Yisaaya 65
65
Omwaami asaandya abajeemu
1 #
Rom 10:20. Omwaami yaboola ati: “Ndafukiirira ohukoonywa neende abo abataandeebaanga.”
Ndafukiirira ohunyoolwa neende abo abatangoonyaanga.
Esyaalo sitandekongooyaanga ndasikobolamo endi,
“Mbano ndi ano, mbano ndi ano.”
2 #
Rom 10:21. Ndakolola amahono kaange oludaalo lwoosi
eyiri abaandu bajeemu,
abaloondakana neende esaambo chitaali endai.
Bachiira hu biindu bi beene babaasiramo sa.
3Abaandu bano banyoolesa muno
kalole-ka-moni.
Bayaanira mu ndalo ebiyaanwa
haandi banioohesera hu matafaali obubbaani.
4Esiro bachia mu ng'uungu neende hu biriindwa
ohweteeba hu misaambwa ky'abaandu bafwa.
Balya enyama y'embiichi,
mani bawuuta omuunyu kw'enyama ch'emisiro.
5Baboolera abasyaabwe bati, “Mweeme eyale eyo,
mutasuda aambi naafwe, olwohuba mukabuhana naafwe.”
Abaandu koti abo haba siinyala hubeesimiirisa daawe, baamunyira olusu,
mani etima lyaange lyaaduha koti omuliro oludaalo lwoosi.
6Bone, syandiikwa hale siti:
“Haba siinjia hubuleera, nae njia ohwetuunga,
eee, njia ohwetuunga koti lu bihoyera,
7hulw'ebyonoono byaabwe alala neende ebya bakuuka yaabwe;
olwohuba banioohesera obubbaani hu ngulu
nibaanomanomera bubi hu bigulu.
Njia ohubasaandya ohuchaanakana neende
ebiindu bi bahola hale.”
8Omwaami aboola ati:
“Koti lu badoola emisabbiibbu milai
nibanyuhamo efiini nibaboola bati, ‘Mutasihirisa ekyo daawe,
olwohuba kirimo ehabi,’
nilwo nasilala syeesi lu njia ohuhola hulw'omuhalaabani waange,
mani haba siinjia hubasihirisa boosi daawe.
9Mu beechuhulu ba Yakobbo,
neende mu Buyudaaya, njia ohwedooleramo
abo abahanyoole esyaalo esy'engulu chaange esyo,
esyaalo si abahalaabani baange bahamenyemo.
10 #
Yos 7:24-26. Olwohuba abaandu baange bayiinamira,
Saroni syahehola obwayiro bw'ebyaayo,
haandi ehooho ly'Akoori lyaheehole abuundu yi byaayo biwuluuhira.
11Nae eng'we abatula hu Omwaami,
abeebirira Olugulu lwaange Lwoolerefu,
mani nimuholera emisaambwa kiberesa ehabi esidyaalo
mani nimwiichusira emisaambwa ky'ebiindu bikwaao efiini yisasaanire, yi muchuha mu bikoombe byeeng'we.
12Njia ohubateerao olugaanga,
mani mweesi muchia ohuguunama mwiitwe;
olwohuba, nindalaanga, haba simwakobolamo,
nindalomaloma, haba simwadeebayo ohuwulira,
nae mwahola ebiindu bindabakaania,
haandi nimudoolao ohuhola ebiindu bitaasangaasa.”
13Mani sakira Omwaami Nasaae aboola ati:
“Bone, abahalaabani baange bahalye,
nae eng'we mwahalumwe enjala;
bone, abahalaabani baange bahang'we,
nae eng'we mwahalumwe obuluwo;
bone, abahalaabani baange baheehoye,
nae eng'we, esoni chahabadiire.”
14Bone, abahalaabani baange baheembe hulw'esangaalo,
nae eng'we mwahalire hulw'engisa,
nimuchwiila olw'obuchuuni.
15Abalobole baange bachia ohwehoonyeraanga eliita lyaange nibabwaabwa,
mani Omwaami Nasaae achia ohubeeta;
nae abahalaabani bae, abo abahola by'adaha, achia ohubakuliha eliita yaaha.
16Mani onasabeenge ehabi mu syaalo
anayisabeenge Ese, Nasaae wadyeeri.
Haandi oyo onechubeenge mu syaalo
anechubireenge Ese, Nasaae wadyeeri.
Olwohuba ebidinyu byaahale byeebirirwa
haandi siinjia hubideebaho daawe.
Esiloonge siyaaha
17 #
Yis 66:22; 2 Pet 3:13; Hubwi 21:1. Omwaami aboola ati, “Bone, ndi ohuloonga ekulu yaaha
neende esyaalo siyaaha.
Mani ebiindu byaahale haba sibyaheechuliswe
kata sa ohubaaswaho.
18Nae musangaale haandi mwehoye endaalo choosi
mu esyo si ndi ohuloonga;
olwohuba bone, Yerusalemu si noonga syahabe esy'ohusangaaliramo,
haandi abaandu baamwo bahabe abasangaafu.
19 #
Hubwi 21:4. Ndahasaangaalire mu Yerusalemu,
mani ndeehoyera mu baandu baange.
Haba siyahabeeo ohulira amasika
neende ohuubba embuungu hulw'engisa.
20Haba simwahabeemo haandi
omwaana olifwa n'asisiiri omudoto.
Abaandu boosi bahayidireenge emyaaka kyaabwe kyoosi.
Abaliyiindira ohumala emyaaka emia ndala, bahalaangweenge abaana bayere.
Haandi ohufwa n'osisiiri ohwoosa emyaaka emia ndala, hahabe ahalolero h'ohulaamwa.
21Abaandu bahoombahe enyuumba mani nibachimenyamo.
Balitaaka endalo ch'emisabbiibbu, mani nibalya ebyaamo byacho.
22Enyuumba chibalyoombaha, haba sichahamenywemo abaandu baandi daawe;
haandi bi bahataake, abaandu baandi sinibo abahabilye daawe.
Olwohuba koti lu misaala kiyiindira emyaaka miingi, nilwo lu baandu baange bahayiindireenge.
Abaloonde baange bahahiinde nibalya hu byaamo by'ohudidiihana hwaabwe.
23Emirimo kibalihola haba sikyahabe eky'ebihaya,
kata sa abaana abaheebulwe, haba sibalinyoola amasira.
Olwohuba bahabe olwiibulo lw'abo ba Ese Omwaami, ndaberesa ehabi,
abo abeene, alala neende olwiibulo lwaabwe.
24Kata nibasisiiri ohunaanga, njia ohubakobolaangamo,
nibanabecheenge nibasiilomalomaanga, njia ohubawuliraanga.
25 #
Yis 11:6-9. Aarara neende amakoondi madoto, byahalireenge alala.
Edalang'i yahaaye obunyaasi koti eng'oombe;
haandi olufu nilwo olwahabecheenge ebyohulya by'endemo.
Hu ngulu chaange njoolerefu choosi,
haba sihwahabecheengeho ebidinyu kata sa ohusihirira,
Omwaami nilwo lu aboolere.”
Currently Selected:
Yisaaya 65: SAMIA
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2019
©Bible Society of Uganda, 2019
