Números 34
34
Canaán suyoj mojonninkuna
1Tata Dios Moisesta nillarqataj: 2Israelitakunata kay jinata kamachiy: Maypachachus Canaán suyuman yaykunkichej chaypachaqa, tukuynin suyuta qankunajta kananpaj jap'inkichej. Chay jallp'aj mojonninkuna kay jina kanqa: 3Uranejman mojonnenqa Zin nisqa ch'innejmanta, Edom suyoj jap'iyninwan tinkuykama kanqa. Inti llojsimuynejmantaj Wañusqa Qochamanta uranej kantunmantapacha kanqa. 4Uranejmanqa Acrabín wichaykama rillanqapuni, chaytaj Zinmanta Cadés Barneakama pasanqa. Chaymanta Jazar Adarnejta Asmonkama rillanqapuni. 5Asmonmantataj Egiptopi wayq'okama renqa, chaymantataj Jatun Mama Qochawan tinkonqa.
6Inti yaykuynejman jallp'aykichejpa mojonnenqa Jatun Mama Qocha kanqa.
7Wichaynejman jallp'aykichejpa mojonnenqa Jatun Mama Qochamanta Hor orqokama kanqa. 8Hor orqomantataj Jamatman yaykuykama kanqa. Chaymantataj Zedadkama kanqa. 9Zedadmanta wichaynejman kaj mojonnintaj Zifronkama rillanqapuni, chaymantataj Jazar Enanpi tukukonqa.
10Inti llojsimuynejman mojonqa Jasar Enanmanta Sefankama renqa. 11Sefanmantataj mojonqa Riblakama renqa, Ayinmanta inti llojsimuynejman. Chaymantataj Cineret qochaj inti llojsimuyninnejta urayk'onqa. 12Chaymantataj Jordán mayunta rillanqapuni, Wañusqa Qochaj tukukuyninkama. Jallp'aykichejpa jap'iyninpa mojonnenqa ajina kanqa, nispa.
Jallp'ata imaynatachus rak'inakunanku
13Moisés israelitakunata kamachillarqataj: Chay suyupi jallp'ata qankunaqa suerteta choqaspa, rak'inakunkichej. Chayta Tata Diosqa jisq'on jatun ayllu khuskanniyoj qhepakojkunaman qonata kamacherqa.#Nm 26.52-56. 14Rubén jatun ayllu, Gad jatun ayllu, jinallataj Manasespa khuskan jatun ayllun ima, mashkhachus kasqankuman jina, ñapis jallp'ankuta jap'inkuña Jericó chimpapi, Jordán mayumanta inti llojsimuynejpi. 15Chay iskay jatun ayllu, chantá Manasespa jatun ayllunmanta khuskanniyojqa Jordán mayoj inti llojsimuynejpi, Jericó llajtaj chimpanpi ña jallp'ankuta jap'inkuña, nispa.
16Tata Dios Moisesta nillarqataj: 17Chay jallp'ataqa sacerdote Eleazarwan, chantá Nunpata churin Josuewan ima rak'enqanku. 18Qankunataj sapa jatun ayllumanta uj kamachejta ajllankichej, jallp'a rak'iypi yanapanankupaj. 19Chay kurajkunaj sutinkoqa kaykuna kanku: Judá jatun ayllumanta Yefunej churin Calebta ajllankichej.
20Simeón jatun ayllumantaqa Amiudpata churin Semuelta ajllankichej.
21Benjamín jatun ayllumantataj Quislonpata churin Elidadta ajllankichej.
22Dan jatun ayllumantataj Yoglíj churin Buquita ajllankichej.
23Joséj churinkunaj jatun ayllunkumantaqa Manasesmanta Efodpata churin Janielta ajllankichej. 24Efraín jatun ayllunmantataj Siftanpa churin Kemuelta ajllankichej.
25Zabulón jatun ayllumantatataj Parnacpata churin kuraj Elisafanta ajllankichej.
26Isacar jatun ayllumantarí Azanpa churin Paltielta ajllankichej.
27Aser jatun ayllumantaqa Selomij churin Ajiudta ajllankichej.
28Neftalí jatun ayllumantataj Amiudpata churin Pedaelta ajllankichej, nispa.
29Chay kurajkunata Tata Dios kamacherqa Canaán suyupi jallp'ata israelitakunaman rak'inankuta.
Currently Selected:
Números 34: DQPC
Highlight
Copy
Compare
Share
Want to have your highlights saved across all your devices? Sign up or sign in
Revisión Biblia Quechua Boliviano © Sociedad Bíblica Boliviana, 2017.
