Éxodo 35
35
Samarina p'unchaypaj kamachisqakuna
(Ex 31.12-17)
1Moisesqa tukuynin israelitakunata tantaspa, nerqa: Tata Dios kaykunata ruwanaykichejta kamachisunkichej: 2Sojta p'unchayta llank'ankichej, qanchis kaj p'unchaypitaj samarinkichej, Tata Diospaj t'aqasqa p'unchay kasqanrayku. Pillapis chay p'unchaypi ruwananta ruwajqa wañuchisqa kanqa.#Ex 20.8-11; 23.12; 31.15; 34.21; Lv 23.3; Dt 5.12-14. 3Samarina p'unchaypeqa wasiykichejpi amapuni ninallatapis jap'ichinkichejchu, nispa.
Dioswan Tinkukuna Toldopaj ofrenda
(Ex 25.1-9)
4Chaymanta Moisés tukuy israelitakunata nerqa: Kayta ruwanaykichejta Tata Dios kamachisunkichej: 5Tiyapususqaykichejmanta Tata Diospaj ofrendata t'aqapuychej. Tukuy sonqonkumanta Tata Diosman qoyta munajkuna munasqankuman jina kay imakunata apamuchunku: Qorita, qolqe metalta, bronceta, 6anqa telata, puka panti telata, puka telata, sumajnin kaj linomanta telatawan. Apamullachunkutaj cabramanta millmata, 7pukaman tiñisqa mocho qarata, tejonmanta qarata, acacia sach'amanta tablakunata, 8k'anchachinapaj aceiteta, sumaj k'achituta q'apaj imakunata jawina aceitepaj, k'achituta q'apashaj inciensopajpis. 9Apamullachunkutaj lliphipirishaj ónice nisqa rumikunata, lliphipirishaj waj rumikunatawan, sacerdotej unkunta, chantá pecheranta ima k'achanchanapaj.
10Chantá tukuy ima ruwayta yachajkuna imatachus Tata Dios kamachin, chaykunata ruwanankupaj jamuchunku: 11Dioswan Tinkukuna Toldota, qhatananta, ganchokunata, tablakunata, k'aspikunata, sayantakunata, chantá chukukunata ima ruwanqanku. 12Jinallataj arcata, arcata wantunapaj k'aspikunata, arcaj kirpananta, cortinata ima ruwallanqankutaj. 13Ruwallanqankutaj mesata, mesata wantunapaj k'aspikunata. Mesapi kaj imakunata, Diosman jaywanapaj t'antata ima ruwanqanku. 14Jinallataj candelerota tukuy imantinta, lamparakunata, k'anchachinapaj aceiteta ruwallanqankutaj. 15Chantá inciensota q'oshñichinapaj altarta ruwallanqankutaj, chay altarta wantunapaj k'aspikunata, jawispa t'aqanapaj aceiteta, k'achituta q'apaj inciensota, Dioswan Tinkukuna Toldoman yaykuna punkupi cortinata ima. 16Chay runakuna ruwallanqankutaj uywata ñak'aspa q'olachina altarta, broncemanta ruwasqa rejillanta, altarta wantuna k'aspita, tukuy imantinta, mayllakuna jatun ch'illamita, chukunta ima. 17Chantá ruwanqanku patiopaj cortinata, sayachinapaj k'aspikunata, chukuntinta ima, chantá patioman yaykuna punkupaj cortinatawan. 18Ruwallanqankutaj Dioswan Tinkukuna Toldopaj estacakunata, watanapaj waskhata ima. 19P'achatapis ruwallanqankutaj kuraj kaj sacerdote Aaronpaj, churinkunapaj ima. Paykuna chay p'achata churakonqanku Dioswan Tinkukuna Toldopi imatachus ruwanankuta ruwanankupaj, nispa.
