Números 9
9
Pascua raymita ruwana
1Israelitakuna Egiptomanta llojsimusqanku iskay wataña kashajtin, chay wata qallariy killapi, Sinaí ch'innejpi Tata Dios Moiseswan kay jinata parlarqa: 2Israelitakunaqa Pascua raymita mayk'ajchus ruwananku kashan, chay p'unchay ruwananku tiyan. 3Chay p'unchayqa kay killamanta chunka tawayoj p'unchay kashan. Chay p'unchay inti yaykuykuyta kamachisqa kasqanman jina Pascua raymita ruwanqanku, nispa.
4Chantá Moisesqa Pascua raymita ruwanankuta israelitakunata kamacherqa. 5Paykunataj Sinaí ch'innejpi, wata qallariy killapi, chunka tawayoj p'unchay ch'isiyaykuyta Pascua raymita ruwarqanku Tata Dios Moisesman kamachisqanman jina.#Ex 12.1-13.
6Chaywanpis wakin israelitakuna wañusqata llankhasqankurayku mana llimphupaj qhawasqa kasharqanku. Chayrayku paykunaqa chay p'unchaypi mana Pascuata ruwayta aterqankuchu. Jinaqa Moiseswan, chantá Aaronwan ima parlaj rerqanku. 7Chayaspataj, Moisesta nerqanku: Noqaykoqa wañusqata llankharisqaykurayku mana llimphupaj qhawasqa kashayku. Chayraykuchu kunan israelitakunawan khuska Tata Diosman jaywanata jaywayta mana atiykuman? nispa.
8Moisestaj kuticherqa: Suyaychej Tata Dios qankunamanta imatachus ninawanta, nispa.
9Chaymanta Tata Diosqa Moiseswan parlaspa, kay jinata nerqa: 10Israelitakunata ajinata ninki: Ichapis qankunamanta pillapis, chayrí mirayniykichejmanta mayqellanpis runaj ayanta llankhanman, chayrí karupi kashanman, chayrí ñan puriypi kashanman. Ajina kashaspapis, Pascua raymita noqaj sutiypi ruwayta atillanqanku. 11Chaykunaqa iskay kaj killapi, chunka tawayoj p'unchay ch'isiyaykuyta Pascuata ruwachunku. Chay ch'isi cordero aychata jaya qhorayojta, mana levadurayoj t'antatawan ima mikhonqanku. 12Q'ayantinpajqa ama imatapis puchonqankuchu, nitaj corderoj tulluntapis p'akenqankuchu. Pascua raymitaqa noqa kamachisqayman jina ruwanqanku.
13Chaywanpis sitajchus pipis llimphupaj qhawasqa kashaspa, nitaj ñan puriypipis kashaspa, Pascuata mana ruwanmanchu chayqa, Israel ayllu ukhumanta chinkachisqa kachun. Chay kikin p'unchaypi Tata Diosman jaywanata mana jaywasqanrayku, chay runa juchachasqa kanqa.
14Qankuna ukhupi tiyakoj waj llajtayojkunapis imaynatachus kamachisqayman jina Pascuata noqaj sutiypi ruwanallankutaj tiyan. Waj llajtayojkuna, chantá llajtaykichejpi paqarejkuna ima imaynatachus kamachisqayman jina kikinta ruwananku tiyan, nispa.#Ex 12.48-49.
Dioswan Tinkukuna Toldoj patanpi phuyu
(Ex 40.34-38)
15Maypachachus israelitakuna Dioswan Tinkukuna Toldota sayaricherqanku chay p'unchay, phuyu toldota p'ampaykorqa. Chay phuyoqa ch'isiyaymantapacha sut'iyanankama Dioswan Tinkukuna Toldo patapi nina jina k'ancharqa. 16Ajina sapa p'unchay karqa. P'unchayqa Dioswan Tinkukuna Toldota phuyu p'ampaykorqa, tutantaj nina k'anchay jina toldo patapi karqa. 17Dioswan Tinkukuna Toldo patamanta phuyu oqharikojtintaj, israelitakuna purirej kanku. Phuyu sayajtintaj, chaynejpi paykunaqa jarakoj kanku. 18Puririnankuta Tata Dios kamachejtin, purirej kanku. Jarakunankuta kamachejtintaj, jarakoj kanku. Phuyu Dioswan Tinkukuna Toldo patapi kanankamarí, israelitakuna jarakusqankumanta mana kuyurejchu kanku. 19Sichus phuyu Dioswan Tinkukuna Toldo patapi unayta sayaj chayqa, israelitakuna Tata Diosta kasuspa, mana chaymanta purirejchu kanku. 20Sichus phuyu Dioswan Tinkukuna Toldo patapi mana unaytachu kaj chayrí, israelitakunaqa Tata Dios kamachejtinkama purirejpacha kanku. Tata Dios sayanankuta kamachejtintaj, sayaj kanku.
21Wakin kuti phuyoqa Dioswan Tinkukuna Toldo patapi uj ch'isillata kaj, q'ayantintaj tutamanta oqharikoj. Jina kajtenqa, israelitakuna oqharikuspa, purirejpacha kanku. P'unchaypis kachun, tutapis kachun, phuyu oqharikojtenqa, paykuna purirej kanku. 22Sichus uj mashkha p'unchayllata, chayrí uj killata, chayrí uj watata Dioswan Tinkukuna Toldo patapi phuyu sayaj chayqa, israelitakuna mana purirejchu kanku. Phuyu oqharikoj chaypachatajrí, purirejpacha kanku. 23Tata Dios kamachejtin, israelitakuna jarakoj kanku. Puririnankuta kamachejtintaj, purirej kanku. Ajinata Tata Diospa kamachisqanta junt'aj kanku, Moisesnejta kamachisqanman jina.
Currently Selected:
Números 9: DQPC
Highlight
Copy
Compare
Share
Want to have your highlights saved across all your devices? Sign up or sign in
Revisión Biblia Quechua Boliviano © Sociedad Bíblica Boliviana, 2017.
