1 Kedinto 6
6
No meygalagal sira o sinjya
1No amyan so ikazyak nyo a vazay no akma nyoy kakteh do cinai am ji nyo mancyan do ji manaralay a mapacicici a tao. Ta to nyo na zavata do akma nyoy kakteh do cinai. 2Manngwa, nyo jyatenngi yaten a italamozong na ni Ama ta do to o mapacici so tao do karawan no makwa? No si inyo eya mapacici so tao eya am manngwa, ji nyo rana zavat o likta a vazay? 3Manngwa, nyo jyatenngi tamo kapacici so tinsi no makwa? Kakwakwan no nang a ney manngo rana o vazay do karawan. 4No akman sang a keyyan no ikazyak nyo am manngwa, ipanci nyo sira o ji manaralay a tao a mangay omzavat sya? 5Tey macimasnek o akman sang. Manngwa, yabwata rana jinyo o yasa ka mapatak a tao a mangay omzavat so ikazyak da no akma tey kakteh do cinai? 6Ikeykongo kamo a yamakalavat so da karatan no kakteh nyo do tangain no ji nganoyong ji Yeso a tao.
7O yongkad no nyo karatan am nyo kapaciraherahet. Ikeykong kamo a yajya todalpid so nakenakem. 8Nyo apyapyahen pa o kalpid nyo sira. So nyo ikakman sang so nakenakem do akma nyoy kakteh do cinai. 9Manngwa, nyo jyatenngi o kaji da macikaopan no makwa do italamozong na ni Ama ta do to no meyraraten a tao an? Ji nyo ngalalasi o kataotao nyo an. Ta o mapeyzavozavoz so tao na, manaralay so malas a iraralay, mangzakza so icyatatao, mangzakza so kehngehngay no kolit, 10manakaw, mangamkam, masakisakin a kano manraherahet so icyatatao a kano amgacigat do tao a tomoro am o akman rana sang a tao am ji sira macikaop do italamozong na ni Ama ta do to no makwa. 11Yamyan jinyo so nimakman so sang no kakwa. Am kanivonas na rana so raraten nyo ni Ama ta do to. So nyo rana ipacikownongan ji Ama ta do to a kabnek na rana ninyo a abo so raraten do tangain na, do kapeyhanhan nyo ni Yeso Kizisto a Panirsirngen ta kano katalamozong na jinyo no Seyzi na ni Ama ta do to.
Azwazwain nyo si Ama ta do to no kataotao nyo
12Ala myan so tao a manci no, “Yabo ko jyapeyvazay a vazay.” Jyalas ori an. Am beken a todamimin o vazay a makarapa do onowned. So ko pancyan no yabo jyapeyvazay a vazay. Am ji ko mamyapyan o asa ka vazay a to mapeylamlamsoy jyaken. 13Amyan so tao a manci no, “O kanen rana am ioran do velek. O cinamaog no velek am kanen.” So ji na alasi nang. Am beken a to meyyonong o yameykadwa ya. O cinamaog ta am beken a pasagpyanen ta o kataotao ta, ta o kararalay ta ni Ama ta do to. So ikanoyong na ni Ama ta do to a mapeyveyveken jyaten. 14Si Ama ta do to o nimapeyvangon si Yeso do heseb na. So icyakman na sang ni Ama ta do to a mangozay do oyowyat na a mapeyvangon jyaten no makwa.
15Nyo jyatenngi o na kaponged no kataotao nyo ni Kizisto? Manngwa, apya kapasagpyan ko so akma ney kataotao ni Kizisto? Tey marahet o akman sang! 16Nyo jyatenngi o karahet no mahakay a mapasagpyan so kataotao na do somagpyan a mavakes? O akman sang a tao am akmey meytovong sira do vahay. Ta maniring do Seysyo am, “Akmey asa rana sira so kataotao o rarwa meytovong do vahay.”#6:16 Tswang Se Ci 2:24. 17Am o macikaop ji Yeso am macilovot o nakenakem na ji Yeso an.
18Am ori o ji nyo pasagpyani so kataotao nyo an. O makakaday a raraten am ji mapeykaraherahet so kataotao. Am o mapasagpyan so kataotao da am peykarehrehten da o kataotao da. 19Nyo jyatenngi o na keyyan jinyo no Seyzi na ni Ama ta do to a nitoro na jinyo? So ikabeken a inyo no kataotao nyo. 20Ta inyo rana am na nipalit inyo no rala na ni Yeso. Am ori o azwazwain nyo si Ama ta do to no kataotao nyo an.
Currently Selected:
1 Kedinto 6: snt
Highlight
Copy
Compare
Share
Want to have your highlights saved across all your devices? Sign up or sign in
The Bible Society in Taiwan
