Esekeeli 16

Yerusalemu esiko sitaali esyeesikwa

1Haandi Omwaami yamboolera ati: 2“Ewe omwaana w'omuundu, yekesa Yerusalemu eby'emisiro bi sihola, 3mani osiboolere oti, ‘Omwaami Nasaae ahuboolere ewe Yerusalemu otula haandi oli omwiibulanwa womu syaalo sy'Abakanani. Laatao yali Omuamoori, haandi maakoo yali Omuhiiti. 4Nae niweebulwa, haba sibahuheengaho olulira, haandi haba sibahwooka neende amaachi waalaba. Haba sibahubahaho omuunyu, noomba ohuhubwiihaho engubo. 5Abulao omuundu yahukwiira esisa mani yahuholeraho kata esiindu silala hweebyo. Hu ludaalo lu webulirwaho, abulao omuundu owahudahaho daawe. Wasukunwa sa erwaanyi hu lwaanyi.

6“Nae Ese nindali nimbitao, ndahubona niwefuufula mu mabaanga kao. Nae niwali n'osisiiri mu mabaanga ako, ndahuboolera endi, ‘Haba siinjia ohuhuleha ofwe, ba omulamu. 7Ndahuliinda yaahula koti esimera syomu siino.’ Wahula waaleeya niweehola omuhaana muhuluundu, omunyirifu muno. Wechaho embeere hu sirifu, haandi waahusa efwiiri, ao nae wali syeekenye, n'obula siwefwaalire kata nabudiidi. 8“Haandi nindali niimbitao, ndahutingaala, mani bona, wali woolere ebiha by'ohusererwa, ndahubwiihaho engubo yaange, ohaye ohudoong'a syeekenye. Eee, ndahuserera, ndawulirisania naawe endi hwahadeehisanie, mani waaba owaange.” Nilwo lu Omwaami Nasaae w'Obunyala aboola.

9“Ndahwooka neende amaachi, ndahwoosa ndahutusaho amabaanga, haandi ndahubaha amafuta. 10Ndahufwaasa engubo chasonwa bulai, haandi ndahufwaasa ebiraato by'amaseero kahiramo obulai, ndahufwaasa engubo chihiramo ebbeyi, nihuboyaho esitaambaya sihiramo obulai. 11Ndahusyaaho ebiindu bilai, ndahufwaasa ebikomo hu mahono kao, neende olunyolo muukosi mwao. 12Haandi ndahuberesa engila yohu lyoolu, neende ebitaadi byoohu matwi, neende ekofia y'obutuki ndai yohumutwe. 13Ndahusyaaya neende ebbaangili ch'esaabbu neende ech'efeesa. Ebyefwaalo byao byali eby'engubo chihiriramo elalira obulai. Ebyohulya byao byali ebilai muno, omwali obuuhi bw'enjuhi neende amafuta k'omuseituuni. Ao mani nolyooyera elalira, noong'iya muno koti omutuki muhasi. 14Mani noofumira elalira mu byaalo byoosi olwohuba efwaana yao yali endai muno, niyibitiriire obulai ohweema hu biindu bi ndali nihuholereho.” Nilwo lu Omwaami Nasaae aboola.

15“Nae ewe niweesika obulai bwao neende efuma yao, wahola obucheke, nookonwa neende buli muundu yeesi owabitaangao. 16Wabukula hu ngubo chao, mani n'ochaala buli abuundu wao wohwiinamiramo, mani nooholeraho obucheke bwao mu ngeri yitaaba hoo daawe, haandi eyitahabe hoo daawe. Weenamira ebiloongaloongwe. 17Wabukula ebiindu bilai byaange eby'esaabbu bi ndahuberesa ebikera n'oboneha bulai, mani wabiholamo ebifwaanani by'abasaacha, wabiinamira, mani waahola obucheke nabyo. 18Wabukula engubo ndai chindahuberesa, wabwiiha hu bifwaanani ebyo, mani wabiyaanira amafuta kaange neende obubbaani bwaange. 19Ebyohulya bi ndahuberesa: obusye bunyuhe bulai muno neende amafuta neende obuuhi bw'enjuhi, wabibukula obiyaanaanga bibe ebiyaanwa biwunyira ebifwaanani ebyo esing'aari.” Nilwo lu Omwaami Nasaae aboola.

20“Haandi wabukula abaana bao basyaani neende abahaana, bandeebula naawe, waabayaana koti esiyaanwa sisaambwa eyiri ebifwaanani ebyo. Obaasa oti obutaali obweesikwa bwao obwo budiidi nibwo? 21Hwoomale omeedeho neende ohwiita abaana baange n'obayaanayo koti ebiyaanwa bisaambwa eyiri ebifwaanani ebyo? 22Mani mu huhola eby'omusiro neende eby'obucheke bwao ebyo byoosi, haba siwechulisaho endaalo cho buyere bwao, koti lu wali esyeekenye, nisibulao esiindu siwebwiihire, haandi niwefuufula mu mabaanga kao.”

