Yeremia 14
14
Esiminyu sy'amaani
1Emboosi yi Omwaami yaboolera Yeremia eyidiira hu siminyu:
2“Buyudaaya sirira
haandi ebiko byasyo biteng'engaale.
Abaandu bamwo beehaale hu loba nibali mu ngisa,
mani amaliro ka Yerusalemu kaniina akula.
3Abahunuufu bamwo batuma abahalaabani baabwe hu mwaalo;
bachia hu sulo chaabwe,
nae baahaya ohunyoolayo amaachi,
mani baakobola esyoongo nichibulamo amaachi.
Esoni chibadiira bawaamo amaani
mani nibebwiiha mu moni.
4Olwohuba efula yibulao,
eloba lyoomereere
mani biheheere abalimi,
mani nibebwiiha hu mitwe kyaabwe.
5Kata emboongo yileha mu siino omwaana kwao ku yibuule
olwohuba obunyaasi bubulao.
6Esuhiri ndeende cheema hu bigulu bibulaho obunyaasi,
mani nichiyeera nichaasamiriire koti amabbwe;
haba sichibona bulai
olwohuba chibula esyohulya.
7“Kata ebyonoono byeefwe bituheengera omusaango,
Ewe Omwaami, tuhoonye koti lu watusuubisa.
Olwohuba huhutulireho amahabi maangi muno,
hwahola ebyonoono yooli.
8Ewe niiwe esuubi ly'abaandu bao Abaisiraeli,
niiwe obawonia mu biha by'obudinyu.
Lwasiina oli koti omuteende mu syaalo,
koti walukeenda okona oludaalo lulala lwoong'ene?
9Lwasiina oli koti omuundu wadangaala,
koti omusikaari w'amaani otanyala ohuwonia?
Mubwadyeeri bweene, Ewe Omwaami, oli akatikaati weefwe,
mani efwe huli abaandu bao;
otatujwaang'a daawe.”
10Omwaami aboola ebidiira hu baandu bano ati:
“Abaandu bano baheera ohuundulaho bati,
haandi haba sibeetuka daawe.
Mani sakira Omwaami haba saabafukiirira daawe
bulaanu achia ohwiichulisa ebyonoono byaabwe
mani abasaandye hulw'ebyonoono byaabwe.”
11Omwaami yamboolera ati: “Haba siwekongooyera abaandu bano ohuba bulai. 12Kata basiibe batye, haba siinjia ohuwulira amaliro kaabwe, neende abahayaana ebiyaanwa bisaambwa neende ebiyaanwa by'emwo, haba siinjia ohubifukiirira daawe; nae njia sa ohubasihirisa neende ebiita, haandi mbeete enjala haandi neende amalwaae.”
13Mani nimboola endi: “Aaa, Omwaami Nasaae, bona, abanabbi bababooleraanga bati, ‘Haba sibahabone ebiita, oba enjala yaabaluma, nae bomisaanga bati, omuleembe kuchia ohuba mu syaalo muno.’ ” 14Mani Omwaami niyamboolera ati: “Abanabbi bali ohulaangaanga eby'obubacha nibehoonyera eliita lyaange. Haba siimbatumaangaho, oba mbalagira, oba nomanomaho nabo daawe. Ebiindu bi balaanga yi muli, huboneherwa hw'obubacha hwoong'ene, ohutaalimo obuhoonyi, haandi bubacha buli mu bibaaso byaabwe byeene. 15Mani sakira Omwaami aboola ebidiira hu banabbi balaanga mu liita lyaange, kata ndahaba nitabatuma, haandi ababoola bati, ‘Olugaanga neende enjala haba sibyahakwe mu syaalo sino’: Olugaanga neende enjala nibyo ebyaheete abanabbi abo. 16Mani baandu babalaangira bosi bahafwe ebiita neende enjala, mani emilaambo kyaabwe kisukunwe hu ngira chomu Yerusalemu, abuleo omuundu owukisiiha daawe. Emilaambo kyaabwe, alala neende eky'abahasi baabwe, alala neende eky'abaana baabwe basyaani neende abaana baabwe bahaana. Olwohuba njia ohubetuunga omweene hulw'ebibi byaabwe. 17Omwaami mani naalagira ohuboolera abaandu ebidiira hu ngisa yaange haandi ohuboola endi: ‘Lehe emoni chaange chihulukuse amasika esiro neende esideete,
mani haye ohwaakama ohulira,
olwohuba abaandu baange bafumiitwe amahaande,
haandi banyayaalirwe bubi muno.
18Ningeendaho ndaachia mu siino,
bone, nyoolayo sa emilaambo ky'abaandu beeterwe neende olugaanga.
Nae niinyingira mu siko,
bone, nyoolayo sa abafwa enjala.
Olwohuba abanabbi alala neende abalaamisi bahweeserwe baayirwa mu syaalo
sibataamanyireho kata nabudiidi.’ ”
Abaandu beekweeda Omwaami
19Ewe Omwaami, osukuniire elalira abaandu bomu Buyudaaya?
Osyuliire elalira abaandu bomu Siyooni?
Lwasiina otufumiite otyo
mani hwaahaya ohuwona daawe?
Hwasuubira omuleembe, nae abulao esilai si hwanyoola.
Hwasuubira ohuwoniswa, nae bone, hwanyoola amatiichasi koong'ene.
20Ewe Omwaami, hufukiirira ebyonoono byeefwe,
neende ebyonoono bya bakuuka yeefwe,
olwohuba hwahola ebyonoono yooli.
21Otatuhaya daawe, hulw'oluyaali lw'eliita lyao;
haba otayaambya Yerusalemu esoni, abuundu w'obwiihalo bwao bw'oluyaali. Yichulisa mani ohaye ohuhalaka Endagaano yao naafwe.
22Baluwo mu banasaae bataali abadyeeri abomu byaalo biindi abanyala ohukwiisa efula?
Oba ekulu hu bwalyo lyoong'ene lyakwiisa olufuuchakirisi?
Ewe Omwaami, niiwe Nasaae weefwe.
Niiwe yi hweesika weeng'ene,
olwohuba niiwe ohola ebiindu bino byoosi.
Currently Selected:
Yeremia 14: SAMIA
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2019
©Bible Society of Uganda, 2019
