Números 10
10
Qolqe metalmanta trompetata ruwanku
1Tata Dios Moiseswan parlaspa, nillarqataj: 2Martillowan takaspa, qolqe metalmanta iskay trompetata ruway.#10.2 Trompeta: Unay trompetaqa mana kunan jinachu karqa. Ñawpa trompetakunaqa cheqan karqa, khuskan metro jina. Ñawpajta Egipto llajtayojkuna trompetata tocayta yachasqanku. Chaymanta qhepanejman israelitakuna Templopi Diosta yupaychanankupaj tocayta yachallasqankutaj (2 Cr 5.12). Chaykunaqa israelitakuna tantakunankuta wajyachinaykipaj kanqa, jinallataj puririnankuta kamachinaykipaj. 3Sichus iskaynin trompeta waqanqa chayqa, Dioswan Tinkukuna Toldo punkuman qanpa ñawpaqeykiman tukuy israelitakuna jamunanku tiyan. 4Sichus uj trompetalla waqanqa chayrí, sapa ayllumanta tukuy kurajkunalla ñawpaqeykiman tantakamonqanku.
5Puririnankupaj jina trompetakunata waqachejtiykitaj, inti llojsimuynejpi jarakojkuna puririnankupaj oqharikonqanku. 6Watej trompetata waqachejtiykitaj, uranejpi jarakojkuna oqharikonqanku. Trompeta sinch'ita waqajtin, runataj sinch'ita qhaparejtenqa, puririnankupaj señal kanqa. 7Trompeta waj jinata waqajtintaj, tukuy israelitakuna tantakunankupaj señal kanqa. 8Trompetataqa Aaronpa mirayninmanta sacerdotekuna waqachenqanku. Kay kamachisqaqa qankunapaj, jinataj mirayniykichejpaj wiñaypaj kanqa.
9Sichus suyuykichejpi kashajtiykichej, pipis qankunawan maqanakoj jamunman chayqa, jatunmanta trompetata waqachinkichej. Chantá noqa Tata Diosniykichej qankunamanta yuyarikusaj, awqaykichejmantataj kacharichisqaykichej. 10Jinallataj raymita ruwanaykichejpaj, chantá mosoj killa raymita ruwanaykichejpaj ima, trompetata waqachinkichej. Jinallataj q'olachispa Tata Diosman jaywanata jaywashaspa, allinyakuy jaywanata ima jaywashaspa, trompetata waqachillankichejtaj. Ajinata ruwajtiykichej, noqa qankunamanta yuyarikusaj. Noqamin Tata Diosniykichej kani, nispa.
Israelitakuna Sinaí orqomanta puririnku
11Egiptomanta llojsimusqanku iskay wataña kashajtin, iskay kaj killamanta iskay chunkayoj p'unchaypi, Dioswan Tinkukuna Toldo patamanta phuyu oqharikorqa. 12Chaypacha israelitakunaqa Sinaí ch'innejmanta purirerqanku. Phuyutaj Parán nisqa ch'innejpi sayarqa.
13Tata Dios Moisesnejta kamachisqanman jina paykuna puririyta qallarerqanku. 14Ñawpajta Judá jatun ayllumanta kajkunaraj wiphalankuta oqharikuspa, soldadokuna jina purirerqanku. Paykunatataj Aminadabpa churin Nasón kamachejninku kaspa pusasharqa. 15Isacar jatun ayllumanta kajkunajta kamachejninku Suarpata churin Natanael karqa. 16Zabulón jatun ayllumanta kajkunajta kamachejninkutaj Helonpata churin Eliab karqa.
17Chaymantataj Gersonpata churinkuna, chantá Merarij churinkunawan ima Dioswan Tinkukuna Toldota apanankupaj phaskarqanku, paykuna apanankupaj cuentayoj kasqankurayku.
