Éxodo 36
36
1Chantá Moisés nillarqataj: Ajinata Besalelwan, Aholiabwan, chantá tukuy imata ruwayta yachajkuna ima, Dioswan Tinkukuna Toldopaj tukuy imata ruwanqanku, Tata Dios yuyayta, yachayta qosqanman jina. Chay tukuy imatataj Tata Diospa kamachisqanman jina ruwanqanku.
Israelitakuna ashkha ofrendata apamunku
2Chantá Moisesqa Besalelta, Aholiabta, chantá tukuy imata ruwayta yachajkunatawan ima wajyarqa. Paykunaman Tata Diosqa tukuy imata ruwayta atinankupaj yuyayta, yachayta qosqa. Paykunataj sonqomanta munaspa imatapis ruwanapi yanapakunankuta, nerqanku. 3Chantá Moisés israelitakunaj apamusqanku tukuy ofrendata paykunaman qorqa, chaywan Dioswan Tinkukuna Toldopi imakunachus kanan karqa, chaykunata ruwanankupaj.
Chaykamatajrí, israelitakunaqa sapa paqarin sonqomanta munaspa, ofrendata apamushallarqankupuni. 4Chantá tukuy imata ruwayta yachajkunaqa Dioswan Tinkukuna Toldopaj imatachus ruwasharqanku, chayta saqespa, Moisesman jamorqanku, nerqankutaj: 5Israelitakunaqa Tata Diospa kamachisqanta ruwanapaj imachus necesitakusqanmanta ancha ashkhataña apamushanku, nispa.
6Chayta uyarispa Moisesqa tukuynin jarapi kajkunaman willacherqa: Qharikunapis, warmikunapis, Dioswan Tinkukuna Toldota ruwanapaj amaña ofrendata apamuchunkuchu, nispa. Ajinata israelitakuna ofrendata apamunankuta jark'arqa. 7Imatachus ruwananku karqa, chaypajqa tukuy ima kurajyarqa.
Dioswan Tinkukuna Toldota ruwanku
(Ex 26.1-37)
8Ajinata tukuy ruwajkunamanta astawan yachajkuna Dioswan Tinkukuna Toldota ruwayta qallarerqanku. T'ullkusqa linomanta, anqa telamanta, puka panti telamanta, puka telamanta ima chunka cortinakunata ruwarqanku. Chaykunatataj pallayninpi iskay querubinkunata ruwarqanku. 9Sapa cortina sayt'unman chunka iskayniyoj metro khuskanniyoj karqa. Kinrayninmantaj iskay metro karqa. Tukuynin cortinakuna chhikachajkama karqanku. 10Chantá phishqa cortinakunata ujllaman t'inkerqanku, jinallatataj chay wakin cortinakunatapis sirarqanku. 11Chaymantataj ñawpaj kaj t'inkisqa cortinaj puntanman, anqa q'aytumanta ninrita chhitarqanku, kikillantataj iskay kaj cortinapipis ruwarqanku. 12Ñawpaj kaj t'inkisqa cortinaman phishqa chunka ninrita churararqanku, kikillantataj qhepan kaj t'inkisqa cortinamanpis churarqanku. Jinamanta churasqa ninrikunaqa chimpanpura karqanku. 13Ruwallarqankutaj qorimanta phishqa chunka chhitanata, chaykunawan iskaynin t'inkisqa cortinata chhitaspa ujllaman tukuchinankupaj. Ajinamanta Dioswan Tinkukuna Toldoqa ujlla karqa.
14Chaymantaqa cabra millmamanta chunka ujniyoj cortinakunata ruwallarqankutaj, chaywan Dioswan Tinkukuna Toldota qhatanankupaj. 15Sapa cortina sayt'unman chunka kinsayoj metro khuskanniyoj karqa, kinrayninmantaj iskay metroyoj. Jinaqa chay chunka ujniyoj cortinakuna chhikachajkama karqanku. 16Chaymantaqa phishqa cortinakunata siraspa t'inkerqanku, chantá sojta cortinakunatapis kikillantataj ujllaman t'inkerqanku. 17Jinaspataj, ñawpaj kaj t'inkisqa cortinaj puntanpi phishqa chunka ninrita ruwarqanku, phishqa chunkatataj iskay kaj t'inkisqa cortinapi. 18Chantaqa broncemanta phishqa chunka chhitanata ruwallarqankutaj, chaywan cortinakunata chhitanankupaj. Jinamanta Dioswan Tinkukuna Toldota qhatanaqa ujlla karqa. 19Jinallataj toldota qhatanapaj mocho qarata pukaman tiñispa, uj qhatanata ruwarqanku. Chaypa patanman qhatanapajtaj tejón qaramanta waj qhatanata ruwallarqankutaj.
