2 Timoteo 3
3
Endaalo chimaliiriha
1Manya sino oti, ebidinyu bicha ohubaao mu ndaalo chimaliiriha. 2Abaandu bachia ohuba abeemani, ab'okuliira, ab'esuunga, haandi abewulira; abanyekani, abatawulira abeebusi baabwe, abaalaba, abatasiima siindu, haandi abataali neende ediini; 3bachia ohubula esisa, abatalehera, abamoonyi, abaalaba, haandi abalulu; bachia ohuhaya esiindu silai; 4bachia ohuba abekaani, abafwaayo esiindu, abechula esuunga; bachia ohuba abaheera esangaalo ly'ohusyaalo ohuhira Nasaae; 5bachia ohweboya hu biindu byoohumukulu by'efukiirira mu Nasaae, nibahaya ohumanya amaani kalimo keene. Weliinde abaandu bali batyo. 6Abaandi hu beene abo, bachia nibeengira mu mayuumba k'abaandu mani nibafumaalira abahasi bakata, abasidoyerwa neende ebyonoono haandi abafukwa neende obwekoombi bw'engeri chikabuhaane. 7Abo nibo abahasi bateemaho ohweeka, nae haba sibanyala humanya obwadyeeri. 8#Hut 7:11. Koti lu Yanesi neende Yambure bayiingania Musa, nilwo nasilala lu bano bosi bayiingania obwadyeeri abaandu ba bibaaso byaabwe bitahola haandi ba efukiirira yahaya. 9Nae sibachia huchia eyale, olwohuba buli muundu achia ohumanya obusiru bwaabwe, koti lu babona obusiru bwa Yanesi neende Yambure.
Enjekesa yimaliiriha
10Nae ewe wamala ohumanya enjekesa yaange, ebiima byaange, neende esichiiririrwa syaange mu bulamu. Wamala ohwehaliirisa efukiirira yaange, ohwesimiirisa hwaange, obuheeri bwaange neende ohuguma hwaange, 11#Biho 13:14-52; Biho 14:1-7; Biho 14:8-20. ohusaandisibwa hwaange, neende ohusaanda hwaange. Omanyire ebyo byoosi ebyandeeholehanaho ni ndi mu Atiokia, Yikoniamu, neende Lisitira, ohusaandisibwa hw'amaani hundagumira! Nae Omwaami yaamonia mw'ebyo byoosi. 12Mubwadyeeri bweene, buli muundu yeesi odaha ohuba neende obulamu bwoolerefu alala neende Kristo Yesu, bachia ohumusaandya; 13haandi abaandu babi neende abahubbahubbania bachia ohwemeeda mu huhola ebibiyiire elalira, nibabacha abaandi haandi nibebacha abeene. 14Nae ewe, wemeede ohwomiirira hu bwadyeeri bu bahweekesa, haandi bw'ofukiiriramo. Olwohuba omanyire abaandu bahweekesa obwadyeeri obwo, 15haandi wichulisa oti ohutula mubuyere bwao, wali niwamanya ebyandiiko byoolerefu, ebinyala ohuhuberesa amakesi kanyala ohuhwoosa hu buwonia ohubitira muhufukiirira Kristo Yesu. 16Olwohuba ebyandiiko byoolerefu byoosi, Nasaae yabiberesa amaani, mani bihoonya muno mu hweekesa obwadyeeri, ohwoolobya ebidoondobanu, ohukolola ebitaali ebyadyeeri, neende ohweekesa ohumenya obulamu buhoyera, 17hu bulaanu, omuhalaabani wa Nasaae anyale ohuba omumaliirifu, oli neende buli siindu sihoyera ohuhola buli mulimo mulai okwa buli ngeri.
©Bible Society of Kenya, 2019
©Bible Society of Uganda, 2019