Yisaaya 2
2
Omuleembe kutaakama
(Mik 4:1-3)
1Chino nicho emboosi chi Yisaaya omwaana wa Amosi yanyoola ohutula eyiri Nasaae echidiira hu Buyudaaya neende Yerusalemu.
2Mu ndaalo chiichayo echo
olugulu lu beenamiraho Omwaami
lwahabe olugulu luhira mu ngulu choosi obuhunuufu,
mani lwaaba aakulu w'ebigulu biindi byoosi;
mani ebyaalo byoosi byechaanga nibyebuusira yi luli,
3haandi abaandu baheeyiheenge nibeecha nibaboola bati:
“Mwiiche, lehe huchie huniine hu lugulu lw'Omwaami,
eyiri enyuumba yohwiinamiraangamo Nasaae eya Nasaae wa Yakobbo;
hunyale ohweekaanga ebiindu byaadaha huhole
haandi hukeendereenge mu ngira chae.”
Olwohuba amalako k'Omwaami kachia ohutulaanga mu Siyooni,
neende emboosi y'Omwaami yichia ohutulaanga mu Yerusalemu.
4 #
Yoel 3:10; Mik 4:3. Omwaami achia ohuheengera ebyaalo emisaango,
haandi achia ohukaya obusoolo akatikaati w'abaandu.
Engaanga chi babeere nibehoonyeraanga ohwiitanira, bachia ohuchiitaanya chibe embako chohulimira emikuunda,
haandi amafumo kaabwe bachia ohukaholaanga kabe engeso chikesa eekesa.
Mani sibulao esyaalo syahadiira ebilwaaniso ohuseeta esyaalo siindi daawe,
haandi haba siyahabeeo ohweeka eby'amaye daawe.
5Eee, mani eng'we abeechuhulu ba Yakobbo
mwiiche, lehe hukeendere
mu bulafu bw'Omwaami.
Ohwehuduumbasa huchia ohusihiriswa
6Ewe Nasaae, webwaabire abaandu bao,
abeechuhulu ba Yakobbo,
olwohuba esyaalo syaabwe basiichusamo eby'emisaambwa bitula ebukwe
neende eby'obulakusi biri koti eby'Abafilisiti,
haandi baloondekana neende esaambo ch'abateende.
7Esyaalo syaabwe syeechulamo efeesa neende esaabbu,
haandi eby'obuyiinda byaabwe bibulaho enjakamo.
Esyaalo syaabwe siichulemo efaraasi,
haandi ebigaari byaabwe bibulaho enjakamo.
8Esyaalo syaabwe syeechulamo ebiloongaloongwe bya banasaae;
haandi beenamira ebiindu bi beene baloonga,
ebyo bi baloonga neende amahono kaabwe sa.
9Mani omuundu achia ohuloongoyaswa,
haandi abaandi bachia ohwiiswa aasi,
Omwaami haba saachia hubaleheramo kata nabudiidi!
10 #
Hubwi 6:15; 2 Tes 1:9. Mwiiruhe mwiingire mu ng'uungu chomu makina,
mani mweekise mu lufu
nimwiiruha Omwaami otiisa,
nimwiiruha oluyaali lwae lw'amaani.
11Oludaalo luchia ohwoola, lu ohwehudumba hw'abaandu huchia ohumalwao,
haandi esuunga y'abaandu yichia ohuloongoyaswa;
mani Omwaami yeeng'ene niye owahakinisibwe hu ludaalo olwo.
12Olwohuba Omwaami w'Obunyala ali neende oludaalo
lu yahaloongoyasireho abo boosi abeehuduumbasa neende ab'esuunga,
neende buli muundu yeesi oweniinia neende oyo owehuduumbasa.
13Omwaami achia ohusihirisa emisaala mileeyi choosi echa Lebbanooni,
neende emituumba choosi echa Bbasani.
14Omwaami achia ohukwalaasa engulu ndeeyi choosi,
neende ebigulu byoosi;
15achia ohukwalaasi buli munaara muleeyi,
neende buli sida syomiifu esyasita olukaka.
16Omwaami achia ohwiibisa mu nyaanja emeeri cha Tarusiisi choosi,
neende buli siindu sisangaasa ohubona syoosi.
17Ohwehuduumbasa hw'abaandu huchia ohuloongoyaswa,
neende ohweniinia hw'abaandu huchia ohwiiswa aasi;
mani hu ludaalo olwo, Omwaami yeeng'ene niye ochia ohukinisibwa.
18Mani ebiloongaloongwe bibeenamira bichia ohuwerao elalira.
19Mani abaandu bachia ohwiingira mu ng'uungu chomu makina
neende mu meena kabayaba mu loba,
ohweekisa Omwaami ow'amatiichasi,
haandi ohweekisa oluyaali lw'amaani kae,
niyahekisuleyo ohutiisa neende ohuteengya esyaalo.
20Hu ludaalo olwo, abaandu bahasukune eyale ebiloongaloongwe bi beenamiraanga
ebiloongaloongwe byaabwe by'efeesa neende eby'esaabbu,
bi beene beeholera ohwiinamira,
bahabirehere eefuho neende embudombuudo.
21Omwaami niyaheeche ohuteengya esyaalo, abaandu bachia ohwekisaanga mu meena, mu ng'uungu chiri mu ngulu ch'enyanda ohuteemaho ohweyonia etima lyae haandi neende ohweekisa ohutula hu bunyala bwae neende oluyaali lwae. 22Mutesikaanga omuundu
owahafwe sa,
siindu siina syeene esy'engaanga syaali nasyo?
©Bible Society of Kenya, 2019
©Bible Society of Uganda, 2019