Esekeeli 36

Omwaami aberesa Yisiraeli ehabi

1Omwaami haandi yalomaloma naange, n'aboola ati, “Ewe omwaana w'omuundu, laangirira eyiri ngulu chomu Yisiraeli, mani ochiboolere oti: Eng'we engulu cha Yisiraeli, wulire emboosi y'Omwaami. 2Omwaami Nasaae aboola ati: Ewe Yisiraeli, olwohuba abasuku bao bahweniinisiraho nibaboola bati: A-haa, Chihwaakaanire! Bulaanu engulu chao ehale cheeholere echeefwe.

3“Bulaanu laangirira, mani oboole oti, Omwaami Nasaae aboola ati: Olwohuba abaandu bomu byaalo bibebodohaanie babahola mwaaba amakuunda, mani babanyaka ohutula hu nyaande choosi, mweehola ebituundu by'ebyaalo byaabwe, haandi babalekeeresa nibabanyeka muno. 4Mani sakira, Omwaami Nasaae aboola ati, eng'we engulu chomu Yisiraeli, neende eng'we ebigulu, otwaalo tudiidi neende ehooho, neende eng'we ebiko byalehwa ao nimunyakirwe haandi nibibulamo abaandu, ebiyiimwa neende ebyaalo biindi bibyebodohaanie.

5“Mani sakira, Ese Omwaami Nasaae nomanoome ninyoolereere muno ebyaalo byebodohaanie, nae elalira esyaalo sy'Edomu, ebyeekabira ebyeene esyaalo syaange basihola esyaabwe nibeehoya muno haandi nibali neende ohulekeeresa huungi muno nibasinyaka.

6“Mani sakira laangirira ebidiira hu syaalo sya Yisiraeli, oboolere engulu neende ebigulu, otwaalo tudiidi neende ehooho oti, Omwaami Nasaae aboola ati: ‘Bone, nomanoma neende etima liingi muno, olwohuba mwadiirwa esoni haandi mwanyekwa muno neende ebyaalo biindi. 7Mani Ese Omwaami Nasaae ndeechuba endi ebyaalo bibebodohaanie bicha ohudiirwa esoni.

8“Nae eng'we engulu chomu Yisiraeli, muchia ohulohaho amasaga, mani kaamire abaandu baange Abaisiraeli ebyaamo, olwohuba bali aambi ohukobola engo. 9Olwohuba bone, ndi hu lwaande lweeng'we, haandi njia ohubona endi mulimwa haandi mwataakwamwo emwo. 10Njia ohwiingiya abaandu ababamenyamo, esyaalo sya Yisiraeli syoosi. Ebiko byahabeemo abaandu, haandi buli abuundu yali niyeehola ekuunda, achia ohwoombahwa buyaaha. 11Njia ohumeeda obuungi bw'abaandu balimo neende obw'esolo. Abaandu bahabe abaangi muno ohuhiraho abalimo hale, haandi baheebule abaana baangi muno. Njia ohubahola mube esyaalo simenywamo, ohuhiraho koti lu mwali hale. Ao niwo yimwahamanyire muti, Niise Omwaami. 12Eee, njia ohuleha abaandu baange Abaisiraeli babamenyemo, mani mube esyaalo syaabwe abeene, mani bachia ohubamenyamo, haba sibaheete abaana baabwe haandi daawe. 13Omwaami Nasaae aboola ati: Olwohuba abaandu bahuboolera bati, ‘Ewe Yisiraeli, oli esyaalo esiita abaandu basyo, mani nisifwiirwa abaana basyo.’ 14Nae bulaanu ohutula buti, haba soocha ohwiita abaandu daawe, oba ofwiirwe abaana bomu syaalo syao. Nilwo lu Omwaami Nasaae aboola. 15Haandi soochia ohuwulira ebyaalo biindi nibihudyaabuhira, oba abaandu nibahunyeka; haandi soochia ohufwiirwa abaana bomu syaalo syao. Ese Omwaami Nasaae, Niise olomaloome.”

Obulamu bwa Yisiraeli buyaaha

16Omwaami haandi yalomaloma naange, n'aboola ati: 17“Ewe omwaana w'omuundu, Abaisiraeli nibaali mu syaalo syaabwe, basinyaasa muno mu ngeri yibeyiriramo, neende mu biholwa byaabwe. Engeri yibeyiramo ndayibona niyiri embi muno koti ebicheere bi muhasi yehoonyeere naali mu ndaalo chae chomu mwoosi. 18Mani sakira ndabamaliraho etima lyaange, hulw'obutemo bu bali nibaholere mu syaalo esyo, haandi bali nibasinyaasire hulw'ohwiinamira ebiindu ebiloongaloongwe. 19Ndabaheengera omusaango ohweema hu ngeri yibali nibeyiramo, neende olw'ebiholwa byaabwe; mani nimbasalaania mu byaalo biingi. 20Nae mu buli syaalo sibachichaangamo, bachalaasaanga eliita lyaange lyoolerefu, olwohuba abaandu babalomalomaangaho nibaboola bati, ‘Bano nibo abaandu b'Omwaami, nae bone, batulire mu syaalo syae.’ 21Nae ndachuunirwa eliita lyaange lyoolerefu, li Abaisiraeli bali nibachalaasire mu byaalo bi beechamo.

