Números 25
25
Israelitakuna Baal Pegor lantita yupaychanku
1Israelitakuna Sitinpi tiyakushajtinku, wakin qharikuna Moabmanta warmikunawan khuchichakuyta qallarerqanku. 2Chay warmikunaqa lantinkuman uywa ñak'asqata jaywana raymiman israelitakunata wajyarqanku. Israelitakunataj moabitakunaj lantinkoj sutinpi wayk'usqa mikhunata mikhuysikorqanku, paykunaj diosninkutataj yupaycharqanku. 3Ajinata israelitakunaqa Baal Pegor sutiyoj lantita yupaychanaman apachikorqanku. Chayrayku Tata Diosqa israelitakunapaj maytapuni phiñakorqa.
4Chantá Tata Dios Moisesta nerqa: Israelitakunaj tukuy kurajninkuta jap'ispa, noqaj ñawpaqeypi sut'i p'unchaypi sipiy. Ajinallamanta israelitakunaj contrankupi k'araj phiñakuyniy tiyaykonqa, nispa.
5Chantá Moisés israelitakunaj juezninkukunata nerqa: Sapa ujniykichej jatun aylluykichej ukhupi pikunachus Baal Pegor lantita yupaycharqanku, chaykunata wañuchiychej, nispa.
6Chaypachapuni uj israelita, Moisespa rikunanta, chantá tukuy israelitakunaj rikunankuta, Madián llajtayoj uj warmita jaraman pusaykorqa. Moiseswan, israelitakunawan imataj Dioswan Tinkukuna Toldo punkupi waqasharqanku. 7Chayta rikuspa, sacerdote Aaronpa allchhin, Eleazarpata churin Finés, maypichus israelitakuna tantasqa kasharqanku, chaymanta llojserqa. Chantá lanzanta oqharikuspa, 8chay runaj qhepanta rerqa. Toldonman yaykuspataj, israelitata, jinataj madianmanta warmitawan wijsankupi t'ojsispa, wañucherqa. Ajinata ruwasqanrayku, israelitakunata wañuchej onqoy sayarqa. 9Chaykamaqa 24.000 israelitakunaña chay onqoywan wañusqanku.
10Chantá Tata Dios Moisesta nerqa: 11Israelitakunaj contrankuta phiñakusqayta Eleazarpa churin Finés tiyaykuchin, imaraykuchus noqajta jinallataj paypa sonqonpis chay juchamanta t'impurerqa. Chayrayku israelitakunaj contrankuta sinch'ita phiñakushaspapis, mana paykunata tukucherqanichu. 12Finesta niy ari, noqa paywan k'achata kawsakunapaj uj tratota ruwasqayta. 13Chayrayku payman, jinataj mirayninmanpis sacerdote kanankuta wiñaypaj qoni. Chayta ruwani imaraykuchus payqa Diosninmanta sienterqa, israelitakunaj juchallisqanku pampachasqa kanantataj tarerqa, nispa.
14Madián llajtayoj warmiwan khuska wañuchisqa karqa, chay israelitaj sutin Zimri karqa. Payqa Saluj churin karqa, Simeón jatun ayllumanta kuraj kajtaj. 15Madianmanta warmej sutintaj Cozbi karqa. Payqa madianitakunaj kurajninku Surpata ususin karqa.
16Chantá Tata Dios Moisesta nillarqataj: 17Madianitakunaj contrankuta maqanakoj rispa, wañuchimuychej. 18Paykunaqa tukuy imaymanamanta q'otiyaspa, Baal Pegor lantinkuta yupaychanaman aysasorqachej. Madianitakunaj kurajninkoj ususin Cozbitaj millayta purinaman apasorqachej. Payqa lanzawan wañuchisqa karqa, maypachachus onqoyta apachimorqaykichej, chaypacha, nispa.
Currently Selected:
Números 25: DQPC
Highlight
Copy
Compare
Share
Want to have your highlights saved across all your devices? Sign up or sign in
Revisión Biblia Quechua Boliviano © Sociedad Bíblica Boliviana, 2017.
