Levítico 4
4
Jucha pampachasqa kananpaj Diosman jaywana
1Tata Diosqa Moisesta nillarqataj: 2Israelitakunata niy: Sichus pipis mana reparakuspa, Tata Diospa mayqen kamachisqanta p'akispa juchallinman#4.2 Mana reparakuspa juchallinaqa waj jina karqa, yachashaspa chayrí munaspa juchallinamanta nisqaqa. Nm 15.27-31. chayqa, kay jinata ruwanqa.
3Sichus kuraj kaj sacerdote juchallinman chayqa, tukuy israelitakuna juchayojllataj rikhurenqanku. Jina kajtenqa, juchallisqan pampachasqa kananpaj sacerdoteqa mana iman imanasqa torillota Tata Diosman jaywanqa. 4Torillotaqa Tata Diospa ñawpaqenman, Dioswan Tinkukuna Toldo punkuman apamonqa. Chantá torilloj umanman makinta churaspa, Tata Diospa ñawpaqenpi ñak'anqa. 5Chantá kuraj kaj sacerdotellataj torilloj yawarninmanta uj chhikata Dioswan Tinkukuna Toldo ukhuman apanqa. 6Chaypitaj kuraj kaj sacerdoteqa maki ruk'ananta yawarman chhapuspa, Tata Diospa ñawpaqenpi cortina cheqanejman qanchis kutita ch'ajchonqa. 7Chantá sacerdoteqa Tata Diospa ñawpaqenpi, Dioswan Tinkukuna Toldopi inciensota q'oshñichina altarpa wajrankunatapis yawarwan jawillanqataj. Puchoj yawartataj q'olachina altarpa uranman jich'aykonqa, mayqenchus Dioswan Tinkukuna Toldo punkunejpi kashan, chay altarpa uranman.
8Chantá juchan pampachasqa kananpaj, kuraj kaj sacerdoteqa ñak'asqa torillomanta, ch'unchulanmanta tukuy wiranta, llikha wiranta ima orqhonqa. 9Jinallataj torilloj iskaynin lurunninta, lurunninpi wiranta, ch'illanpi wiranta, k'iwichanpi wirantawan ima orqhollanqataj. Chaykunataqa lurunnintawan khuska orqhonqa. 10Chaytaqa imaynatachus k'achata kawsakuy jaywanata jaywanapaj ñak'asqa torillomanta orqhonku, ajinallatataj orqhonqa. Chantá kuraj kaj sacerdoteqa chaykunata altar patapi q'olachenqa. 11Chaymantataj torilloj qaranta, tukuy aychanta, umanta, chakinta, ch'unchulanta, wanunta ima 12torillojta tukuy iman kaj chhikata, jaramanta jawapi uj llimphuchasqa cheqaman orqhonqa, maypichus ushphata jich'anku, chayman. Chaypitaj ushpha pataman llant'ata churaspa, chaykunata ruphachenqa.
13Sichus tukuy israelitakuna mana yuyasqallamanta juchallikunkuman, nitaj pipis reparanmanchu Tata Diospa kamachisqanmanta ujninta p'akisqankuta chayqa, ajina kajtinpis juchayojpuni kanqanku. 14Juchallisqankuta reparakuytawan, juchanku pampachasqa kananpaj, tukuyninku uj torillota Diosman jaywananku tiyan. Torillotaqa Dioswan Tinkukuna Toldo punkuman apanqanku. 15Chaypitaj israelitakunaj kurajninkuna Tata Diospa ñawpaqenpi torilloj umanman makinkuta churanqanku. Chantá chaypi torillota ñak'anqanku. 16Jinaspataj kuraj kaj sacerdoteqa torilloj yawarninmanta uj chhikata Dioswan Tinkukuna Toldo ukhuman apanqa. 17Chantá pay maki ruk'ananta yawarman chhapuspa, Tata Diospa ñawpaqenpi, cortina cheqanejman qanchis kutita ch'ajchonqa. 18Chaymantataj Dioswan Tinkukuna Toldopi, Tata Diospa ñawpaqenpi kashaj inciensota q'oshñichina altarpa wajrankunata uj chhika yawarwan jawenqa. Puchoj yawartataj Dioswan Tinkukuna Toldoman yaykuna punkupi q'olachina altarpa uranman jich'anqa. 19Chantá ñak'asqa torillomanta tukuy wiranta orqhospa, altarpi chayta q'olachenqa. 20Chay ñak'asqa torillowan ruwanqa, kuraj kaj sacerdote juchan pampachasqa kananpaj ñak'asqa torillowan imaynatachus ruwarqa, ajinallatataj. Ajinata sacerdoteqa israelitakunaj juchanku pampachasqa kananpaj, Tata Diosman jaywanqa. Juchankutaj pampachasqa kanqa. 21Chaymantataj ñak'asqa torillota jaramanta jawaman orqhospa, q'olachenqa, imaynatachus ñawpaj kaj torillowan ruwarqanku, ajinallatataj. Chayqa israelitakunaj juchallisqanku pampachasqa kananpaj jaywanamin.
