Yisaaya 56
56
Abaandu b'Omwaami bahabe ab'ebyaalo byoosi
1Omwaami aboola ati:
“Muholeenge ebyadyeeri haandi ebiluungifu,
olwohuba obuwonia bwaange buli aambi ohwoola,
njekese ohununula hwaange koti lu huli.
2Ndahaberese ehabi abo abaliinda Sabbaato buli ludaalo,
mani bahaya ohuholeraho emirimo.
Ndahaberese ehabi abo abeeliinda mani baahayaho ohuhola esyonoono syoosi.”
3Leha omuteende owamenya alala neende abaandu b'Omwaami atabolaanga ati,
“Mubwadyeeri bweene, Omwaami achia ohunjawuhania neende abaandu bae”;
haandi leha omulooye atabolaangaho ati,
“Bona, ese ndi sa omusaala mwoomu.”
4Olwohuba Omwaami aboola ati:
“Abalooye baliinda Sabbaato chaange,
abadoolao ohuhola ebiindu bisangaasa
haandi abomiirira hu ndagaano yaange,
5njia ohukera ameeta kaabwe keechulisibweenge
mu Nyuumba yaange neende mu baandu baange,
ohuhiraho koti lu mwahebuule abaana basyaani neende abahaana;
njia ohubaberesa eliita liyiindira endaalo choosi.”
Haba sibaheebirirwe daawe.
6Mani abateende abo abaheyambaanie hu Omwaami,
ohumuhalaabanira, neende ohuheera eliita ly'Omwaami,
haandi ohuba abahalaabani bae,
buli muundu n'aliinda Sabbaato, mani yaahaya ohulunyaasa,
mani yomiirira hu ndagaano yaange:
7 #
Mat 21:13; Mrk 11:17; Luk 19:46. “Njia ohubaleeta mboose hu Lugulu lwaange Lwoolerefu,
mani baberese esangaalo mu nyuumba yaange yohusabiraanga esaala.
Ebiyaanwa byaabwe bisaambwa neende ebiyaanwa byaabwe biindi
njia ohubifukiirira hu alutaari yaange;
olwohuba enyuumba yaange yahalaangwe enyuumba y'ohusabiraangamo esaala
eyiri abaandu boosi.”
8Omwaami Nasaae,
owabuusa alala abaandu ba Yisiraeli abali nibebwaabwa, aboola ati,
“Njia ohubabuusira alala neende abaandu baandi
ohumeeda hu bae abamala hale ohubuuswa.”
Abeemeresi ba Yisiraeli boolobisibwa
9Omwaami aboola ati, “Eng'we mweesi ebisolo biteende, neende ebyomu sichaha
mwiiche mulye!
10Abeemeresi b'abaandu baange bali koti abawofu.”
Boosi-boosi sibulao esiindu si bamanyire;
boosi bali koti embwa esiru
echitanyala ohusama.
Boosi beyalisa, baloota,
baheera ohukona endoolo.
11Bali koti embwa ch'okuliira;
echiteekutaangaho kata oludaalo lulala.
Abaayi bosi sibulao sibamanyire;
buli otulayo yediirira engira yae,
buli muundu niyekoonyera engaanga yae.
12Buli otulayo aboola ati, “Mwiiche, lehe hulete amalwa,
lehe hwekotyoombere amalwa kameesa muno.
Ngaandi muchuli lunaabe sa koti enyaanga yino,
haandi awuundi nohuhira hooho neende enyaanga yino.”
Currently Selected:
Yisaaya 56: SAMIA
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2019
©Bible Society of Uganda, 2019
