1 Kedinto 7
7
Vazay no meysinmo a tao
1O ciring nyo do teygami nyo am ko naknakmen o kapyapya pa no kaji mapazagpitan no mahakay. 2Am yana katey yaro no vazay da yamapasagpyan so kataotao da. Am ori o ikapyapya na rana no kapazagpit da no mahakay. Akman sira so sang o mavakes a macivahavahay. 3O mahakay am panadnaden na o kahanghangan na. Akman sang o mavakes na. 4Ta o kataotao no mavakes am italamozong no mahakay na. Akman sang o kataotao na no mahakay na, ta italamozong na no mavakes na. 5Am ori o ji nyo mapasalai do kadwan jinyo an. No nakem no asa jinyo so kapeynozi na am manoyong o kapeytarek nyo so alikey. Am no komavos rana a meynozi am meytovong kamo na meyyaven do vahay. Ta littan na inyo ni Satan do kaji nyo makaparingan so nakem nyo.
6O ciring rana ya am beken a ko ipasonson jinyo. Ta ko ikarilaw inyo. 7Ko ikakza o kakman nyo jyaken a ji nimapazagpit. Am kaji na meyyangangayan no nakenakem do kataotao a nitoro na ni Ama ta do to. Ta myan so tao a akman sang. Amyan so tao a jyakman sang.
8Sicyaikwa rana ya am ko pamizngen sira o ji pa nimeysinmo a tao a kano vao a mavakes a ominara jyaken. Ta apyapya pa o kaveyvow do vahay. 9Am no si ji nyo apzaci o onowned nyo am apyapya o kapazagzagpit nyo. Ta maraherahet o kato na ngyanan do onowned nyo no kakey nyo a macivahavahay.
10So iyan no ciring ko do nimeysinmo rana tao. Ta beken a nakenakem ko ya, ta nakenakem na ni Yeso. O mavakes rana am ji na ngaroi o kahanghangan na mahakay. 11No manoyong kanikomaro na rana am ji rana macivahavahay no ji rana meyoli do kahanghangan na. So icyakman na sang no mahakay, ta ji na to pakarwa o kahanghangan na mavakes.
12Akman sang, ta yamyan so ciring ko do karwan no tao. Am beken a nakenakem na ni Yeso. No myan so manaralay a nimapazagpit rana so ji manaralay a mavakes a kasaray na macitovong jya am apya o akman sang an. So ji na to pakarwi so kahanghangan na mavakes. 13No myan so manaralay a mavakes a nisomeksek rana do ji manaralay a mahakay a kasaray na no mahakay a macitovong jya am ji na to ngaroi o mahakay na. 14Ta o ji manaralay a mahakay a nimapazagpit rana so manaralay a mavakes am masidong na no mavakes na. So ipacyangay na do mavakes na masidong na ni Ama ta do to. So icyakman na sang no nimacivahavahay rana a ji manaralay a mavakes. Ta masidong na no mahakay na. Ta si ji sira akman sang am ji na nidonga ni Ama ta do to o ananak da. So ikanoyong da peypapyahen na ni Ama ta do to. 15Am no karwan da sira o manaralay a kadwan da do vahay am to nyo na macyozai o akman sang. Tana mahakay a tana mavakes am ji nyo na ratan, ta o nipamnekan na jyaten ni Ama ta do to am kakzeben na yaten apiya so nakenakem do kavavahay ta. 16Ta imo rana a yamanaralay a mavakes am ikongo mo ipakateneng do kapakasidong mo so kahanghangan mo a omanoyong ji Yeso. Inyo rana kamahakayan a yamanaralay am ikongo nyo ipakateneng do kapakasidong nyo so kamavakesan nyo a omanoyong ji Yeso.
17Mamimin ta mangozay do nitoro na ni Ama ta do to a ahapan so kataotao ta an. So ji ta mapasalai jya. Ta ori o yako ipangnanao do peycyakyokyokayan na. 18Inyo rana tao do Yotay a niyongkadan rana do kataotao#7:18 Amyongkad do kataotao - Citahen nyo do Panitanitan so jyatenngi a ciring do ney manowji na rana no vakong eya. a manoyong a Isedi a tao a yamraralay rana ni Yeso am cyaha, ji nyo naywa o yongkad nyo. Am inyo rana beken a tao do Yotay a omanoyong rana ji Yeso am tana abo yongkad do kataotao nyo am abneken na inyo a anak na ni Ama ta do to. 19Tana niyongkadan a tana jya niyongkadan am meyyangay. O ney makdeng na am kownot ta ji Ama ta do to. 20So ji ta ngezsangi no kasasaodan ta tao. 21Tana nimeycicinda ka kalamsoyan da no tao no kapanaralay mo am ji mo a ratan. Akman ka sang so nakem no si ji da rana peylamlamsoya imo. 22Ta o lamlamsoy da tao a omanoyong ji Yeso am to naliway rana sira do tangain na ni Ama ta do to. Akman so sang sira o to naliway a tao a omanoyong ji Yeso, ta lamlamsoy na sira ni Yeso Kizisto. 23Inyo rana am yatey rako na nipalitan jinyo ni Ama ta do to. Am ori o ji nyo mamyapyai no tao a tomalamozong ninyo. Ta italamozong na rana inyo ni Ama ta do to. 24Manga kakteh, ji nyo ngezsangan o kasasaodan nyo do tangain na ni Ama ta do to.
