Levítico 27
27
Tata Diospaj t'aqasqa kajmanta
1Tata Diosqa Moiseswan parlaspa, nillarqataj: 2Israelitakunata kay jinata niy: Sichus pillapis Tata Diosman imatachus nisqanta junt'ayta munan chayqa,#Nm 30.1-2. uj runaj precion mashkhachus kasqanman jina pagaspa, orqhokaponqa. 3Sichus qhari kanman chayqa, iskay chunka watayojmanta, sojta chunka watayojkama phishqa chunka qolqeta paganqanku, imaynachus Dioswan Tinkukuna Toldopi tupu churasqaman jina. 4Sichus warmi kanman chayrí, kinsa chunka qolqeta paganqanku. 5Phishqa watayojmanta, iskay chunka watayojkama qharikunamantaqa iskay chunka qolqeta paganqanku. Warmikunamantataj chunka qolqeta paganqanku. 6Uj killayojmanta, phishqa watayojkama qhari wawamantaqa phishqa qolqeta paganqanku, warmi wawamantataj kinsa qolqeta. 7Sojta chunka watayojmanta kaymantaj qharikunamanta chunka phishqayoj qolqeta paganqanku, warmikunamantataj chunka qolqeta. 8Sichus Diosman qonanta nej runa mana kapuyniyoj kaspa, runaj precion churasqa kajta mana pagayta atinmanchu chayqa, sacerdoteman pusachunku. Sacerdotetaj Diosman qonanta nej runaman pagayta atinanpaj jinalla preciota churanqa.
9Sichus pipis Tata Diosman jaywanapaj jina uywata jaywanman chayqa, chay uywaqa Tata Diosllapaj t'aqasqa kanqa. 10Manataj chay uywata waj uywawan rukana atikonqachu, allin kajta mana allin kajtawan, nitaj mana allin kajta allin kajtawan. Sichus pipis chay uywata waj uywawan rukanqa chayqa, iskaynin uywakuna Tata Diospaj t'aqasqa kanqanku.
11Sichus Tata Diosman jaywasqa uywa ch'ichipaj qhawasqa kaj uywamanta kanman chayqa, chay uywata sacerdoteman apanqanku. 12Sacerdotetaj uywa imaynachus kasqanta qhawarispa, uywata apamoj runa mashkhatachus pagananta nenqa. Chay runataj sacerdote mashkhatachus paganata nisqanman jina paganqa. 13Sichus chay uywata qoj kacharichiyta munanman chayqa, uywaj precionta phishqaman rak'ispa, ujninta yapanqa.
14Sichus pipis wasinta Tata Diospaj t'aqan chayqa, sacerdote chay wasita qhawarispa, mashkhachus valesqanta nenqa. Sacerdotej precio churasqan kanan tiyan. 15Sitajchus wasita qoj preciota pagaspa wasinta kacharichiyta munanman chayqa, chay wasej valorninta pagachun. Chaymantaj wasej valorninta phishqaman t'aqaspa, ujnintawan yapachun. Ajinata ruwaspa, wasinta kacharichiyta atenqa.
16Sichus mayqellanpis jallp'anmanta uj cheqata Tata Diosman qonman chayqa, chay jallp'aj valesqanqa cebada muju mashkhachus yaykusqanman jina kanqa. Sichus muju iskay tupu yaykunman chayqa, jallp'aqa phishqa chunka qolqe valenqa. 17Sichus pipis jallp'anta Kacharipuna watamantapacha Tata Diosman qonman chayqa, chay jallp'aj precion churasqa karqa, chayllapuni kanqa. 18Sichus Kacharipuna watamanta qhepaman pipis jallp'anta Tata Diosman qonman chayqa, sacerdoteqa Kacharipuna wataman mashkharajchus kashan, chayman jina qhawarispa, jallp'aj precionta churanqa. Precionqa Kacharipuna wataman mashkha watarajchus kasqanman jina urayk'uchisqa kanqa.
