Yisaaya 63
63
Ohuyiingira ebyaalo hw'Omwaami
1 #
Yis 34:5-17; Yer 49:7-22; Esek 25:12-14; 35:1-15; Amos 1:11,12; Oba 1:1-14; Mal 1:2-5. “Wiina mweene wuno otula mu siko sya Bbosira mu Edomu?
Wiina mweene wuno owefwaalire ebyefwaalo bilai eby'e Bbosira,
oli mu ngubo ch'oluyaali,
akeenda neende amaani maangi?”
“Niye Ese, Omwaami, oli neende obunyala bwohununula,
haandi olaangirira ohuyiingira hwaange.”
2Lwasiina engubo chao chahaanye,
haandi lwasiina chiri koti engubo ch'oyo onyuha efiini?
3 #
Hubwi 14:20; 19:15;
Hubwi 19:13. Mani Omwaami naakobolamo ati: “Ese syeeng'ene,
niise osenakiire ebyaalo koti omuundu oseenakira efiini mu sihunyiro;
ndabiniinaho neende etima lyaange lyoosi
haandi ndabiseenakira mu bwaalaba bwaange.
Amabaanga kabwo kaanyuhira hu ngubo chaange,
mani nichiichulaho amabboondo.
4Olwohuba oludaalo lw'ohwetuunga lwali mu mwooyo kwaange,
haandi omwaaka kwaange kw'ohununula kwoolere.
5 #
Yis 59:16. Ndaliinda, nae naabulao omuundu wuhoonya;
ndawuka, nae yaabulao omuundu wiicha ohunjabina.
Nae etima lyaange niliimberesa amaani,
mani ese omweene ninyiingira.
6Ndaseenakira ebyaalo mu tima lyaange,
mani ndabidobaania mu bwaalaba bwaange.
Mani ndeedisa amabaanga kaabwe hu loba.”
Obulai bw'Omwaami eyiri Yisiraeli
7Njia ohulomaloma hu hudaha hutaakama hw'Omwaami.
Njia ohufumia Omwaami,
ohuchianakana neende ebyo byoosi bi Omwaami atuholeere,
neende obuheeri buungi bu yekeese ab'enyuumba ya Yisiraeli,
hwababereese ohuchianakana neende esisa syae,
neende ohuchianakana neende obuheeri butaakama bwae buungi.
8Olwohuba Omwaami aboola ati: “Mubwadyeeri bweene, bano nibo abaandu baange,
haba sibachia huumbacha daawe.”
Mani naaba Omuwonia waabwe.
9Yabachuunirwa mu husaanda hwaabwe hwoosi.
Niye omweene, ataali malaika wae, owabawonia.
Mu buheeri bwae neende mu sisa syae, yabanunula.
Yabaliinda mani yaabahoonyaanga mu bidinyu byaabwe ohutula hale.
10Nae mani nibamujeemera
mani nibanyoolesa Mwooyo Mwoolerefu wae,
mani sakira yeehola omusuku waabwe,
haandi omweene n'abalwaania.
11Mani abaandu bae nibeechulisa endaalo ehale,
mu biha bya Musa omuhalaabani wae, mani nibateeba bati:
“Omwaami ali yeena eyabaambusa enyaanja
alala neende abeemirisi b'abaandu bae?”
Ali yeena owata Mwooyo Mwoolerefu wae
akatikaati waabwe?
12 #
Hut 14:21. Omwaami ali yeena owehoonyera obunyala bwae
owahola eby'amaani naabitira mu Musa,
n'akabulamo amaachi k'enyaanja nibabona
omweene ohweholera eliita litaheebirirwe?
13Yababisa mu nyaanja,
koti lu faraasi yibita mu siparara
niyitegumuule.
14Koti lu ng'oombe chiyirwa aasi mu hooho lai,
nilwo lu Mwooyo w'Omwaami aberesa abaandu bae ohuwuluuha.
Mani nilwo lu weemereramo abaandu bao,
mani baleetera eliita lyao oluyaali.
Esaala yisaba esisa neende obuhoonyi
15Ewe Omwaami, tulingaale nooli muukulu,
mani obone nooli eyomu bwiihalo bwao bwoolerefu haandi obw'oluyaali.
Esira yao neende amaani kao mu hutuhoonya biri yeena?
Obuheeri bwao neende esisa syao biri yeena?
Omalire ohubitutusaho.
16Olwohuba niiwe Seefwe,
kata asyahaba mbwe Abburahamu kuuka yeefwe haba saatumanyire
haandi Yisiraeli yatwekaana,
nae ewe, Ewe Omwaami, niiwe Seefwe,
Omuwabini weefwe, ohutula hale-na-haandi nilyo eliita lyao.
17Ewe Omwaami, lwasiina otuleha hwawaaba nihutula hu ngira chao?
Lwasiina otwoomya emyooyo otyo, mani hwahaya ohuhwiisamo oluyaali?
Kobola hu hola yao ehale hulw'abahalaabani bao,
hulw'abaandu bao beene, ob'oluyia lwa Yisiraeli.
18Abaandu bao boolerefu bali abuundu wao woolerefu ebiha bidiidi muno;
nae abasuku beefwe nasisenakiire.
19Hweeholere koti abo bootatukaangaho daawe,
koti abo abatabeechangaho abaandu bao.
Currently Selected:
Yisaaya 63: SAMIA
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2019
©Bible Society of Uganda, 2019
