Omuyaali 3
3
Buli siindu siri neende esiha syasyo
1Buli siindu siholehana hu syaalo siri neende ebiha byasyo, haandi buli siholehana siba neende esiha syasyo situufu.
2Esiha syohwiibulirwamo, neende esiha syohufwiiramo;
esiha syohutaaka, neende esiha sy'ohwiiya ebitaakirwe;
3esiha syohwiitiramo, neende esiha syohuwoneseramo;
esiha syohufunakiramo, neende esiha syohwombahiramo;
4esiha syohuliriramo amasika, neende esiha syohucheheramo;
esiha syohubba embuungu, neende esiha syohuhiniramo;
5esiha syohusalaania amakina, neende esiha syohubuusiramo amakina;
esiha syohukwiiramo mu sirifu, neende esiha syohutakwiiramo mu sirifu;
6esiha syokoonyeramo, neende esiha syohukoseramo;
esiha syohuliindiramo esiindu, neende esiha syohusukuniramo esiindu;
7esiha syohutanduliramo, neende esiha syohusoneramo;
esiha syohubuleera, neende esiha syohulomaloma;
8esiha syohuheereramo, neende esiha syohusyuuliramo;
esiha sy'ebita, neende esiha sy'omuleembe.
9Nae ngaanga siina yi muundu anyoola mu biindu bi adidiihanira?
10Ndabona ohudidiihana hu Nasaae yaberesa abaandu ohunyahaniramo. 11Yahola buli siindu, ohwiichia bulai mu siha syasyo. Nasaae yaata mu mwooyo kw'omuundu obwekoombi bw'ohumanya ebyaliwo, neende ebiriwo neende ebyahabeeo, nae naatamuberesa ohumanya bi Nasaae ahola, ohutula muhuchaaka ohwoola hu njakamo. 12Manyire endi sibulao esiindu silai esihira omuundu ohwesangaasa neende ohuhola ebiindu bilai endaalo ch'obulamu bwae choosi. 13Haandi omuundu ohulya neende ohung'wa neende ohusangaalira mu biindu bi yadidiihanira, siba esiyaanwa sya Nasaae. 14Manyire endi buli siindu si Nasaae yahola siyiindira endaalo choosi, haandi sibulao esinyala ohuhusimeedaho, oba ohusiheendesaho. Nasaae yasihola sibe sityo, hu baandu banyale ohumwiisamo oluyaali. 15Esiruwo buti, syaliwo hale, haandi esyahabeeo, syaliwo hale. Mani Nasaae akera ebyali nibibeereo, byakobola ohubaao haandi.
Obutali obwadyeeri buli mu syaalo
16Haandi ndabona endi hu syaalo ohuhabeereho obwadyeeri, huli ebiholwa bibi, mani mu sifwo sy'obuluungifu, huliho obubi. 17Mani nimbaasa mu mwooyo kwaange endi, Nasaae yahaheengere omusaango abaandu abaluungifu neende ababi. Olwohuba buli siindu neende buli siholwa siri neende esiha syasyo. 18Mani nimboola mu mwooyo kwaange endi ebidiira hu baandu endi, Nasaae ali ohuteema abaandu ohubeekesa ati bosi bali koti ebisolo. 19Olwohuba ebikwa hu baandu biri nasilala neende ebyo ebikwa hu bisolo; koti lu muundu afwa, nilwo nasilala koti lu sisolo sifwa. Haandi omuuya ku muundu ayeera, kuli nasilala neende ku solo yiyeera, haandi obulamu bw'omuundu haba sibuhira obw'ebisolo daawe. Olwohuba byoosi bihaya byeene. 20Byoombi, ebisolo neende abaandu byahachie mu sifwo silala, byoosi byatula mu lufu, mu lufu nimwo mu byahakobole haandi. 21Wiina omanyire oba omwooyo kw'omuundu kuniina aakulu, nae okw'ebisolo kwiiha aasi mu loba? 22Mani ndeehaliirisa ndabona endi, esihira obulai nisyo omuundu ohusangaalira mu biindu bi yahola, olwohuba okwo nikwo omukabo kwae. Olwohuba wiina owahamukoboseo ohubona ebyahakweeo n'amalire ohutulao?
©Bible Society of Kenya, 2019
©Bible Society of Uganda, 2019