22“Bulaanu boolera Abaisiraeli oti, Omwaami Nasaae aboola ati: ‘Esiindu siinjia ohuhola, haba siinjia husihola hulweeng'we, nae njia ohusihola hulw'eliita lyaange lyoolerefu, li mwachalaasa mu byaalo bi mweechamo. 23Njia ohweekesa ebyaalo eliita lyaange ly'oluyaali koti liri elyoolerefu, eliita li eng'we mwachalaasa mu byaalo ebyo. Ebyaalo byahamanye biti, Niise Omwaami. Ese Omwaami Nasaae, Niise olomaloome. Ebiindu bi njia ohubaholera, byaheekese biti ndi omwoolerefu. 24Njia ohubabuusa alala nimbatusa mu byaalo byoosi, mbakobose mu syaalo syeeng'we syeene. 25Njia ohubaanyusiraho amaachi, mani mbalabye mbatuseho obuchaafu bwoosi, neende ohwiinamira ebiloongaloongwe. 26#Esek 11:19,20.Njia ohubaberesa omwooyo muyaaha, haandi mbateemo ebibaaso biyaaha. Njia ohubatusamo omwooyo kweeng'we mwoomu okwo okuli koti ekina, mani mbaberese omwooyo mudotoo-doto haandi okuwulira. 27Njia ohubaberesa omwooyo kwaange, haandi ndeebeyo muno ohubona koti lu mudiira amalako kaange koosi, haandi nimuhola ebyo byoosi bi mbalagira. 28Mwamenyeenge mu syaalo si ndaberesa bakuuka yeeng'we. Muchia ohubeechaanga abaandu baange, haandi syesi mbeecheenge Nasaae weeng'we. 29Njia ohubanunula mu buli siindu sikera nimutaba aboolerefu. Njia ohukera mube neende engaano nyiingi muno, enjala haba siyahabalumeho haandi. 30Njia ohumeeda ebyaamo byohu misaala kyeeng'we, mani bibe ebiingi, muhayeenge ohuba neende enjala eyakera ebyaalo biindi byabalekeeresa. 31Ao niwo yi mwaheechulisire ebiima byeeng'we bibi neende ebiholwa byeeng'we bibi, mani mwesyuule hulw'ebyonoono byeeng'we neende eby'emisiro bi mwahola byoosi. 32Eng'we Abaisiraeli, ndaha mumanye muti esyo haba siinjia ohusihola hulweeng'we. Ndaha esoni chibadiire haandi mweewunamire, hulw'ebyonoono bi mwahola.’ Ese Omwaami Nasaae, Niise olomaloome.”

33Omwaami Nasaae aboola ati: “Hu ludaalo lu ndahabalabye, ndabatusaho ebyonoono byeeng'we boosi, ndahabalehe mumenya mu biko byeeng'we haandi, mwoombaha buyaaha buli abuundu yali niyeeholere ekuunda. 34Buli muundu yabitaanga mu ndalo cheeng'we, yabonaanga koti lu chali nichisihire, nae bulaanu njia ohubaleha muchaake ohuchirima. 35Abaandu bahaboole bati, ‘Bone, esyaalo sino syali nisileherwe ao sityo, bulaanu syeholere koti endalo y'Edeni; haandi ebiko byali nibileherwe nibyasiha nibiri amakuunda, bulaanu byoombaahweho olukaka, haandi abaandu babimenyeremo.’ 36Ao niwo yi baandu bomu byaalo bibebodohaanie abahabe nibadoong'ereo, bahamanyire bati, Niise Omwaami, Niise owombaahe buyaaha buli abuundu yali n'afunaakwe, haandi ndataaka buyaaha endalo chali nichalehwa nichasiha. Ese Omwaami, nomanoome, haandi njia ohusyooseresa abweene.”

37Omwaami Nasaae aboola ati; “Njia haandi ohulehaanga Abaisiraeli baasabeenge mbeeho neende esy'ohubaholera; haandi njia ohuleha Abaisiraeli bemeede ohuba abaangi koti eyiicho ly'ebyaayo. 38Ebiko byali nibyalehwa nibyasiha nibiri koti ekuunda, byahechulemo abaandu, koti lu Yerusalemu syali nisyeechulamo ebyaayo by'ohuyaana hu bidyaalo hu ndaalo huluundu chalagirwa. Ao niwo yibahamanyire bati, Niise Omwaami.”

Currently Selected:

Esekeeli 36: SAMIA

Highlight

Copy

Compare