18Chaymanta Rubén jatun ayllumanta kajkunañataj wiphalankuta oqharikuspa, soldadokuna jina paykunaj qhepankuta purirerqanku. Rubén jatun ayllumanta kajkunaj kamachejninkutaj Elisurpata churin Sedeur karqa. 19Simeón jatun ayllumanta kajkunajtarí Surisadaypata churin Selumiel kamachejninku karqa. 20Gad jatun ayllumanta kajkunajtataj Deuelpa churin Eliasaf kamachejninku karqa.
21Paykunaj qhepankuta Coatpata churinkuna Tata Diosta yupaychanapaj t'aqasqa imakunata oqharisqa purirerqanku. Paykuna chayanankupajqa Dioswan Tinkukuna Toldo ñapis sayarichisqaña karqa.
22Coatpa churinkunaj qhepankuta Efraín jatun ayllumanta kajkunañataj wiphalankuta oqharikuspa, soldadokuna jina purirerqanku. Kamachejninkutaj Amiudpata churin Elisama karqa. 23Manasés jatun ayllumanta kajkunajtarí Pedasurpata churin Gamaliel kamachejninku karqa. 24Benjamín jatun ayllumanta kajkunajtataj Gedeonij churin Abidán kamachejninku karqa.
25Tukuypa qhepantataj Dan jatun ayllumanta kajkuna wiphalankuta oqharikuspa, soldadokuna jina purirerqanku. Paykunajtataj Amisadaypata churin Ajiezer kamachejninku karqa. 26Aser jatun ayllumanta kajkunajtaqa Ocranpata churin Pagiel kamachejninku karqa. 27Neftalí jatun ayllumanta kajkunajtarí Enanpata churin Ajirá kamachejninku karqa. 28Ajinata israelitakunaqa soldadokuna jina qhepan qhepanta puririnanku karqa.
Moisés warminpa turanta wajyan
29Uj kuti Moisesqa Madián llajtayoj suegron Ragüelpata churin Hobabta nerqa: Noqaykoqa Tata Dios qonawaykuta niwayku, chay jallp'aman rishayku. Qanpis noqaykuwan jamuy ari. Noqaykutaj qanmanta qhawasqayku, imaraykuchus Tata Dios israelitakunata khuyakuywan qhawarinanta nin, nispa.
30Hobabtajrí Moisesta nerqa: Mana, noqaqa llajtayman kutipunay tiyan, maypichus tukuy aylluy tiyakunku chayman, nispa.
31Moisestaj kuticherqa: Ama kutipuychu ari. Qan sumajta yachanki kay ch'inkunapi jarakunapaj maynejchus sumaj kasqanta, chayrayku qan pusawayku ari. 32Sichus noqaykuwan rinki chayqa, Tata Dios sumaj imakunata qowasqaykumanta qanmanpis qollasqaykutaj, nispa.
33Ajinata israelitakunaqa Tata Diospa orqonmanta purirerqanku, rerqankutaj kinsa p'unchay puriyta. Tata Diospa trato ruwasqan arcaqa ñawpaqenkuta risharqa, maynejpichus jarakunankuta mask'aspa. 34P'unchayninpi paykuna purirejtinkukama, Tata Diospa phuyun patankuta risharqa. 35Tata Diospa arcanta oqharejtinkukamataj, Moisés ajinata nej:
Sayariy ari, Tata Dios.
Awqaykikuna ch'eqerachunku.
Chejnisojkunapis qanta rikususpa, ayqechunku, nispa.#Sal 68.1(2).
36Diospa arcanta apajkuna sayajtinkutaj, Moisés kay jinata nej:
Tata Diosníy,
mana yupay atina Israelpa mirayninta ama saqerpariychu ari, nispa.
Currently Selected:
Números 10: DQPC
Highlight
Copy
Compare
Share
Want to have your highlights saved across all your devices? Sign up or sign in
Revisión Biblia Quechua Boliviano © Sociedad Bíblica Boliviana, 2017.
