Esekeeli 48

Ohukabana eloba ohweema hu nono

1“Kano niko ameeta k'enono echo: Ohuchaakira hu lwaaho lw'emukulu, ohutula hu Nyaanja Hoongo ya Mediterania n'obitira hu ndulo w'engira ya Hetulooni, ohwoola hu mulyaango kwa Hamati, haandi ohwemeedayo ohwoola Hasarenoni (esiri hu lwaaho lw'emukulu lukabula obwaami bwa Damasiko neende obwa Hamati), ohutulira hu lwaaho lw'ebukwe ohwoola hu lwaaho lw'emuumbo. Enono ya Daani yahanyoole omukabo mulala. 2Aseri yahanyoole omukabo mulala kw'eloba lisibiraane neende ely'enono ya Daani, ohutulira ebukwe ohwoola emuumbo. 3Nafutaali yahanyoole esituundu sisibiraane neende esy'Aseri, ohutulira ebukwe ohwoola emuumbo. Yahanyoole omukabo mulala. 4Manaase yahanyoole esituundu sisibiraane neende esya Nafutaali, ohutulira ebukwe ohwoola emuumbo. Yahanyoole omukabo mulala. 5Efuraimu yahanyoole esituundu sisibiraane neende esya Manaase, ohutulira ebukwe ohwoola emuumbo. Yahanyoole omukabo mulala. 6Rubbeeni yahanyoole esituundu sisibiraane neende esya Efuraimu, ohutulira ebukwe ohwoola emuumbo. Yahanyoole omukabo mulala. 7Yuda yahanyoole esituundu sisibiraane neende esya Rubbeeni, ohutulira ebukwe ohwoola emuumbo. Yahanyoole omukabo mulala.

Esituundu sikabuhaane esiri akatikaati w'omukuunda

8“Esituundu sisibiraane neende esya Yuda, ohutulira ebukwe ohwoola emuumbo, niwo owahabe esituundu sikabuhaane simwahaleheo. Obutakalafu bw'eloba elyo bwahabe ekilomiita ehumi-na-chibiri neende esituundu ohutulira emukulu ohwoola emwaalo, haandi obuleeyi bwaalyo bwahaakane neende obw'emikabo ch'enono, ohutulira ebukwe ohwoola emuumbo. Enyuumba ya Nasaae yahabe mu situundu sy'eloba lino. 9Esituundu sikabuhaane sino simwahaawulire Omwaami, syahabe ekilomiita ehumi-na-chibiri neende esituundu obuleeyi, neende ekilomiita ehumi obutakalafu. 10Abalaamisi bahanyoole omukabo ohutula hu loba lino elyaawuliirwe Omwaami. Ohutulira ebukwe ohwoola emuumbo, esituundu syaabwe syahabe ekilomiita ehumi-na-chibiri neende esituundu, nae ohutulira emukulu ohwoola emwaalo syahabe ekilomiita chitaanu. Enyuumba ya Nasaae yahabe akati w'esituundu sy'eloba lino. 11Abuundu woolerefu ano yahabe ew'abalaamisi b'olwiibulo lwa Sadoki. Abo nibo abadiira bulai amalako kaange, haandi abatachookaaniraho alala neende Abaisiraeli baandi mu huhola ebyonoono, koti lu Baleefi basyaabwe bechokaania. 12Esituundu si balaamisi bahanyoole syahabe esituundu sikabuhaane, esyakabulwa ohutula hu situundu sy'eloba syoolerefu, Abuundu Ahiramo Obwoolerefu. Esituundu esyo syahasibirane neende esy'Abaleefi. 13Abaleefi bosi bahabe neende esituundu syaabwe sikabuhaane, esisibiraane neende esy'abalaamisi hu lwaande lw'emwaalo lw'eloba lyaabwe. Esituundu sy'eloba lyaabwe syosi syahabe ekilomiita ehumi-na-chibiri neende esituundu ohutulira ebukwe ohwoola emuumbo, neende ekilomiita chitaanu ohutulira emukulu ohwoola emwaalo. 14Esituundu sy'eloba esy'Omwaami, nisyo esituundu sihiramo obulai mu syaalo esyo syoosi. Haandi haba sibahasikuseenge daawe, oba ohusyofwoong'aniamo neende esiindi daawe, oba ohusihola ohuba esy'omuundu wuundi daawe. Olwohuba syoolerefu haandi sy'Omwaami nisyo.

15“Esituundu sikabuhaane sy'eloba sidoong'ereo, sy'ekilomiita ehumi-na-chibiri neende esituundu obuleeyi, neende ekilomiita chibiri neende esituundu obutakalafu, syohwehoonyerwa neende abaandu boosi. Syahoombahemwo esiko, neende ohubaamo olwaayiro. Esiko syahabe akatikaati w'esituundu sy'eloba esyo, 16haandi syahakanilire hu nyaande chine choosi, emiita elifu chibiri neende emia chibiri neende amahumi kataanu (2,250) hu buli lwaande. 17Esiko esyo, syahabodoohanwe neende abuundu wabula esiindi ow'emita emia ndala neende amahumi kabiri neende chitaanu (125) hu lwaande lw'emukulu neende olw'emwaalo, olw'ebukwe neende olw'emuumbo. 18Esituundu sy'eloba sidoong'ereo, esisibiraane neende esituundu syoolerefu, obuleeyi bwaalyo ekilomiita chitaanu hu lwaande lw'ebukwe, haandi ekilomiita chitaanu hu lwaande lw'emuumbo, nilyo eloba linaalimweengemo ebyohulya by'ohuliisa abaandu bahalaabanira mu siko. 19Esituundu sy'eloba esyo sinalimwaanga neende abaandu bahalaabanira mu siko, abatula mu nono choosi echa Yisiraeli. 20Esituundu sy'eloba simwahaawulemo esyo, syoosi syahabe ekilomiita ehumi-na-chibiri neende esituundu hu nyaande choosi, n'obaalireho esituundu syoolerefu neende owohwoombahamo esiko.

