Esekeeli 35

Nasaae asaandya Edomu

1 # Yis 34:5-17; 63:1-6; Yer 49:7-22; Esek 25:12-14; Amos 1:11,12; Oba 1:1-14; Mal 1:2-5. Omwaami yalomaloma naange, n'aboola ati: 2“Ewe omwaana w'omuundu, tingaala hu lugulu lwa Seyiri, olaangirire ebidiira hu masira kahalwooleho. 3Boolera abaandu oti, Omwaami Nasaae aboola ati: ‘Bona, ewe olugulu lwa Seyiri, ndi omusuku wao. Njia ohukolola omuhono kwaange mani hulwaanie. Njia ohuhuhola osihe obe ekuunda. 4Njia ohuleha ebiko byao bisihe byeehole amakuunda. Ao niwo yiwahamanyire oti, Niise Omwaami. 5Olwohuba wadiirira Abaisiraeli ehiinda litawa daawe, mani n'obaleha nibeeterwa mu biita, mu biha byaabwe bidinyu, ebiha bi basaandiramo muno hulw'ebyonoono byaabwe. 6Bulaanu nyomiisa endi, koti lu Ese Omwaami Nasaae ndi omulamu, njia ohubatakahera ohwiitwa, mani haba simuchia ohuwona daawe. Olwohuba koti lu mudaha muno ohwiita abasyeeng'we, mani sakira mwesi muchia ohwiitwa. 7Njia ohuhola olugulu lwa Seyiri lusihe lube ekuunda. Njia ohwiita abaandu balubitaho nibachia oba nibakobola. 8Njia ohwiichusa hu ngulu chao emilaambo ky'abaandu beeterwa mu biita. Abaandu beeterwa mu biita baheechuse ebigulu byao, neende ehooho kao, neende emyaalo kyao kyoosi. 9Ndahahuhole obe ekuunda endaalo choosi, haandi ebiko byao haba sibyahamenyemo abaandu daawe. Ao niwo yimwahamanyire muti, Niise Omwaami.

10“Olwohuba waboola oti, ‘Ebyaalo ebyo byoombi, Yisiraeli neende Ebuyudaaya, byahabe ebyaange, mani hwaabituke,’ kata ayahaba mbwe Omwaami niye obirimo. 11Mani sakira, Ese Omwaami Nasaae nyomiisa endi, koti lu ndi omulamu, njia ohuhwetuunga, hulw'etima lyao neende ehiinda yao neende ehiinda yooli nayo eyiri abaandu baange. Haandi bahamanye bati husaandya ohweema hu ebyo byoosi bi wabahola. 12Wahamanye oti Ese Omwaami, ndawulira ebiindu bi walomaloma niwuundekeresa; waboola oti, ‘Engulu cha Yisiraeli cheeholere amakuunda, haandi bachitubereese ohuchimalao.’ 13Haandi mbuliire emboosi chi mumeedereho ohunomanomaho nimuundeniinisiraho.” 14Omwaami Nasaae aboola ati: “Njia ohuhuhola ekuunda, mani esyaalo syoosi sisaangaale. 15Koti lu wesi wasaangaala esyaalo sya Yisiraeli nisyeholere ekuunda. Olugulu lwa Seyiri, neende esyaalo sya Edomu yi syaakiriire, syahabe ekuunda. Nilwo lu bahamanyire bati, Niise Omwaami.”

Currently Selected:

Esekeeli 35: SAMIA

Highlight

Copy

Compare