Yisaaya 50
50
Nasaae Agumya Yisiraeli
1Omwaami ateeba ati:
“Ebbarwa yindandiika ohwiirusa ng'ineeng'we yiri yeena,
eyakera ndamwetusaho?
Oba wiina mweene oyimaanja
yindakusa eng'we ohuba abawaambe?
Bone, eng'we mwakuswa hulwa ebyonoono byeeng'we abeene,
haandi obudoondobanu bweeng'we abeene nibwo obweerusa ng'ineeng'we.
2Nindeecha ohubawonia, lwasiina haba sindanyolao omuundu kata mulala?
Nindalaanga, lwasiina abulao owakobolamo?
Omuhono kwaange kwiimbikitaane, sakira kutanyala ohubanunula?
Oba mbulamo amaani mani ndahaya ohubawonia?
Bone, niihabuhira enyaanja, niyihama.
Hola emyaalo kyaaba esiparara;
eng'eeni chamwo chaahaywa amaachi,
chaafwa obuluwo mani chawunya esifuundu.
3Nyala ohukera ekulu lyaamaliya,
mani lyaaba koti liifwaasire ebigunia by'ohulira.”
Obuwulisi bw'omuhalaabani w'Omwaami
4Omwaami Nasaae yaambereese
olulimi lw'abeeki,
hu nyale ohuba neende emboosi yohugumya
oyo oba n'ajoong'ere.
Yaasimusa buli chuli,
mani yaateka amatwi kaange
kaatekeeresa koti ak'abeeki.
5Omwaami Nasaae yaanjikuule amatwi,
mani ndaahaya ohujeema,
ndakobola enyuma ohumutulaho.
6 #
Mat 26:67; Mrk 14:65. Ndalehera omukoongo kwaange abo abaahuya,
neende amatama kaange abo abamaanyulaho ebirefu.
Haba sindakisa obweeni bwaange ohuhaya
ohudirwa esoni neende ohufuuchwaho.
7Olwohuba Omwaami Nasaae niye owahoonyaanga;
mani sakira sindeeba hu bujoogi hwaabwe obwo,
haandi manyire endi haba siinjia ohudirwa esoni.
8 #
Rom 8:33,34. Oyo owuhoonya ali aambi naange.
Wiina owufunaana omusaango?
Lehe, hweemeo nae huwosanie.
Owunyemereho niye wiina?
Leha mani asude aambi naange.
9Bone, Omwaami Nasaae niye owuhoonya;
wiina mweene onaheengere omusaango ohuuhira?
Bone, abo boosi bahakofule koti engubo sa;
mani amasiriri kaachirya.
10Buli muundu hu eng'we yeese mu Omwaami oluyaali
haandi awuliire ekono ly'omuhalaabani wae,
kata ayahakeendera mu siirima
haandi yaabula obulafu bwoosi,
nae yeekisa mu liita ly'Omwaami
haandi yomirira hu Nasaae wae.
11Bone, eng'we mweesi abayaambya omuliro,
abaadusa ebikeenga.
Mulikeendera mu bulafu bw'omuliro kweeng'we,
neende mu bikeenga bimwaduuse!
Omwaami mweene niye owosereese sino;
mani nimufwiira mubuchuuni.
©Bible Society of Kenya, 2019
©Bible Society of Uganda, 2019