20Dioswan Tinkukuna Toldopaj acacia maderamanta tablakunata ruwallarqankutaj, chaykunatataj cheqanta sayaracherqanku. 21Sapa tabla sayt'unman tawa metro khuskanniyoj karqa, kinrayninmantaj sojta chunka phishqayoj centímetro. 22Tablapura k'askachisqa kananpajtaj, sapa tabla iskay tarukuyoj karqa. Toldopaj tukuy tablakunata ajinata ruwarqanku. 23Dioswan Tinkukuna Toldoj urannejpajqa iskay chunka tablata ruwarqanku. 24Chantá qolqe metalmanta tawa chunka chukuta ruwallarqankutaj. Sapa tablaj uranpi iskay chuku karqa, iskaynin tarukuta jap'inanpaj. 25Jinallataj toldoj pata ladonpaj iskay chunka tablakunata ruwallarqankutaj. 26Chantá qolqe metalmanta tawa chunka chukuta ruwallarqankutaj, chaymantataj sapa uj tablata iskay chukuman sayaykucherqanku. 27Toldoj inti yaykuynejpaj sojta tablata ruwallarqankutaj. 28Qhepanej esquinanman sayachinapajrí, iskay tablatawan ruwallarqankutaj. 29Chay iskay tablakuna ujlla kananpaj pampamanta patapi kaj ninrikama t'inkinasqa karqa. Ajinata esquinanpaj iskay tablata ruwarqanku. 30Ajinaqa pusajnintin tabla, chunka sojtayoj qolqe metalmanta ruwasqa chukuyoj karqa. Sapa tablaj uranpi iskay chuku karqa.
31Chantá Besalelqa Dioswan Tinkukuna Toldoj ujnin ladon tablapaj acacia maderamanta phishqa k'aspita ruwarqa. 32Ruwallarqataj phishqa k'aspita Dioswan Tinkukuna Toldoj tablanpa wasanman churananpaj. Phishqa k'aspitataj inti yaykuy uyapaj ruwarqa. 33Tablaj chawpinta uj ladoman pasachinanpaj uj k'aspita ruwallarqataj. 34Jinaspataj, tablakunata qoriwan lluch'iykorqa. Jinallataj ninrikunatapis qorimanta ruwarqa, chay ninrikunanejta qoriwan lluch'isqa k'aspita pasachinapaj.
35Chaymanta anqa telamanta, puka panti telamanta, puka telamanta, t'ullkusqa linomanta ima velotañataj ruwarqa. Chaytataj iskay querubinkunaman rijch'asqa pallayniyojta ruwarqa. 36Chantá tawa sayantaman qorimanta ruwasqa ninriman jap'iykucherqa. Sayantaqa acacia maderamanta karqa, qoriwan lluch'isqa ima. Sayantakunata sayachinapajtaj, qolqe metalmanta tawa chukuta ruwarqa.
37Dioswan Tinkukuna Toldoman yaykunapaj, anqa telamanta, puka telamanta, puka panti telamanta, t'ullkusqa linomanta ima uj cortinata ruwallarqataj. Chay cortinata sumaj k'acha pallayniyojta ruwarqa. 38Chaymantataj phishqa sayantata ruwarqa, sapa sayantataj broncemanta ruwasqa ninriyoj karqa. Jinallataj sapa sayantapaj, broncemanta phishqa chukuta ruwarqa. Jinaspataj, sayantakunaj umanta, ninrinkunatapis qoriwan lluch'iykorqa.
Currently Selected:
Éxodo 36: DQPC
Highlight
Copy
Compare
Share
Want to have your highlights saved across all your devices? Sign up or sign in
Revisión Biblia Quechua Boliviano © Sociedad Bíblica Boliviana, 2017.
