Abaefeso 4
4
Obulala bw'omubiri
1Mani sakira ese omuboye hulw'Omwaami, mbekweeda ohumenya obulamu buchaana neende ohulaangwa hu mwalaangwa, 2#Kol 3:12,13. obw'ohweyisa aasi koti lu bihoyera, neende obuloonga, neende obwesimiirisi, neende ohwesimiirisiraanga abasyeeng'we mu buheeri, 3abali neende amaofu k'ohuliinda obulala bwa Mwooyo muhukeendera mu muleembe. 4Kuliwo omubiri mulala neende Mwooyo mulala, koti lu mwalaangwa ohuba neende esuubi lala elichaana neende ohulaangwa hweeng'we. 5Omwaami mulala, efukiirira ndala, ohubatiisibwa hulala. 6Nasaae mulala haandi Seefwe fweesi, oli aakulu wa byoosi haandi obitira mu byoosi, haandi oli mu byoosi. 7Nae embabaasi chabereswa buli mulala hweefwe ohukeraania neende esikero, sy'esiyaanwa sya Kristo syaaba nasyo. 8#Sab 68:18. Mani sakira silomalomwaanga siti,
“Ni yaniina aakulu yali niyemiriire obuungi bw'abawaambe,
haandi yaberesaanga abaandu ebiyaanwa.”
9(Mu huboola ati, “Yaniina,” siba syeekesa siina syeene, ataali mbwe yeeha aasi w'esyaalo bweene? 10Mani oyo oweeha niye omweene oyo haandi owaniina aakulu muno ohubita neende ekulu, hwaanyale ohwiichusa ebiindu byoosi.) 11Niye yi biyaanwa byae byali biti abaandu baandi banyale ohuba abatume, abaandi abanabbi, abaandi abayaali, abaandi abaayi neende abeekesa, 12ohuberesaanga abaandu ba Nasaae ebiindu bihoyera omulimo kw'obuhalaabani, hu banyalirwe ohwoombaha omubiri kwa Kristo, 13ohwoola lu fweesi hunyoola obulala bw'efukiirira neende obw'ohumanya Omwaana wa Nasaae, ohwoola hu bwaangafu bweene, ohwoola hu sikero sy'emera ya Kristo mu bwiichufu; 14hu bulaanu efwe huhaye ohudoong'a nihusisiiri abayere, nihusuubwa era neende eno haandi nihuyuuywa neende buli miyaka ch'enjekesa chikabuhaane, ohutula hu baandu babachirisi, ohweema hu bukodyo bw'engano chaabwe. 15Ohumalaho ohulomalomaanga obwadyeeri mu buheeri, hunyale ohuhulira mu buli ngira yoosi, mu mweene oyo oli omutwe, mu Kristo, 16#Kol 2:19. yi mubiri kwoosi, kweyambaaniaho haandi kweediiraho alala, mu buli nyiingo, yikwabereswa, buli situundu nisihola bulai, sikera omubiri kuhula, haandi kweyoombaha mu buheeri.
Obulamu buyaaha mu Kristo
17Bulaanu sino syomiisa haandi ndaasitusira obuloli mu Omwaami endi, eng'we simuhoyere haandi ohuchiiririra nimumenya koti Abateende bamenyaanga, mu buhyaamu bw'ebibaaso byaabwe; 18ohumanya hwaabwe hwamaliyisibwa, bakabuhana neende obulamu bwa Nasaae olwobutamanya bubalimo, obweema hu bwaangalafu bw'emyooyo kyaabwe; 19bamala ohweehola ebitahoyera haandi baamala ohwewerayo elalira mu obwekoombi, batolyoohera ohuhola buli ngeri y'ebihole by'omufuto. 20Mani sino nisyo simweeka ohutula hu Kristo! 21nimbaasa endi, mwamala ohuwulira akamudiiraho, haandi endi mweekeserwa mu mweene oyo, koti lu bwadyeeri buli Yesu. 22#Kol 3:9. Mwefwaalulemo obulamu bweeng'we buhale, obuchiana neende ebiima by'obulamu bweeng'we buhale, obwamala ohubiiyira mu bwekoombi budoondobanu, 23mani mukaluuhanisibwe mube abayaaha mu myooyo ky'ebibaaso byeeng'we, 24#Kol 3:10; Huc 1:26. mani mwefwaale obulamu buyaaha, obwaloongwa obufwanana neende Nasaae, mu buluungifu bwadyeeri neende obwoolerefu.
25 #
Sak 8:16. Mani sakira, muhwetusaho obwebachirisi, lehe buli muundu yeesi alomalomeenge obwadyeeri neende owaasye, olwohuba fweesi huli esiindu silala mu Kristo. 26#Sab 4:4. Beecheenge neende etima nae mutonoonaanga; mutalehaanga elyuuba likwa nimusisiiri neende etima, 27hu muhayeenge ohuberesa Sitaani obweyaango bwosi. 28Lehe omwiibi yeesi ahaye ohuchiiririra ohwiiba, nae leha ahole emirimo, naahola omulimo kw'obwadyeeri neende amahono kae omweene, hu yeemeo anyale ohukabaho abo abali neende obumanani. 29Mumanyaanga emboosi mbi chitulaho mu minwa kyeeng'we, ohutusaho echiri endai, echiusa, echihoonya, haandi echoombaha abachiwulira. 30Haandi mutanyoolesaanga Mwooyo Mwoolerefu wa Nasaae, yi mwaliindirwamo ohwoola hu ludaalo lw'ohununulirwaho. 31Mulehe obululu bwoosi neende obwaalaba neende etima neende ohwekanyiirisa, neende obumoonyi, bituswe mweeng'we, alala neende ehiinda yoosi, 32#Kol 3:13. mani buli muundu akwireenge sa owaasye esisa, neende omwooyo mudotoo-doto, buli muundu naleheraangamo owaasye, koti lu Nasaae ohubitira mu Kristo yabaleheramo.
©Bible Society of Kenya, 2019
©Bible Society of Uganda, 2019