Obulamu bwa Yerusalemu bw'obucheke

23Omwaami Nasaae aboola ati: “Chihwaakaanire, Chihwaakaanire! Niwamala ohwonoona ebyo byoosi, 24wameedaho ohweyoombahira hu ndulo hwa buli ngira ebituundu bikali eby'ohwiinamiramo ebiloongaloongwe, neende ohuholeramo obucheke. 25Hu buli ngira, woombahaho abuundu w'ohuholeramo obucheke bwao, mani niweekesera omwo obulai bwao, niweyaanayo eyiri buli muundu obita, mani niwemeeda muno ohuba omucheke. 26Wahola obucheke neende Abamisiri, abaasyo bali neende amaofu maangi muno k'ohuhola obucheke; mani niwemeeda ohuhola obucheke bwao nibiinyaambya etima.

27“Mani sakira, bona, ngoloole omuhono kwaange ohuhusaandya, haandi hendeesere omukabo kwao, ndahuleha mu bunyala bw'Abafilisiti, abasuku bao bahuhole koti lu badaha, abo abadiirwa esoni ohweema hu biholwa byao by'obucheke.

28“Wahola obucheke neende Abasiria bosi, olwohuba ewe haba soonyala ohwiikuta daawe. Mubwadyeeri bweene oholere nabo obucheke, nae kata neende abo bosi soonyalire ohwiikuta daawe. 29Wemeedere ohuhola obucheke bwao neende Abakalidaaya bosi, esyaalo sy'abachurusi, mani waadoong'a n'osyekoomba.”

30Omwaami Nasaae aboola ati: “Omwooyo kwao mucheke muno, ohubona oti wahola ebiindu ebyo byoosi, ebiindu bi muhasi mucheke obula esoni anyala ohuhola. 31Olwohuba woombaha hu buli ngira hoongo abuundu wohwiinamiramo ebiloongaloongwe, mani oholeremo obucheke. Nae haba sookoonya eseende koti lu bahasi bacheke beekusa baandi baholaanga. 32Omuhasi mucheke, aleha ohudaha wamwe, mani yaahola obucheke neende omusaacha wuundi. 33Abasaacha nibo ababeresaanga abahasi bacheke ebiyaanwa hu bakona nabo; nae ewe, niiwe obereese abasaacha bahudaha ebiyaanwa, noobakulirira hulw'obucheke bwao beeche yooli nibatula hu buli lwaande. 34Ewe okabuhaane neende abahasi bacheke baandi. Olwohuba abulao owahuyiika ohuhola nae obucheke, nae ewe okuliiriraanga abasaacha ba ohola nabo obucheke, nae haba sinibo abahutuunga, mani sakira oli omucheke okabuhaane neende abaandi.”

Nasaae aheengera Yerusalemu omusaango

35Bulaanu ewe Yerusalemu omucheke, wulira bi Omwaami aboola. 36Omwaami Nasaae aboola ati; “Olwohuba wefwaalulamo engubo, waadoong'a syeekenye, weyaanayo eyiri abo abahudaha, ebiloongaloongwe byao byoosi bi wiinamira haandi bi oyaanira abaana bao. 37Mani sakira, bona, njia ohubuusa alala abaandu bawadaha boosi, ba wasaangaalira alala nabo, alala neende abo boosi ba wasyuula. Njia ohuhufwaalulamo engubo chao mani babone esyeekenye syao syoosi. 38Njia ohuhuheengera omusaango okuli nasilala neende okw'omuhasi olobere neende omwiiti, mani mu tima lyaange, huheengere omusaango kw'ohufwa. 39Njia ohuhudiisa mu mahono k'abadya bao, mani bahalikule enyuumba chao ndai, haandi bafunake-funake ebituundu byao by'ohwiinamiramo ebiloongaloongwe. Bahahufwaalulemo engubo chao, mani bayaaye ebiindu bilai bi wesaara ebyo, bahulehe nooli syeekenye haandi nooli ebihaya.

40“Bachia ohuleeta esidiiyiha sy'abaandu sihulwaanie, mani bahuhuye amakina bahutemaa-tememo neende engaanga chaabwe. 41Bahasaambe enyuumba chao neende omuliro mani bahuheengere omusaango mu moni wa bahasi baangi. Njia ohuhwaakamya ohuba omucheke, mani waakamire ao ohutuungaanga abasaacha ba ohola nabo obucheke. 42Ao mani njia ohuhumaliraho etima lyaange yooli. Mani nyenjeere, haye haandi ohunyoolera naawe. 43Olwohuba webirira ebiindu bi ndahuholera n'osisiiri omuyere, nae niwunyoolesa neende ebiindu bino byoosi. Mani sakira, bona, njia ohuhwoolobya. Wameeda eby'omusiro bi wahola hu huhola eby'obucheke.” Nilwo lu Omwaami Nasaae w'obunyala aboola.

