Yisaaya 62
62
Ohugumya Yerusalemu
1Hulwa Siyooni, haba siinjia hubuleera,
haandi hulwa Yerusalemu, haba siinjia huwuluuha,
ohwoola lu syahanunulwe koti obulafu,
haandi obuwonia bwasyo bwaaduha koti omuliro.
2Yerusalemu, ebyaalo byahabone ohununulwa hwao,
haandi abatuki boosi bahabone oluyaali lwao.
Mani ochia ohulaangwa eliita yaaha,
Omwaami mweene ly'ahukuliihe.
3Wahabe ekofya y'obuyaayi ndai mu muhono kw'Omwaami,
haandi ekofia y'obwaami mu muhono kwa Nasaae wao.
4Haba sosilaangwa ehabi liindi oti, “Owajwaang'wa,”
haandi esyaalo syao haba sisyahalaangwe, “Esyasiha” daawe,
nae ochia ohulaangwa oti, “Nasaae yi yasangaalira,”
haandi esyaalo syao syahalaangwe siti, “Esyadeeha.”
Olwohuba Omwaami ahusangaaliramo,
haandi niye yi syaalo syao syahadeehere.
5Olwohuba koti omusyaani muraaga adeehya omuhaana osisiiri ohumanya eby'abasaacha,
nilwo lu basyaani bao bahahudeehye,
haandi koti omusaacha odeehiisye asangaalira omweeya wae,
nilwo lu Nasaae yahahusangaalire.
6Ewe, Yerusalemu,
ndeere abaliindi hu bida byao.
Esideete syoosi neende esiro syoosi
haba sibachia hubuleera daawe.
Eng'we abeechulisa Omwaami ohwooseresa ebiindu bi yasuubisa,
mutawuluuhaanga daawe.
7Mani mutamufukiiriraanga ohuwuluuha daawe
ohwoola lu yahateeo Yerusalemu buyaaha
mani yaasihola esy'oluyaali mu syaalo.
8Omwaami yeechubire neende omuhono kwae muluungi
haandi yeechubire neende obunyala bwae ati:
“Mubwadyeeri bweene haba siinjia hukobolamo ohuwaayo engaano yao
abasuku bao bayilye daawe,
haandi abateende haba sibachia hung'wa efiini yao
ewe yi wadidikanira otyo.
9Nae abo abayitaaka haandi baayikesa nibo abahayirye
mani niinginia Omwaami;
haandi abo abanoka emisabbiibbu nibo abahang'weere efiini yaacho
mu lwaanyi lw'abuundu waange woolerefu.”
10Eng'we abaandu bomu Yerusalemu, mubitire, mubitire mu biruwa,
mutereesere abaandu engira;
mulime, mulime engira ya naahuluungu,
mutusemo ebikina-kina,
musiingisire ebyaalo ahalolero bamanye.
11 #
Yis 40:10; Hubwi 22:12. Bone, Omwaami alangiriire
ohwoola hu njakamo y'esyaalo ati:
Muboolere abomu Siyooni muti:
“Bone, Omuwonia weeng'we yeecha;
bone, ali neende omukabo kwae mu mahono,
haandi yemiise omusaara kwae mu moni wae.”
12Mwahalaangwe, “Abaandu boolerefu.”
“Abanunule b'Omwaami;”
haandi mwahalaangwe “Esiko si Nasaae adaha,”
“Esiko sitajwaang'wa.”
Currently Selected:
Yisaaya 62: SAMIA
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2019
©Bible Society of Uganda, 2019
