Yisaaya 32
32
Omutuki w'esitiibwa
1Bone, ebiha bichia ohwoola yibeeo omutuki otukira mu buluungifu,
haandi abahoongo bae bachia ohuloondakana neende obwadyeeri.
2Buli otulayo yahabe koti obweyikamo bw'ohuwona omuyaka
haandi abuundu w'ohuwoneramo esiifuusye.
Bahabe koti emyaalo ky'amaachi mu syaalo sy'esiparara.
Bahabe koti esiiniha sy'olwaanda luhoongo mu situundu sy'esyaalo syoomu.
3Emoni ch'abaandu babona haba sichahaliimbe chaahaya ohubona ebiindu bi baandu badaha,
haandi amatwi k'abaandu bawulira haba sikahadiimbe baahaya ohuwulira bi baandu bababoolera.
4Mani ebibaaso by'abaandu bataali neende ohwesimirisa byahaakame, mani bachaaka ohuhola ebiindu byeekesa biti bachuunirwa abaandu basyaabwe.
Ab'esirimi, bahanyale ohulomaloma bulai emboosi chimanyihana.
5Omuundu musiru haandi siyahalaangwe ow'oluyaali,
oba omuliichaki ohulaangwa omuhunuufu.
6Olwohuba omusiru alomaloma eby'obusiru,
haandi ebibaaso byae biri mu huhola ebyonoono;
ohuhola ebifwoola Omwaami,
neende ohulomaloma emboosi chinyeka Omwaami,
ohuleha abaandu enjala niyibaluma,
haandi abo abalumwa obuluwo ohutababeresa esyohung'wa.
7Omuliichaki muundu mubi niye;
haandi ebiindu bi ahola haba si bilai nibyo;
abaasa ohusihirisa abamanani niyehoonyera obubacha,
kata abahaba nibasaba ebibahoyera.
8Nae omuundu w'oluyaali abaasa ohuhola ebiindu bilai,
haandi yomiirira hu biindu bilai.
Ohuheenga omusaango haandi neende ohuwonia.
9Siingire, eng'we abahasi bataali neende esiindu syoosi simweyendeherera, mani muwulire ekono lyaange;
neende eng'we abahaana batadeebayo daawe, mutekeerese muwulire enomanoma yaange.
10Mu biha bidiidi muno ebihiraho omwaaka mulala
eng'we abahasi batadeebayo, muchia ohuheeherwa;
olwohuba emisabbiibbu haba sikichia ohwaama,
haba simuchia huba neende eekesa.
11Teengerehe, eng'we abahasi bali mu bulamu bulai,
mukweemo oluteengo, eng'we abatadeebayo;
mwefwaalulemo engubo cheeng'we, mudoong'e syeekenye,
mani mweboye ebigunia mu bibuno mweekese engisa yeeng'we.
12Mwehuye hu birifu nimweekesa engisa yeeng'we,
olwohuba endalo ndai ch'emisabbiibbu kisihiriiswe.
13Mani esyaalo sy'abaandu baange
simereremo amawa neende olunani;
mulirire enyuumba choosi chi baandu basangaaliraangamo
neende mu biko bi baandu besangaasiraangamo.
14Olwohuba edooho lyaheebwaabe,
esiko syali nisyeechulamo abaandu syahadoong'e esihaya syeene.
Esigulu neende omunara ku baliindiraho
byahasihiriswe endaalo choosi,
yi suhiri ndeende chahang'alaalire,
haandi ebyaayo byahayireenge.
15Nae ebiha byahoole mani Nasaae yahatuberese Mwooyo wae ohutula aakulu,
mani esiparara syahehole eloba lai,
mani obulai bw'endalo ndai byahabe koti obw'esichaha.
16Buli abuundu mu syaalo wahabeeo obwadyeeri,
haandi obuluungifu bwahabe mu syaalo syoosi.
17Mani obuluungifu bwahaleete omuleembe,
mani ebyahatule mu buluungifu nihwo ohuyenjeera neende obweesikwa endaalo choosi.
18Abaandu ba Nasaae bahamenye mu muleembe mu syaalo syaabwe,
bahamenye mu madaala kaabwe mu muleembe, neende mu bituundu by'ohuwuluuhiramo.
19Nae amakina k'efula kahahuye esichaha esyo mani syaweera aasi
neende esiko syahakwisirwe aasi elalira.
20Nae muli neende ehabi eng'we abataaka hu ndulo w'emyaalo,
eng'we abali neende obwayiro buli abuundu yimwayira eng'oombe neende esuhiri nimutahungiire.
©Bible Society of Kenya, 2019
©Bible Society of Uganda, 2019