Yeremia 16
16
Bi Omwaami adahisira obulamu bwa Yeremia
1Omwaami haandi yalomaloma naange n'aboola ati: 2“Ewe Yeremia, otadeehya omuhasi, oba weebula abaana basyaani oba abaana bahaana abuundu ano.” 3Olwohuba Omwaami aboola bino ebidiira hu baana basyaani neende abaana bahaana abeebulwa mu bweyaango buno, haandi ebidiira hu beebusi baabwe bahasi neende abeebusi baabwe basaacha, abo ababeebulirwa ano. 4Bahafwe oluumbe lubi muno. Haba sibahabalire, haandi emilaambo kyaabwe haba sikyahasiihwe; emilaambo kyaabwe kyaheebuungihe kyaaba koti ebituuli by'embolera. Baheetwe neende olugaanga haandi neende enjala. Emilaambo kyaabwe kyaheehole ebyohulya by'amayoni neende ebisolo byomu siino.
5Olwohuba Omwaami aboola ati: “Oteengira mu nyuumba yi baliriramo. Otalira omuundu kata mulala, haandi engisa yitahudiiraho hulwaabwe. Olwohuba mbatusireho omuleembe ku ndali nimbereese abaandu bano, haandi mbatusireho obuheeri bwaange hutaakama neende esisa syaange.” 6Abahunuufu alala neende ababula oluyaali boombi bachia ohufwiira mu syaalo sino. Haba sibachia hubasiiha, haandi abulao ochia ohubalira. Abulao ochia ohweheenga omweene oba yeemudulaho efwiiri omweene. 7Abulao owaliireho ebyohulya alala neende omulisi yeesi, ohumulemia omwooyo nafwiiriirwe. Abulao owahamubeeho amaachi kohung'wa n'afwiiriirwe laatang'ene oba ng'ina. 8Oteengiraanga mu nyuumba yibaholeramo esidyaalo mani wehala ohulya oba ohung'wa alala nabo. 9#Yer 7:34; 25:10; Hubwi 18:23.Olwohuba Omwaami w'Obunyala, Nasaae wa Yisiraeli aboola ati: Bone, eng'we nimusisiiri abalamu, haandi nimusiibona, njia ohwaakamya mu abuundu ano amakono k'esidyaalo, neende ohweehoya hw'esangaalo, amakono k'ohudeehisania.
10Nae noboolera abaandu bano emboosi chino choosi, bachia ohuhuteeba bati, Lwasiina Omwaami alaangire ati amasira k'amaani kachia ohutukwaaho? Huholere musaango siina? Sibi siina si huholeere Omwaami Nasaae weefwe? 11Mani ewe ochia ohubaboolera oti: “Olwohuba bakuuka yeeng'we baandulaho mani bachaaka ohuhalaabanira neende ohwiinamira banasaae baandi. Bandeebwaaba haandi baahaya ohuliinda amalako kaange Omwaami niye oboola. 12Nae eng'we muholere ebyonoono bihiraho ebya bakuuka yeeng'we. Olwohuba bone, buli muundu hweeng'we, w'esyeejo, haandi aloondakana neende ebibaaso byae bibi, mani yaahaya ohuumbulira. 13Mani sakira njia ohubeerusa mutule mu syaalo sino, mbasukune mu syaalo si mutaamanyireho daawe, kata si bakuuka yeeng'we bali nibatasimanyaho daawe. Mani eyo niyo yimunahalaabanireenge banasaae baandi esiro neende esideete, haandi haba siinjia hubakwiira esisa daawe.”
Ohukobola ohutula mu bwiiruhiro
14Omwaami aboola ati: “Mani sakira, bone, ebiha bichia ohwoola, abaandu bahaye ohweechuba nibaboola bati: ‘Koti lu Omwaami ali omulamu, oyo owatusa abaandu ba Yisiraeli mu syaalo sya Misiri,’ 15nae bachia ohweechuba nibaboola bati: ‘Koti lu Omwaami ali omulamu, oyo owatusa abaandu ba Yisiraeli ohutula mu syaalo sy'emukulu neende mu byaalo byoosi bi bali nibayirirwemo.’ Olwohuba njia ohubakobosa mu syaalo syaabwe syeene, si ndaberesa bakuuka yaabwe.”
Ohusaanda huli ohwiicha
16Omwaami aboola ati: “Bone, njia ohutuma abanaabi baangi beeche banaabe abaandu bano. Haandi luunyuma, njia ohutuma abayiimi baangi, abachia ohuyiima abaandu hu buli lugulu neende hu buli sigulu, neende mu ng'uungu chomu makina. 17Olwohuba mbona buli siindu sibahola. Sibulao esyeekisa si taamanyire daawe. Haandi ebyonoono byaabwe sibinyala ohukiswa ni taabibweene daawe. 18Njia ohubatuungya amahabi kabiri olw'ebibi byaabwe neende omusaango kaabwe. Olwohuba banyaasire esyaalo syaange nibasiichusamo ebiloongaloongwe byaabwe ebiri koti emilaambo, haandi beechuuse obumenyo bwaange neende eby'omisiro byaabwe.”
Esaala ya Yeremia yohweesika Omwaami
19Ewe Omwaami, niiwe amaani kaange haandi omuliindi waange,
niiwe obwiiruhiro bwaange mu biha by'obudinyu.
Niiwe yi baandu bomu byaalo byoosi
beecha yooli nibatula mu soonda ch'esyaalo, nibaboola bati:
“Bakuuka yeefwe, banyoola eby'obubacha byoong'ene
ebitaalimo obuhoonyi haandi ebitaalimo engaanga daawe.
20Omuundu anyala ohweloongera nasaae?
Oyo haba saabanasaae kata nabudiidi.”
21“Mani sakira, bone, njia ohubeekesa bamanye, luno njia ohubeekesa bamanye amaani kaange neende obunyala bwaange. Ao niwo yibahamanyire bati eliita lyaange nilyo Omwaami.”
Currently Selected:
Yeremia 16: SAMIA
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2019
©Bible Society of Uganda, 2019