Israelitakuna ofrendata apamunku
20Chantá tukuy israelitakuna Moisespa ñawpaqenmanta riporqanku. 21Chaymantataj sonqomanta munaspa, mashkhatachus qoyta munasqankuman jina, tukuy sonqo Tata Diospaj ofrendata apamorqanku. Dioswan Tinkukuna Toldota ruwanapaj, toldopi imachus kanan karqa chaykunata, jinallataj sacerdotekunapaj p'achata ruwanapaj apamorqanku. 22Qharikuna, warmikuna ima sonqonkumanta mashkhatachus qoyta munasqankuman jina, ofrendata apamorqanku. Apamorqanku qorimanta tukuy imaymana jaluchukunata, t'ipanakunata, anillokunata, walqakunata, imachus qorimanta ruwasqa karqa, chaykunatawan. Ajinata Tata Diospaj t'aqasqanku qorimanta ofrendata apamorqanku. 23Apamullarqankutaj anqa telata, puka panti telata, puka telata, linomanta sumaj telata, cabra millmata, pukaman tiñisqa mocho qarata, tejonmanta qarata ima. 24Pikunachus qolqe metalniyoj, bronceyoj karqanku, chaykunapis Tata Diosman ofrendata qollarqankutaj. Chantá pikunajtachus acacia sach'amanta tabla tiyaporqa, chaykunapis apamullarqankutaj, imachus ruwana karqa, chaykunata ruwanankupaj. 25Tukuy imata ruwayta yachaj warmikunapis ofrendankuta apamullarqankutaj anqa telata, puka panti telata, puka telata awasqankuta, jinataj linomanta sumaj awasqankuta ima. 26Chantá sumajta awayta yachaj warmikuna sonqomanta munaspa, cabra millmamanta phushkasqankuta apamullarqankutaj. 27Kurajkunatajrí lliphipishaj ónice sutiyoj rumikunata, jinataj waj lliphipishaj rumikunata apamullarqankutaj. Chay rumikuna karqa kuraj kaj sacerdotepaj unkuman chantá pecheraman chhitanapaj. 28Apamullarqankutaj k'achituta q'apashaj jawinakunata, lamparata k'anchachinapaj aceiteta, Diospaj t'aqanapaj aceiteta, k'achituta q'apaj inciensotawan.
29Israel ayllumanta qharikuna, warmikuna ima sonqonkumanta munaspa, Tata Diospaj ofrendankuta apamorqanku, Tata Dios Moisesman kamachisqanman jina ruwanankupaj.
Tata Diosqa Besalelta Aholiabtawan wajyan
(Ex 31.1-11)
30Chantá Moisés israelitakunata nerqa: Uyariwaychej, Tata Diosqa Judá jatun ayllumanta Jurpata allchhin, Urij churin Besalelta ajllan. 31Payta Tata Diospa espiritunwan junt'aykuchin, jinataj sumaj yachayta, yuyayta qon, tukuy imata ruwanapaj yachayniyoj kananpaj. 32Payqa qorimanta, qolqe metalmanta, broncemanta ima sumaj k'achitu imakunata ruwanqa. 33Chantá lliphipirishaj rumikunata ch'eqospa, chhitanqa. Jinallataj k'aspita llajllaspa, sumaj k'achitu imakunata ruwanqa. 34Jinallataj Tata Diosqa Besalelman, jinataj Dan jatun ayllumanta Ajisamacpa churin Aholiabman ima yachayta qollantaj wajkunaman yachachinankupaj. 35Tata Dios paykunaman yachayta, yuyayta qon tukuy imata sumaj k'achituta pallayniyojta ruwanankupaj anqa telapi, puka panti telapi, puka telapi, linomanta sumaj telapiwan. Paykunaqa sumajta awayta yachajkuna kanku, jinataj tukuy imata ruwanankupaj sumaj yuyayniyoj kanku, nispa.
Currently Selected:
Éxodo 35: DQPC
Highlight
Copy
Compare
Share
Want to have your highlights saved across all your devices? Sign up or sign in
Revisión Biblia Quechua Boliviano © Sociedad Bíblica Boliviana, 2017.
