oboola.
Nae oteeba oti, Wiina oneeche ohutulwaania,
oba oneengire mu bumenyo bweefwe?
14Njia ohubasaandya ohweema hu biindu bi mwahola,
Omwaami niye oboola.
Njia ohuyaambia omuliro hu sichaha syao,
mani kusihirise buli siindu si hweebodoohaanie.”
Currently Selected:
Yeremia 21: SAMIA
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2019
©Bible Society of Uganda, 2019
