Omuyaali 4
4
1Ao haandi nimbona obutali bwadyeeri obuli mu syaalo. Mani bone, amasika k'abaandu babafwiinyirira, nae abulao omuundu yeesi obalemya omwooyo. Haba sibanyoola obahoonya, olwohuba abo ababafwiinyirira nibo abali mu bunyala. 2Esyo syakera nimbaasa endi, abafu baafwa hale, baliho bilai ohuhira abo abasisiiri abalamu. 3Nae ohiriramo elalira obulai niye oyo osisiiri ohwiibulwa, osisiiri ohubona esibi siholebwa hu syaalo.
4Mani nimbaasa esikera abaandu nibahola emirimo amaani. Bahola batyo olwohuba beekoomba ohuba neende ebilai biri koti ebya basyaabwe. Sino syosi bihaya byeene, siri koti ohwiirusa omuyaka okudiire.
5Omusiru abuumba amahono kae, mani omweene niyeyita enjala.
6Silai ohunyoola esyaaba silala nooli neende omuleembe, ohuhira ohunyoola ebyaaba bibiri n'osaandire haandi nooli koti owiirusa omuyaka okudiire.
7Haandi nimbona ebihaya byeene hu syaalo: 8Aliwo omuundu oli yeeng'ene, otali neende omwaana oba mwanaang'ina, nae adidiihana ataali ohuwuuluhaho daawe, haandi haba siyetuka obuyiinda bwali nabo, mani ahaye ohweteebaho ati, “Mani halaabaniraanga wiina endyo mani ndahaya ohuba neende esangaalo?” Sino syosi bihaya byeene, haandi hwechuunia bwechuunia.
9Abaandu babiri bahira omuundu mulala, olwohuba nibaholera alala, ao baba bahoonyana. 10Olwohuba mulala naakwa aasi, owaasye amuhoonya yamusiingisa. Nae omuundu n'aba yeeng'ene, mani yaakwa aasi, chiba chimwakaanire, olwohuba abulao onyala ohumuhoonya yamusiingisa. 11Mu biha by'emboo, abaandu babiri nibeyalisa alala mu buliri, banyoola obubafu, nae omuundu mulala yeeng'ene, anyala atye ohunyoola obubafu. 12Abaandu babiri banyala ohulwaania omusuku owahayiingiire omuundu mulala naaba n'alwaanire nae, haandi omukoye kuluhirwe neende ebifuundiho bidatu, haba simwaangu kwohuhiriha daawe.
13Omuraaga mumanani haandi omukesi, ahira omutuki mukofu haandi omusiru otadaha ohukerakirwa. 14Omuundu anyala ohwiibulwa naali omumanani oba yatula mu jeela, mani yeehola omutuki. 15Ndabona abaandu boosi abali hu syaalo, alala neende omuraaga wuundi owakobola mu makulu k'omutuki. 16Omutuki anyala ohuba neende abaandu baangi baatuka, nae n'akwiisa omwooyo, abulao omuundu wichulira ebilai bi yahola. Mubwadyeeri bweene, sino syosi bihaya byeene haandi siri koti ohwiirusa omuyaka okudiire.
©Bible Society of Kenya, 2019
©Bible Society of Uganda, 2019