19Sichus jallp'ata Diosman qoj preciota pagaspa orqhokapuyta munanman chayqa, jallp'aj valorninta paganqa. Chaymantaj jallp'aj precionta phishqaman t'aqaspa, ujnintawan yapaspa qoponqa. Ajinata ruwaspa, jallp'anta orqhokapuyta atenqa. 20Sitajchus jallp'anta mana preciota pagaspa orqhokapunmanchu, chay jallp'ataj wajman vendesqa kanman chayqa, manaña orqhokapuyta atenqachu. 21Maypachachus Kacharipuna wata kanqa chaypacha, chay jallp'a kacharisqa kanqa, jinataj Tata Diospaj t'aqasqa kanqa. Sacerdotekunataj chay jallp'ata jap'ikaponqanku.
22Sichus pipis rantisqan jallp'ata Tata Diosman qonman, chay jallp'ataj mana ayllunpa chayaqenchu kanman chayqa, 23sacerdote chay jallp'ata qhawanqa. Chantá Kacharipuna wataman mashkharajchus kasqanta yupaspa, preciota churanqa. Chay kikin p'unchayllataj Tata Diosman qojqa jallp'aj precionta paganqa. Jallp'amanta pagasqan qolqetaj Diospaj t'aqasqa kanqa. 24Pichus vendejqa Kacharipuna watapi jallp'anta jap'ikaponqa, pay dueño kasqanrayku. 25Tukuy precio orqhosqaqa Dioswan Tinkukuna Toldopi tupu churasqa kasqanman jina kanan tiyan. Sapa phisu qolqeqa chunka gramoyoj kanqa.
26Tukuy uywakunaj phiwi uñanqa Tata Diospata kanku. Phiwi uña kasqanrayku, mana pipis chaytaqa Tata Diosman qonanpaj t'aqayta atenqachu. Waka uñapis, chayrí oveja uñapis kachun, chayqa Tata Diospataña.#Ex 13.1-2,11-16; 22.29-30. 27Sichus ch'ichipaj qhawasqa uywa kanman chayqa, precio churasqa kasqanta pagaspa, orqhokapuyta atenqa, precionta phishqaman t'aqaspa, ujnintawan yapaspa. Sichus mana rantikapunmanchu chayrí, mashkhachus valesqanman jina vendekunan tiyan.
28Sichus pipis kapuyninmanta Tata Diospaj t'aqanman uj runata, uywata, chayrí chayaqe jallp'anta chayqa, chaykunata mana vendeyta, nitaj preciota pagaspa kacharichiyta atenqachu. Chaykunaqa Tata Diospajpuni t'aqasqa kanqanku.#Nm 18.14. 29Chayrayku wañuchisqa kananpaj t'aqasqa runaqa nipuni orqhokapusqa kayta atenqachu. Chay runaqa wañuchisqapuni kanan tiyan.
30Jallp'api tukuy ima poqojmanta, chajramanta, chayrí sach'aj poqoyninmanta sapa chunkamanta uj Tata Diospata kanqa. Chayqa Tata Diospaj t'aqasqamin kanqa.#Nm 18.21; Dt 14.22-29; Mal 3.8-10. 31Sichus pipis chunkamanta ujta qosqanmanta uj chhikata orqhokapuyta munanman chayqa, precionta paganqa. Chantá precionmanta phishqaman t'aqaspa, ujnintawan yapaspa qoponqa.
32Wakamanta, chayrí ovejamanta sapa chunkamanta ujqa Tata Diospaj t'aqasqa kanqa. 33Uywayojqa mana ajllanqachu ni allin kajta, ni mana allin kajtapis. Nillataj waj uywawan rukayta atenqachu. Sichus mayqellanpis uj uywawan rukanman chayqa, iskaynin uywakuna Tata Diospaj t'aqasqa kanqanku. Manaña pipis chaymantaqa preciota pagaspa orqhokapuyta atenqachu, nispa.
34Kay kamachisqakunata Tata Dios Sinaí orqopi Moisesnejta israelitakunaman qorqa.
Currently Selected:
Levítico 27: DQPC
Highlight
Copy
Compare
Share
Want to have your highlights saved across all your devices? Sign up or sign in
Revisión Biblia Quechua Boliviano © Sociedad Bíblica Boliviana, 2017.