Inanao na ni Pawlo so jya nimacivahavahay pa kano vao a mavakes
25Omagaz rana do ji pa nimacivahavahay a tao am abo nimahap ko a nakenakem na ni Yeso Kizisto. Am kanimarilaw na nyaken ni Ama ta do to a meyhanhan nya. So ko pangozayan do kataotao ko a yamapatwaw so ciring ko. 26No ko citahen o alalaw do teyrahem am ko apyapyahen pa kakman ta sya tao a ji macivahavahay. 27No yarana myan jinyo so tao am ji nyo naknakma o kapakaro nyo sya. Am no si abo pa jimo tao am ji mo naknakma keyyan na jimo no tao. 28Am no si ikakza mo o kapazagpit mo am cyaha, ta beken a raraten ori. Am ko apyapyahen pa kaji nyo nginaran sira masanga no meykamadadayan a vazay da do kavavahay da.
29O ko ipanci pa jinyo, manga kakteh am yalikey rana ta yahap so vazay na ni Ama ta do to. Am ori an, inyo rana yamyan so kahanghangan a mavakes am akman kamo rana so kabwan no tao a abo rana so ikasanga a mahap so vazay na ni Ama ta do to. 30Tana meyngen o onowned a tana masaray, tana aro so apzapzatan a tana abo am taosya o kasanga na jinyo no makakaday a vazay a omraralay ni Ama ta do to. 31O nimakataptap rana so kanekanen do karawan am akman sira so ji nitomaham do kanekanen. Ta o karawan eya am makeykai a komavos.
32Ji kamo a rahet so onowned. Ta o mahakay a kabwan no tao am to nangdengi o kanakenakem na so vazay na ni Ama ta do to a ipasaray na sya. 33O manakem da no mahakay a yanan rana no tao am naknakmen da o kapasaray da so mavakes da. 34So ikanoyong da meykarwa rana so nakenakem ji Ama ta do to. O ji nimacivahavahay pa a mavakes am vazay na ni Ama ta do to o manakem da. Ta isaray da kapeykingking da no oyowyat da kano onowned da. O manakem da no nimacivahavahay rana a mavakes am vazay do kavavahay da. Ta naknakmen da o kapasaray da so mahakay da.
35O ko peycirngan sang am ko sidongen inyo. So ko ji mapasonsoni jinyo. Ta ori o ikakdekdeng nyo pa mahap so vazay na ni Ama ta do to a ji mangbeywan jya.
36O nitamtamkan da rana tao a kaji da na ngapan sira am no ji na apzaci no mahakay o onowned na makza no kapapapen na pa am apyapya rana kato na rana mapapenan so yanan na so nakem a mavakes. Ta o akman rana sang am beken a raraten o akman sang. 37Am no myan so tao a jyakza no kapapapen na am to na rana mamneki do onowned na o kapzat na do onowned na. So ikapyapya na rana no kaji na mapapenan. 38Tana ipanci da o kapya no mapapapen am arakorako pa o kapyapya na no kaji mapapenan.
39O nimacivahavahay rana mavakes am ji neksek do tao do iyan na pa no kahanghangan na do karawan. Am no mawakwak rana o mahakay na am apya o kapirwa na pa so kapacivahavahay na. Am ney yapiya na kangay na someksek do manaralay a tao. 40Am no ji na ranakzan o kapacivahavahay na am apyapya rana o akman sang. Ori rana am nakenakem ko ori do kataotao ko. Am ko naknakmen o katalamozong na nyaken no Seyzi na ni Ama ta do to.
Currently Selected:
1 Kedinto 7: snt
Highlight
Copy
Compare
Share
Want to have your highlights saved across all your devices? Sign up or sign in
The Bible Society in Taiwan