Omwaana muhaana yeyira koti ng'ina

44Omwaami aboola ati: “Bone Yerusalemu, buli muundu alihukaadaho olukaado luboola luti: ‘Omuhaana neende ng'ina bali nasilala.’ 45Mubwadyeeri bweene, oli omuhaana wa maakoo, owaheehera wamwe neende abaana bae. Haandi oli koti bamwaanaamao, abaheehera bawamwe neende abaana baabwe. Mao yali Omuhiiti nae laatao naaba Omuamoori. 46Mwaanamao muhuluundu, owamenya emukulu wao neende abaana bae bahaana, niye Samaria. Nae mwaanaamao muyere, owamenya emwaalo wao neende abaana bae bahaana, niye Sodomu. 47Nae haba sisyahwiikusa ohuba nasilala nabo, oba ohuhola eby'omusiro nochaanakana neende ebiholwa byaabwe. Nae mu biha bidiidi muno, mu buli siindu, niiwe owahiramo ohuhola bubi.

48Omwaami Nasaae aboola ati: “Ndeechuba endi koti lu ndi omulamu, mwaanaamao Sodomu, neende abaana bae bahaana haba sibaahola koti ewe neende abaana bahaana bao bi muholere. 49Bone, sino nisyo esyonoono sya mwaanaamao Sodomu: syali esyonoono syohwehuduumbasa, olwohuba bali neende ebyohulya biingi, haandi baaba neende obulamu bulai, nae haba sibadeeba daawe hu bamanani neende abo abali muhudeebanaho. 50Bali abeehuduumbasa haandi ab'esyeejo, mani nibahola ebiindu by'omusiro mu moni waange, mani sakira ndabasihirisa nimbweene ebyo.

51“Nae Samaria haba sisyahola kata silala syohubiri esy'ebyonoono byao. Oholere eby'omusiro biingi ohuhira bi bali nibaholere. Eby'emisiro byoosi bi wahola nibikeraniiswa neende ebya bamwaanamaao, abo baboneha koti ohuba abaluungifu abataali neende omusaango. 52Mani bulaanu ochia ohugumira esoni chao. Ebiholwa byao by'omusiro bibi muno ohuhira ebya bamwaanamaao. Baluungifu muno ohuhira ewe. Mani leha esoni chihudiire, olwohuba wekeese oti bamwaanamaao baluungifu muno ohuhuhira.”

Sodomu neende Samaria byahakobosweo buyaaha

53Omwaami yaboolera Yerusalemu ati: “Ndahakoboseo ehabi ch'abaandu ba Sodomu neende ehabi ch'abaandu ba Samaria. Mani wesi njia ohuhukobosera ehabi chao alala nabo. 54Esoni chichia ohuhudiira mani wemwaayemwaaye hulw'ebiindu byoosi bi wahola ebyeekesa biti bamwaanamaao bali abaluungifu muno ohira ewe. 55Nae bamwaanamaao, Sodomu neende Samaria alala neende abaana baabwe bahaana bachia ohukoboswa babe koti lu babeechaanga hale. 56Olwohuba walomalomaanga hu mwaanaamao Sodomu n'omulekeeresa mu biha bi wehuduumbasiraangamo, 57ebyonoono byao nibisisiiri ohumanyihana. Nae bulaanu oli sa koti Sodomu. Abaedomu neende Abafilisiti, neende abaandu baandi bahwebodohaanie boosi bahulekeeresa. 58Mani sakira ohoyere ohusaandisibwa hulw'ebiindu by'esoni neende eby'emisiro bi wahola.” Nilwo lu Omwaami aboola.

Endagaano y'endaalo choosi

59Eee, Omwaami Nasaae aboola ati: “Njia ohuhuyira koti lu ohoyera, ohulekeeresa esyo siweyama ohuhola, mani noofunaka endagaano. 60Nae Ese njia ohuliinda endagaano li ndahola naawe n'osisiiri omuyere, mani njia ohuhola naawe endagaano y'endaalo choosi. 61Nindahahukobosere bamwaanamaao boombi, omuhuluundu neende omuyere, mani huberese babe koti abaana bao bahaana, ao esoni chahahudiire niwiichulisa ebiindu bibi bi wahola. Nae esyo haba sisyaheeme hu ndagaano yi ndahola naawe. 62Njia ohuhola endagaano yaange naawe, mani wahamanye oti Niise Omwaami. 63Njia ohuhulehera ebyonoono byoosi bi wahola, olwo mani obiichulise esoni chihudiire, bihuhae kata esy'ohulomaloma, hulw'ohwemwaayamwaaya.” Nilwo lu Omwaami Nasaae aboola.

Currently Selected:

Esekeeli 16: SAMIA

Highlight

Copy

Compare