2 Timoteo 2
2
Omulwaani mweesikwa wa Kristo Yesu
1Nae ewe, mwaana waange, ba neende amaani ka hwanyoola ohubitira mu mbabaasi cha Kristo Yesu. 2Bukula emboosi chi wawulira ninjekesa mu lwichuule lw'abaandu, mani ochidiise abaandu beesikwa, abacha ohunyala ohweekesa abaandu baandi bosi.
3Nyoola omukabo kwao mu husaanda koti omulwaani wa Kristo Yesu mweesikwa. 4Abulao omulwaani weyingisaanga mu bihole by'abaandu babuli ludaalo olwohuba adaha ohusangaasa omuhoongo wae omuberesa amalako kamutuka. 5Mu ngeri nasilala eyo omwiiruhi okerana embiro saanyala hunyoola esirabo yesi n'ataloonda amalako k'ohwiiruha. 6Omulimi oholere omulimo kw'amaani ahoyera ohunyoola omukabo kutaangira okw'ekesa. 7Baasa hu biindu biindi ohuboolaanga, olwohuba Omwaami achia ohuhuhoonya omanye amahuluundu kabyo byoosi.
8Yichulisa Yesu Kristo yi Nasaae yasyuhisa ohutula mu bafu, owali omwichuhulu wa Daudi. Yino niyo Emboosi Ndai yi njaala. 9Olwohuba njaala Emboosi Ndai sakira bulaanu saanda haandi ndaboywa mu minyororo koti omuundu muhola-mbi muhoongo. Nae Emboosi ya Nasaae haba siyaboyebwa mu minyororo. 10Mani sakira ngumira ebiindu byoosi hulw'obulai bw'abadoole ba Nasaae hu bosi banyale ohunyoola obuwonia buli Kristo Yesu alala neende oluyaali lutaakama.
11Yino nomanoma yadyeeri eyiboola yiti:
Nihwafwa alala nae,
fwesi huchia ohuba abalamu alala nae.
12 #
Mat 10:33; Luk 12:9. Nihuchiiririra ohuguma ohusaanda
fwesi huchia ohutuka alala nae.
Nihumwekaana,
yesi achia ohutwekaana.
13Nihutaba abeesikwa,
adoong'a naali omweesikwa sa
olwohuba saanyala ohwekaana omweene.
Omuhalaabani osiimwa
14Yichulisanga abaandu bao esiindu sino, haandi balabulire elalira mu moni wa Nasaae, oti sibahoyere ohuyiinganira ebidiira hu mboosi sa. Olwohuba abulao obuhoonyi bwoosi bu banyoola ohutusaho binyaasa sa ababiwulira. 15Teemaho koti lu onyala ohusangaasa Nasaae, koti omuhalaabani yi soni chitadiira hulw'omulimo kwae, haandi koti omweekesa weekesa bulai Emboosi ya Nasaae yadyeeri. 16Lehana neende embaha ch'obusiru chitahoonya, olwohuba chiirusira elalira abaandu ohutula hu Nasaae. 17Enjekesa yifwana yityo yiri koti ehwaaku eyichiiririra ohulya enyama. Hamenesi neende Fileeto nibo abasaacha bali ohweekesa enjekesa yino. 18Bano bamala ohuleha engira y'obwadyeeri, nae bulaanu bali ohudoondobania efukiirira y'abafukiiriri baandi nibaboola bati, ohusyuuha hw'abaandu hwamala ohubaao. 19#Hub 16:5. Nae omusiingi kw'amaani ku Nasaae yataawo haba sikunyala hudengaanisibwa; haandi chino nicho emboosi chi bakwandiikaho: “Omwaami amanyire abaandu bae” haandi “Abaandu boosi abelaanga ohuba ab'Omwaami bahoyere ohwakamira elalira ohwonoona.” 20Mu nyuumba hoongo mulimo amabbakuli neende ebiindu by'embya chikabuhaane; ebiindi byaholwa mu feesa, esaabbu, nae ebiindi by'embaao neende eloba; ebiindi byehoonyerwaanga hu miholo mihoongo, nae ebiindi nabyo byehoonyerwa buli ludaalo. 21Omuundu yeesi niyenyirisa yetusaho ebiindu bibi ebyo, achia ohwehoonyerwa bilai, olwohuba aba yaawulibwa mani ali neende obuhoonyi eyiri Omwaami wae, naali omwetekefu ohwehoonyerwa hu mulimo mulai kwoong'ene. 22Lehana neende obwekoombi bw'esiraaga, mani olwaanilire obuluungifu, efukiirira, obuheeri, neende omuleembe, alala neende abo abalaama Omwaami neende omwooyo mulai. 23Nae lehana neende ohuyingana hw'obusiru embaasa yitaalimo obuhoonyi; olwohuba omanyire oti ebiindu ebyo bileeta sa obusoolo. 24Omuhalaabani w'Omwaami haba s'ahoyere ohuba omuundu musoolani. Nae ahoyere ohuba ow'esisa eyiri abaandu boosi, Haandi ahoyere ohuba omuundu onyala ohweekesa bulai naali neende ohwesimiirisa, 25haandi okolola abamuyiingania neende obuloonga. Olwohuba si nyala ohuba siti Nasaae achia ohubaba ehabi y'ohwefunaka mani bamale bafukiirire obwadyeeri. 26Mani ao niwo abacha ohukoboleramo ebibaaso, mani baone omuteego kwa Sitaani okuba nikwabadiira, haandi okuba kwakera nibahola bi Sitaani adaha.
©Bible Society of Kenya, 2019
©Bible Society of Uganda, 2019