Abaefeso 3
3
Omulimo ku Paulo yahola mu Bateende
1Mani hulw'esifune sino, ese Paulo, omuboye wa Kristo Yesu hulweeng'we abateende 2nimbaasa endi mwamala ohuwulira hu buliindi bw'embabaasi cha Nasaae, chi ndaberesebwa hulweeng'we, 3koti lu syaama syambuulirwa ohubitira muhuboneherwa, koti lu nyandiikire mu bwiimbikiti. 4#Kol 1:26,27. Nimusoma sino, muchia ohumanya esibaaso syaange, esidiira hu syaama sino esya Kristo. 5Esitabuulirwa abaandu boosi, mu njibulo chiindi echabita koti lu bulaanu simalire ohubwiihulirwa omutume wae mwoolerefu wuno, neende abanabbi ohubitira mu Mwooyo. 6Esyaama siri mbwe, koti lu Bateende bosi bali abasiha, abaandu b'ohumubiri mulala, haandi abakabani bohu sisuubise ohubitira mu Kristo Yesu, haandi ohubitira mu Mboosi Ndai.
7Emboosi Ndai yino, ese ndaholwa ohuba omuhalaabani wayo, ohweema hu siyaanwa sy'embabaasi cha Nasaae, si ndabereswa ohubitira mu buhalaabani bw'amaani kae. 8Ese naange, kata neende lu ndi omudiidi ohira mu boolerefu boosi, ndabereswa embabaasi chino, hu nyale ohuchia ohuyaalira Abateende engaanga yitanyoolehanaanga eyiri mu Kristo, 9haandi neende ohuchia ohuhola abaandu boosi banyale ohubona endekeha koti lu yiri ey'esyaama syali syakisibwa mu Nasaae waloonga ebiindu byoosi, hulw'endaalo nyiingi. 10Ohubitira mu mukaanda kw'abafukiiriri, amakesi maangi kakabuhaane aka Nasaae, kanyale bulaanu ohwekeswa kaamanyihana eyiri obunyala neende amaani Muukulu. 11Sino syeema hu ndekeha yitaakama ya Nasaae yi yoseresera mu Kristo Yesu Omwaami weefwe, 12yi hulimo neende obusimbiifu neende obweesikwa ohusuda eyiri Nasaae ohubitira mu fukiirira mu Kristo. 13Sakira ndi ohubasaba endi mutawaamo omwooyo ohubona koti lu ndi ohubanyaahanira, esyahabeere esy'oluyaali yi muli.
Obuheeri bwa Kristo
14Hulw'esifune sino, sakira hubba aasi amahuumbo kaange mu moni wa Seefwe, 15otulaho eliita lya buli lwaanyi oluli Muukulu oba hu syaalo, 16hu mbwe, ohweema hu buungi bw'oluyaali lwae, anyale ohubaberesa obunyala bw'ohwomiiswa neende amaani mahoongo ohubitira mu Mwooyo wae, obuli muukati w'emyooyo kyeeng'we bweene. 17Haandi mbwe, Kristo anyale ohumenya mu myooyo kyeeng'we ohubitira mu fukiirira; mbwe eng'we, nimuba nimumalire ohuwaanda neende ohwomiiswa mu buheeri, 18munyale ohunyoola amaani k'ohufukiirisania neende aboolerefu boosi ohumanya obubaambali neende obulambiifu neende obuleeyi neende obwoloberefu, 19haandi neende ohumanya obuheeri bwa Kristo ohufumaalira amakesi koosi, hu munyale ohwiichuswa neende obwiichufu bwa Nasaae.
20Bulaanu eyiri oyo yi hubitira mu maani kali ohutuholeramo, anyala ohutuholera ebiindu bibitiirifu muno ohuhirira elalira neende ohumusaba oba ohubaasaho, 21oyo abereswe oluyaali mu mikaanda ky'abafukiiriri haandi neende mu Kristo Yesu eyiri enjibulo choosi, ebiha neende ebiha. Amiina.
©Bible Society of Kenya, 2019
©Bible Society of Uganda, 2019