Yisaaya 54
54
Obuheeri bw'Omwaami eyiri Yisiraeli
1 #
Gal 4:27. Omwaami aboola ati, “Ewe Yerusalemu, obeere koti omuhasi mukuumba, oteebulaangaho omwaana yeesi,
nae bulaanu siingira weembe hulw'esangaalo haandi ohuumulire aakulu,
haba sowuliraangaho obuchuuni bw'engasi!
Olwohuba ochia ohwiibula abaana baangi ohuhira
omuhasi yi wamwe atalehaangaho yeeng'ene daawe.
2Baambaliya eyeema lyao,
mani olehe engubo chomu nyuumba yao chideembe haandi chibaambuluhe;
oteembikitania, nae kaangulula emikoye kibe emileeyi
mani womiise ebihoondo byaalyo.”
3Olwohuba enjaho ch'esyaalo syao chichia ohubaambaliya enyaande choosi.
Haandi olwiibulo lwao ohweekobosera esyaalo si baandu b'ebyaalo biindi bali nibamenyamo.
Mani ebiko byali nibyeehola ekuunda, bichia ohwiichulamo abaandu.
4Otatya daawe, olwohuba haandi siwahaweemo oluyaali daawe;
oteyendehera daawe, olwohuba esoni haba sichahahudiireho haandi.
Oliibirira esoni ch'omuburaaga bwao,
haandi oliibirira engisa yohulehwa ao koti omuhasi mufwiirwe.
5Olwohuba omuloongi wao, niye wamwo,
Omwaami w'Obunyala nilyo eliita lyae;
haandi Omwoolerefu wa Yisiraeli niye Omuwonia wao,
alaangwa ati, Nasaae w'esyaalo syoosi.
6Olwohuba Omwaami yahulaanga nooli
koti omuhasi yibajwaanga haandi nooli mu ngisa,
koti omuhasi yibasukuna mu buraaga bwae.
Mani Omwaani aboola ati:
7“Ndahuleha ohumala embaka endiidi muno,
nae mu buheeri bw'amaani, njia ohuhukobosa haandi.”
8Hulw'etima liingi muno, ndahufudatira emukoongo ohumala esiha sidiidi muno,
haandi ndahweekisa.
Nae neende obuheeri butaakama, njia ohuhukwiira esisa.
Omwaami, Omununusi wao, nilwo lu aboola.
9 #
Huc 9:8-17. Olwohuba, koti lundeechuba mu ndaalo cha Nowa,
endi haba siinjia huleeta amaachi k'ofwomboole,
kata neende bulaanu ndeechuba endi
haba siinjia huhunyoolerera daawe
haandi siinjia huhwoolobya daawe.
10Olwohuba engulu chinyala ohuwaao
neende ebigulu ohumalwao,
nae obuheeri bwaange butaakama haba sibuchia ohuwaao daawe.
Omwaami ohukwiira esisa, nilwo lu aboola.
Yerusalemu Syahoombahwe Buyaaha
11 #
Hubwi 21:18-21. Omwaami aboola ati:
“Ewe Yerusalemu, esiko si saandisibwa, esiwuuchwa omuyaka, haandi abulao ohulemya omwooyo,
bona, njia ohuhwoombaha neende amakina malai,
haandi omusiingi kwao njia ohukwoombahira amakina k'engaanga y'aakulu.
12Eminara kyao njia ohuchoombaha neende amakina magumu,
ebiruwa byao, njia ohubyoombahira amakina ka rubbia,
haandi ebida byao byoosi njia ohubyoombahira amakina k'engaanga.
13 #
Yow 6:45. Omwaami mweene niye ochia ohweekesa abaana bao,
haandi buli siindu sibahola sichia ohubachiiraanga bulai muno mani babe neende omuleembe.
14Obuluungifu buchia ohuhuhola ow'amaani;
mani wahawone ohufwiinyirirwa, olwohuba yibulao esichia ohuhutiisaho haandi;
amatiichasi haba sikachia husudaho aambi naawe daawe.
15Niyibaao ohuseeta,
haba siyahabe n'atula yi ndi.
Buli wahahuseete ohuhulwaania
yahakwicheenge bukwa hulwao.
16Bona, ndaloonga omwiitaanyi
obwaana omuliro kw'amaanda,
mani niyetaanya esilwaaniso syaaba naadaha.
Haandi Niise owaloonga omusikaari osilwanisira ohusihirisa.
17Nae sibulao esilwaaniso sibahetaanye ohulwaania esyahabe neende ehabi,
haandi buli owahawose naawe omusaango, kwahamuhire.
Njia ohukayirira abahalaabani baange,
haandi njia ohukera bayiingire.”
Omwaami nilwo lu aboola.
Currently Selected:
Yisaaya 54: SAMIA
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2019
©Bible Society of Uganda, 2019