21“Esituundu sidoong'ereo hu nyaande choombi, ebukwe neende emuumbo w'ebiindu bino, Enyuumba ya Nasaae, eloba ly'abalaamisi, neende ely'Abaleefi, neende esiko, lyahabe eloba ly'omutuki. Esituundu sy'eloba ly'omutuki esyo syahaloonde olwaaho lusikabula neende omukabo kw'enono, ohwoolera elalira obuleeyi bwa ekilomiita ehumi-na-chibiri neende esituundu, ohutula hu lwaaho lw'ebukwe ohwoola hu lwaaho lw'emuumbo. Esituundu syoolerefu neende Enyuumba ya Nasaae byahabe akati w'esituundu sy'eloba ly'omutuki. 22Amaloba k'Abaleefi neende ak'esiko kahabe akati w'omukabo kw'omutuki. Omukabo kw'omutuki kwahabe akati w'omukabo kwa Yuda hu lwaande lw'emukulu, neende omukabo kwa Bbenjamini hu lwaande lw'emwaalo.

Omukabo kw'eloba kw'enono chiindi

23“Nae enono chidoong'ereyo, chahakabane eloba chiti: Bbenjamini yahayire esituundu sy'eloba sichaakira hu lwaaho lw'ebukwe ohwoola hu lwaaho lw'emuumbo. Yahanyoole omukabo mulala. 24Simeoni yahayire esituundu sisibiraane neende esya Bbenjamini, ohutulira hu lwaande lw'ebukwe ohwoola hu lwaande lw'emuumbo. Yahanyoole omukabo mulala. 25Yisakari yahayire esituundu sy'eloba sisibiraane neende esya Simeoni, ohutulira hu lwaande lw'ebukwe ohwoola hu lwaande lw'emuumbo. Yahanyoole omukabo mulala. 26Sebbulooni yahayire esituundu sy'eloba sisibiraane neende esya Yisakari, ohutulira hu lwaande lw'ebukwe ohwoola hu lwaande lw'emuumbo. Yahanyoole omukabo mulala. 27Gaadi yahayire esituundu sy'eloba sisibiraane neende esya Sebbulooni, ohutulira hu lwaande lw'ebukwe ohwoola hu lwaande lw'emuumbo. Yahanyoole omukabo mulala. 28Nae hu lwaande lw'emwaalo lw'esituundu sy'eloba ly'enono ya Gaadi, olwaaho lw'esyaalo sya Yisiraeli lwahatule Tamari mani lwoole hu maachi ka Meribbati-kadesi, mani lwemeede ohwoola hu haalo hali Misiri, ohwoola hu Nyaanja Hoongo ya Mediterania. 29Omwaami Nasaae aboola ati, “Eyo niyo engeri yiimwahakabaniremo eloba ly'esyaalo esyo nimuhubba eha, mani muliberese Abaisiraeli ohweema hu nono chaabwe, haandi ekyo nikyo ekyahabe emikabo kyaabwe.”

Ebiruwa bya Yerusalemu

30 # Hubwi 21:12,13. Chino nicho emilyaango ky'esiko sya Yerusalemu: Hu lwaande lw'emukulu, olwahabe olw'emiita elifu chibiri neende emia chibiri neende amahumi kataanu (2,250) obuleeyi, 31lwahabeeho ebiruwa bidatu. Buli siruwa syahakulihwe eliita ly'enono ndala: esiruwa sya Rubbeeni, esiruwa sya Yuda, neende esiruwa sya Leefi. 32Hu lwaande lw'ebukwe olwahabe olw'emiita elifu chibiri neende emia chibiri neende amahumi kataanu (2,250) obuleeyi, lwahabeeho ebiruwa bidatu: esiruwa sya Yosefu, esiruwa sy'enono ya Bbenjamini, neende esiruwa sy'enono ya Daani. 33Hu lwaande lw'emwaalo, olw'emiita elifu chibiri neende emia chibiri neende amahumi kataanu (2,250) obuleeyi, lwahabeeho ebiruwa bidatu: esiruwa sy'enono ya Simeoni, esiruwa sy'enono ya Yisakari, neende esiruwa sy'enono ya Sebbulooni. 34Hu lwaande lw'emuumbo, lwosi olwahabe olw'emiita elifu chibiri neende emia chibiri neende amahumi kataanu (2,250) obuleeyi, lwahabeeho ebiruwa bidatu: esiruwa sy'enono ya Gaadi, esiruwa sy'enono ya Aseri, neende esiruwa sya Nafutaali. 35Obuleeyi bwoosi alala obw'esida ohwebodoohania esiko, bwahabe emiita elifu chitaanu-na-chine (9,000). Haandi eliita ly'esiko esyo ohutula oludaalo olwo ohuchia mu moni, lyahabe “Omwaami-ali-Ano.”

Currently Selected:

Esekeeli 48: SAMIA

Highlight

Copy

Compare