Yisaaya 48
48
Nasaae niye Omwaami w'ebiindu byahabeeo
1Eng'we muwulireho sino, eng'we ab'enyuumba ya Yakobbo,
abalaangwa Abaisiraeli,
haandi abatula mulwiibulo lwa Yuda;
eng'we abeechuba neende eliita ly'Omwaami
haandi abalomaloma hu Nasaae wa Yisiraeli
ataali mubwadyeeri neende mubwelalira.
2Olwohuba mwelaanga abomu Siko Syoolerefu,
abeene nimweesika Nasaae wa Yisiraeli;
eliita lyae niye Omwaami w'Obunyala.
3Omwaami oyo niye obaboolera eng'we ati, “Ohutula hale-na-haandi, ndalaangiriraanga ebyahakweeo,
ese omweene niise owabilaanga, mani nibyeemao nibimanyihana.
Ndabihola bwaangu muno mani nibyoolerera.
4Olwohuba ndamanya koti lu muli ab'emitwe myoomu;
haandi eekosi lyeeng'we ly'emisi ky'ebichuma
haandi obweeni bweeng'we bw'ebihomo.
5Sakira ndalaangirira ohutula hale
nibisisiiri ohwoola mani nimbeekesa mubimanye,
mani muhaye ohuboola muti, ‘Esiloongaloongwe syaange siinyinamira,
ebiloongaloongwe byaange bibaache neende ebiloongaloongwe byaange bitaanye nibyo ebilagiire ebiindu ebyo ohubaao.’
6“Ebyo byoosi mwabiwulira hale; bulaanu mubibone nibyoolereere;
mani haba simuchia hubifukiirira muti byadyeeri nibyo?
Ohutula buti, ohwemeeda mu moni, njia ohubaboolera ebiindu biyaaha
ebiindu byali nibyakiswa, bi mwali nimutamanyire.
7Ndahabiloonga sa, haba si byaahale daawe;
haandi nyaanga yino nilwo lwotangiire ohubiwulira,
mani ohaye ohuboola oti, ‘Bone, ndali nindabimanya hale.’
8Mwali nimutabiwuliraangaho daawe, nimutaabimanyireho daawe,
ohutula hale, haba simwaali nimwabitekeeresaangaho daawe.
Olwohuba ndamanya endi haba simuli abeesikwa daawe,
haandi endi ohutula mu hwiibulwa hweeng'we mumanyihaane koti lu muli abajeemu.
9“Nae ohuliinda oluyaali lwaange, ndahaakamye etima lyaange,
haandi ndahabesimiirise
mani ndahaya ohubasihirisa.
10Bone, njia ohubalabya niimbitira mu husaanda;
koti lu feesa yilabisibwa mu tanuuli ly'omuliro.
11Esiindu si hola, sihola hulw'obunyala bwaange;
sihola hulw'obulai bweeng'we,
haye ohuchalaasa eliita lyaange,
kata ohukera abaandu baandi ohulekeeresa oluyaali lwaange.
Oluyaali lwaange, haba siinjia huluberesa owuundi daawe.”
Siraasi, omweemeresi yi Omwaami yadoola
12 #
Yis 44:6; Hubwi 1:17; 22:13. Omwaami aboola ati, “Tekeerese bi mboola, eng'we abeechuhulu ba Yakobbo,
neende Abaisiraeli, ba ndalaanga.”
Niise Oyo, Niise otaangira,
haandi Niise omaliirihayo.
13Niise, ese omweene owataao omusiingi kw'esyaalo,
haandi Niise owabaamba ekulu nindehoonyera obunyala bwaange.
Ninaanga esyaalo neende ekulu,
ebyeene bisiingira sa byeleeta mu moni waange.
14Mwebuuse alala, eng'we mweesi, mani muwulire.
Wiina hu banasaae abo boosi owali nalaangiriireho ebyo nibisisiiri ohubaao?
Ese Omwaami niise odoolere omuundu yi ndaha omweene.
Oyo niye ochia ohuseeta Bbabbilooni,
haandi eye lyae nilyo elichia ohuhuya Abakalidaaya.
15Ese, Ese omweene, Niise owalomaloma haandi owamulaanga,
mani nimulagira achie, olukeendo lwae niiluberesa ehabi.
16“Musude aambi naange, muwulire sino.
Ohutulira elalira muhuchaaka neende ohwoola buti, haba sinomanomeraanga mu ngiso daawe,
bi nomanoma byoola esiha mani byoolerera abweene.”
Mani bulaanu, Omwaami Nasaae yaandumire haandi yambereese Mwooyo wae.
Endekeha y'Omwaami eyiri abaandu bae
17Omwaami,
Omununuli wao, Omwoolerefu wa Yisiraeli aboola ati:
“Ese niise Omwaami Nasaae wao,
ohweekesa ebihuyiindiyasa,
haandi ohweekesa engira y'ohoyere ohubitaho.”
18“Oba niwawulira ebilagiro byaange!
Ao mani wahabeere neende omuleembe kuhulukusa koti omwaalo,
haandi obuluungifu bwao bwahabeere koti efwiinda ch'enyaanja.
19Ab'olwiibulo lwao bahabeere abaangi koti omusenye,
haandi abeechuhulu bao bahabeere abaangi bootanyala ohubala koti emoni ch'omusenye.
Ameeta kaabwe kahayiindiriire elalira
haandi sibahasihiriire bawaao daawe.”
20 #
Hubwi 18:4. Mwaanguye mutule Bbabbilooni, mwiiruhe mutule hu Bbabbilooni!
Mulaangirire buli abuundu, nimuhuumula hulw'esangaalo,
mu sisalaanie ohwoola hu njakamo;
boole muti, “Omwaami anunuule Yakobbo omuhalaabani wae.”
21Obuluwo haba sibwahabalume niyahabeemere ohubitaanga mu biparara;
yabahulukusira amaachi ohutula mu lwaanda.
Yaata olwaanda mani amaachi kaafududusa nikalutuliramo.
22 #
Yis 57:21. Omwaami aboola ati, “Ababi haba sibali neende omuleembe daawe.”
©Bible Society of Kenya, 2019
©Bible Society of Uganda, 2019