Yeremia 20
20
Ohubitabitana hwa Yeremia neende Pasihuuri Omulaamisi
1Ao mani omulaamisi Pasihuuri, omwaana wa Yimeri, owali omuhunuufu ohulira enyuumba y'Omwaami, yawulira Yeremia n'alaanga ebiindu bino. 2Pasihuuri yahuya Yeremia omunabbi, haandi yamuboyera eminyororo aambi neende esiruwa sy'emukulu sy'enyuumba y'Omwaami silaangwa siti, Esiruwa sya Bbenjamini. 3Nibwahya, Pasihuuri niyaboolola Yeremia ohutula mu jeela, Yeremia yamuboolera ati: “Omwaami haba sasilaanga eliita lyao ati, Pasihuuri, nae ahulaanga ati, ‘Otiisa Buli Abuundu.’ 4Olwohuba Omwaami aboola ati: Bona, njia ohuhuhola esitiisa, eyiri ewe mweene neende eyiri abeecha bao boosi. Mani ochia ohubona abasuku baabwe nibabeeta boosi neende olugaanga. Mani njia ohudiisa abaandu bomu Buyudaaya boosi mu mahono k'omutuki wa Bbabbilooni. Achia ohuyira abaandi mu jeela mu Bbabbilooni, nae abaandi bachia ohwiitirwa olugaanga. 5Mani haandi njia ohuberesa abasuku baabwe, obuyiinda bwomu siko sino bwoosi, eby'engaanga byasyo byoosi, ebiindu biri neende obuhoonyi byasyo byoosi, neende eby'obuyiinda by'abatuki bomu Buyudaaya byoosi. Abasuku beeng'we bachia ohubiyaaya byoosi, mani babibukule, babiyire Bbabbilooni. 6Mani ewe, Pasihuuri, neende abomu nyuumba yao boosi, muchia ohudiirwa mani muyirwe mu jeela Bbabbilooni. Mani eyo niyo yiwahafwiire, haandi niyo yibahahusiihe, ewe neende abeecha bao boosi, abo nibalaangiraanga eby'obubacha.”
Yeremia yekanyiirisira Omwaami
7Ewe Omwaami, hane waambacha,
mani nifukiirira ohubachirisa hwao;
Ewe wuuhire amaani,
haandi omalire ohuunyiingira.
Ndeholere esyohuchehwa buli siha;
buli muundu yandyaabuhira.
8Olwohuba buli lu nomanoma, ndira mani
huumula nimboola endi: “Egiili neende Ohusihirisa!”
Olwohuba Emboosi y'Omwaami yikera
nibaanyeka haandi nibaanjeha buli siha.
9Nae nimboola endi: “Haba siinjia humulomalomaho,
oba ndalomaloma haandi mu liita lyae,”
emboosi yae yiba koti omuliro kwaaduha mu mwooyo kwaange,
okusaamba mu makuumba kaange.
Ndeemaho ohwesimiirisa,
nae haba siinyala ohuhaya ohuyilomaloma daawe.
10Olwohuba mbulira abaandu baangi nibeemoonya bati:
“Buli abuundu wichuuseo ebitiisa!
Mumweekaane! Lehe humweekaane!”
Kata abeecha baange beene,
baliindirira ohubona koti luungwa.
Nibo ababoola bati:
“Lehe humuseendeseende,
mani humudiire,
mani hwetuunge.”
11Nae Omwaami ali hu lwaande lwaange koti omulwaani w'amaani;
mani sakira, abaanyiingania nibo abachia ohunyiingirwa,
haba sibachia hunyiingira daawe.
Esoni chichia ohubadiira muno,
olwohuba haba sibachia hunyiingira daawe.
Bahadiirwe esoni endaalo choosi
mani haba sibaheebirire daawe.
12Ewe Omwaami w'Obunyala, oteema abaandu mu buluungifu,
ewe niiwe obona emyooyo ky'abaandu neende ebibaaso baabwe.
Mani leha mbone koti lu onetuunge hu baandu bano,
olwohuba hudiisire ebidinyu byaange.
13Mweembere Omwaami;
fumie Omwaami!
Olwohuba niye owoniisye obulamu bw'abaandu bali mu budahano
ohutula mu mahono k'abahola-mbi.
14 #
Yob 3:1-19. Leha oludaalo lu ndeebulirwaho
lubwaabwe!
Oludaalo lu maama yaanjibuliraho,
leha luhaye ohunyoola ehabi daawe!
15Leha oyo abwaabwe
owaleetera laata yaange emboosi chisaangaasa chiti: Musyaani niye! onyoolere omwaana musyaani!
16Leha omuundu oyo abe koti ebiko
bi Omwaami yasihirisa n'atabidiirira esisa daawe.
Leha awuliire amaliro mu chuli-chuli
neende embuungu chohu lwaana esideete,
17olwohuba haba siyanjita nisisiiri ohwiibulwa.
Maakoo niye owahabeere eng'ani yaange,
mani enda yae yafwiimba endaalo choosi.
18Mani lwaasiina ndeebulwa?
Ohubona engisa neende ohusaanda,
ndaafwa esoni nichindiirire?
Currently Selected:
Yeremia 20: SAMIA
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2019
©Bible Society of Uganda, 2019