22Sichus uj kamachej mana reparakuspa, Tata Diosninpa kamachisqanta p'akispa juchallinman chayqa, juchayojmin kanqa. 23Juchallisqanta reparakuytawantaj, mana iman imanasqa uj chivota Diosman jaywananpaj apamonqa. 24Chantá kamachejqa chivoj umanman makinta churaytawan, Tata Diospa ñawpaqenpi chay chivota ñak'anqa, q'olachinapaj maypichus uywata ñak'anku, chaypi. Chayqa jucha pampachasqa kananpaj Diosman jaywanamin. 25Chaymantataj sacerdoteqa jucha pampachasqa kananpaj ñak'asqa uywaj yawarninman maki ruk'ananta chhapuspa, q'olachinapaj altarpi wajrakunata jawenqa. Puchoj yawartataj q'olachinapaj altarpa uranman jich'anqa. 26Chantá ñak'asqa chivoj tukuynin wiranta altarpi q'olachenqa, imaynatachus k'achata kawsakuy jaywana uywa ñak'asqa wirawan ruwanku, ajinallatataj. Sacerdoteqa ajinata ruwaspa, kamachejpata juchan pampachasqa kananta tarenqa, kamachejpa juchantaj pampachasqa kanqa.
27Sichus mayqen runallapis mana reparakuspa, Tata Diospa kamachisqanta p'akispa juchallinman chayqa, juchayojmin kanqa. 28Juchallisqanta reparakuytawantaj, juchan pampachasqa kananpaj Diosman jaywananpaj mana iman imanasqa uj cabrata apamonqa. 29Chantá cabraj umanman makinta churaytawan, q'olachinapaj maypichus uywata ñak'anku, chaypi cabrata ñak'anqa. 30Chaymantataj sacerdoteqa jucha pampachasqa kananpaj ñak'asqa uywaj yawarninman maki ruk'ananta chhapuspa, altarpa wajrankunata jawenqa. Puchoj yawartataj altarpa uranman jich'anqa. 31Chantaqa cabraj tukuy wiranta wirachanqa, imaynatachus Tata Diosman k'achata kawsakuy jaywanata jaywanapaj ñak'asqa uywaj wiranwan ruwanku, ajinallatataj. Sacerdoteqa ajinata ruwaspa, runaj juchan pampachasqa kananta tarenqa, chay runaj juchantaj pampachasqa kanqa.
32Sichus uj runa juchanrayku jaywananpaj uj ovejata apamunman chayqa, mana iman imanasqata apamunan tiyan. 33Chantá ovejaj umanman makinta churaspa, q'olachinapaj maypichus uywata ñak'anku, chaypi ovejata ñak'anqa. Chayqa jucha pampachasqa kananpaj Diosman jaywanamin. 34Chaymantataj sacerdoteqa jucha pampachasqa kananpaj ñak'asqa ovejaj yawarninman maki ruk'ananta chhapuspa, q'olachina altarpa wajrankunata jawenqa. Jinaytawantaj, puchoj yawarta altarpa uranman jich'anqa. 35Chantá ñak'asqa ovejaj tukuy wiranta wirachanqa, imaynatachus k'achata kawsakuy jaywana uywa ñak'asqawan ruwanku, jinallatataj. Jinaspataj, sacerdoteqa Tata Diosman ch'aki mikhuy jaywanaj patanpi wirata altarpi q'olachenqa. Sacerdoteqa ajinata ruwaspa, runaj juchallisqan pampachasqa kananta tarenqa. Chay runaj juchantaj pampachasqa kanqa, nispa.
Currently Selected:
Levítico 4: DQPC
Highlight
Copy
Compare
Share
Want to have your highlights saved across all your devices? Sign up or sign in
Revisión Biblia Quechua Boliviano © Sociedad Bíblica Boliviana, 2017.
