Yisaaya 55
55
Omwaami akwiira abaandu esisa
1 #
Hubwi 21:6; 22:17. Omwaami aboola ati:
“Buli muundu olumwa obuluwo,
leha yeeche ang'we amaachi;
kata ayahaba nataali neende eseende,
yiche, mani mweesi mukule haandi mulye.”
Mwiiche, mukule amalwa neende amabeere
ataali eseende yoosi kata sa ohutuunga esiindu siindi syoosi daawe.
2Lwasiina munyaasa eseende hu biindu bitaali ebyohulya,
haandi ohuhalaabanira ebiindu bitabeekusa daawe?
Tekeerese bulai bi mboola,
mani mulicheenge bulai haandi musangaaleenge.
3 #
Biho 13:34. “Muteke amatwi, mani mwiiche yiindi;
muwulire mani munyoole obulamu.”
Njia ohuhola naang'we endagaano yitaakama,
ey'ohudaha hwaange hutaakama, ohudaha hwadyeeri koti hu ndadahiramo Daudi.
4Ndamubitiramo ohweekesa ebyaalo biindi obunyala bwaange,
niimuhola ohuba omwiimirisi haandi omutuki w'amaani w'ebyaalo biingi.
5Bone, mwahalaange ebyaalo bi mutaali nimumanyire ohwiicha yi muli,
haandi ebyaalo byali nibitaabamanyire, byaheruhire yi muli.
Olwohuba Omwaami, Nasaae weeng'we, haandi Omwoolerefu wa Yisiraeli,
ohubaberesa oluyaali.
6Koonye Omwaami nasiinyolehana,
mumulaange, n'asisiiri aambi.
7Leha omwonooni, alehe esaambo chae embi,
haandi otali omuluungifu akaluuhanie ebibaaso byae.
Leha akobole eyiri Omwaami, mani Omwaami oyo anyale ohumukwiira esisa;
akobole eyiri Nasaae weefwe, olwohuba w'esisa niye haandi alehereramo elalira ebyonoono.
8Omwaami aboola ati: “Ebibaaso byaange sibiri koti ebibaaso byeeng'we daawe,
haandi engeri chaange haba sichiri koti engeri cheeng'we daawe.
9Koti ekulu liri aakulu w'esyaalo,
nilwo lu engeri chaange chiri aakulu ohuhiraho echeeng'we
haandi ebibaaso byaange biri aakulu muno ohuhira ebibaaso byeeng'we.
10 #
2 Kor 9:10. “Koti sa lu efula neende amakina k'efula bikwa ohutula aakulu,
mani byaahaya ohukobolayo aakulu nae byachuhiirisa eloba,
nibikera ebimera byamwo nibimera,
mani nibyaamaho ebyaamo,
nibiberesa omulimi emwo neende ebyohulya byaalya.
11Mani nilwo lu mboosi yi nomanoma yiri;
haba siyikobolaanga yi ndi niyitaaholere omulimo kwayo daawe.
Nae yiholaanga ebyo bi mba nindaha,
haandi yooseresaanga bi yitumire ohuhola.
12“Olwohuba mwahatule mu Bbabbilooni neende esangaalo,
haandi mwahayirwe neende omuleembe nimutulayo.
Engulu neende obugulu biri mu moni weeng'we
byahatuunduhe mani byachaaka ohweemba,
neende emisaala kyomu siino kyoosi kyahapaame mu mayu hulw'esangaalo.
13Emisyoola kyahamere yi mawa kabeere;
haandi emwaanyi chahakobole abuundu w'olunani.
Mani aho hahabe ahalolero h'endaalo choosi,
aheechulisa ebiindu bi Ese Omwaami holere.”
Currently Selected:
Yisaaya 55: SAMIA
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2019
©Bible Society of Uganda, 2019
