2 Ebyomubiha 3
3
1 #
Huc 22:22. Omutuki Daudi, owali laatang'ene Solomooni, yali niyamala ohutekeha abuundu w'ohwoombahira Enyuumba ya Nasaae eyo. Yali mu Yerusalemu, hu Lugulu lwa Moria, abuundu yi Omwaami yabonehera Daudi, abuundu yi Arauna Omuyebbusi yali niyehoonyeraanga koti olwaanyi lw'ohubbakiraangaho engaano. Omutuki Solomooni niye owachaakisa ohwoombaha 2mu mwoosi kw'ohubiri okw'omwaaka kwohune ku yali naali omutuki. 3Enyuumba ya Nasaae yi Mutuki Solomooni yoombaha yali emiita amahumi kabiri neende chitaanu-na-chibiri obuleeyi, neende emiita chitaanu-na-chine obubaambali. 4Esiseenge siri mu mwiingira syali neende obubaambali bwaaka neende obw'enyuumba yoosi, emiita chitaanu-na-chine, haandi neende emiita amahumi kataanu neende chine ohuniina aakulu. Mukati w'esiseenge esyo mwali nimwaomwaho esaabbu ehaya. 5Esiseenge sihuluundu syali nisyaalwaho embaao ch'emituumba, haandi echiwomerweho esaabbu haya, eyasaatwa neende ebifwaanani by'omunaasi neende enyororo. 6Omutuki oyo yatona Enyuumba ya Nasaae eyo neende amakina k'engaanga y'aakulu, haandi neende esaabbu ebyakulwa byaaleetwa ohutula mu syaalo sya Parifaimu. 7Yehoonyeraanga esaabbu ohuwoma hu sida sy'Enyuumba ya Nasaae eyo, hu miguulo, neende hu matakoola, haandi neende hu milyaango. Hu bida, hwasaatwaho abakerubbi. 8#Hut 26:33,34.Esiseenge sy'ematyeelo syeene, esyali nisilaangwa mbwe Abuundu Ahiramo Obwoolerefu, syali emiita chitaanu-na-chine obuleeyi, haandi neende emiita chitaanu-na-chine obubaambali, obwali nibwaakanirira neende obubaambali bw'Enyuumba ya Nasaae eyo. Etaani amahumi kabiri neende chitaanu ech'esaabbu nichio echehoonyerwa ohuwoma hu bida by'Abuundu Ahiramo Obwoolerefu; 9eguraamu emia chitaanu neende amahumi kataanu-na-kabiri (570) ech'esaabbu nichio echehoonyerwa ohuholaanga emisumaari, haandi ebida by'ebiseenge by'aakulu muno byosi byali nibyawomwaho esaabbu.
10 #
Hut 25:18-20. Omutuki wuno haandi yaboola abahalaabani bae betaanya ebifwaanani by'abakerubbi eby'esibya, haandi neende byosi ohubiwomaho esaabbu, mani baamala baabita Abuundu Ahiramo Obwoolerefu. 11Embaya ch'abakerubbi abo chabaambuha chamalaho obweyaango buyera emiita chibiri neende otutoonyese tubiri (2.2): buli lubaya lwabuli siloonge esyo chabaambulwaanga chinyala ohudiiraniraangaho akatikaati w'esiseenge mani haandi chegeeng'a hu sida hu buli lwaande lw'esiseenge esyo: 12Byoosi nibibaambuha nibiyira obweyaango bwaaka neende emiita chitaanu-na-chine. 13Abakerubbi bino byalichiingi nibyeema hu makulu kabyo, nibitingaalire epasya. 14#Hut 26:31.Epasya yahiinga Abuundu Ahiramo Obwoolerefu ao yali niyaholwa mu laasi, haandi alala neende ebiindu binabaanga biindi, ebyali nibyabahwa eraangi ya bbulu, papo, haandi neende ranjaai, niyiriho ebifwaanani by'abakerubbi bira nibyanabirwaho.
Emisiiro kibiri eky'Omugasa
(1 Abat 7:15-22)
15Omutuki yahola emisiiro kibiri kyaaholwa, buli kutula nga kuyera emiita ehumi neende chitaanu neende otutoonyese tutaanu (15.5) ohuniina aakulu, mani nibakita mu moni w'Enyuumba ya Nasaae eyo. Buli kutula kwalichiingiho omuguulo kwoola emiita chibiri neende otutoonyese tubiri (2.2) ohuniina aakulu. 16Aakulu w'emisiiro ekyo bali basaataho ebifwaanani by'eminyororo kibitaanemo neende emoondolo ch'amapamaguranaate ch'omugasa emia ndala (100). 17Emisiiro ekyo kyali nikyatekehana hu buli lwaande lw'omulyaango kw'Enyuumba ya Nasaae eyo: Okwali hu lwaande lw'emwaalo kwalangwa mbwe Yachiini, nae okw'emukulu kwali kwalaangwa mbwe Bboasi.
©Bible Society of Kenya, 2019
©Bible Society of Uganda, 2019