Éxodo 33
33
Tata Dios puririnankuta kamachin
1Tata Dios Moisesta nerqa: Qanwan chantá, Egiptomanta orqhomorqanki, chaykunawan khuska kaymanta puririychej, noqa Abrahamman, Isaacman, Jacobmanwan ima tiluspa nerqani: Mirayniykichejman kay jallp'ata qosaj, nispa, chayman. 2Noqataj angelniyta kachamusaj qanta pusasunanpaj. Chantá cananeokunata, amorreokunata, jititakunata, ferezeokunata, heveokunata, jebuseokunata ima kay jallp'amanta qharqosaj. 3Qankunaqa riychej, maypichus lechewan, abeja misk'iwan yaku jina purishan, chay jallp'aman. Noqarí mana qankunawanchu risaj, ama qankunata chawpi ñanpi chinkarparichinaypaj, imajtinchus qankunaqa ancha rumi sonqo kankichej, nispa.
4Israelitakunaqa Tata Dios k'araj simiwan parlasqanta uyarispa, mayta llakikorqanku. Chayrayku ni pipis jaluchuta churakuspa k'achanchakorqankuchu, 5imaraykuchus Tata Diosqa Moisesta nisqa: Israelitakunata niy: Qankunaqa uyarikunapaj joq'ara kankichej. Uj chhikantachus qankunawan riyman chayqa, usqhayllata qankunata tukurparichiykichejman. Kunanpacha jaluchuykichejta orqhokuychej. Ajinapi noqa yachasaj qankunawan imatachus ruwanayta, nispa.
6Chayrayku israelitakunaqa Horeb orqopi tukuyninku jaluchunkukunata orqhokorqanku, chaymantapachataj manaña churakorqankuchu.
Dioswan tantakunapaj toldo
7Chantá Moisesqa uj toldota apaspa, jaramanta jawapi sayacherqa#33.7 Toldota jaramanta jawapi sayacherqa: Dioswan tantakuna toldo, mana israelitakuna ukhupichu karqa, manachayqa jawapi sayachisqa. Dioswan tantakuna toldo jaramanta jawapi sayachisqa kasqan, niyta munarqa Diosqa israelitakuna juchallisqankurayku karitunejpi kayta munasqanta. Chaywanpis, Moisés israelitakunarayku Diosmanta mañasqanrayku, Tata Dios ujtawan israelitakuna ukhupi kananpaj kutiykamorqa. “Dioswan tantakuna toldo”,#33.7 Dioswan tantakuna toldo: Kay toldoqa mana Ex 27.21 nin ajinachu karqa, waj jinataj. Kay toldoqa mana unaypajchu sayachisqa karqa. Jinallataj mana Dioswan uywa ñak'asqa q'olachinata jaywanapajchu karqa, Ex 27.1-8, manachayqa Dioswan tinkukuspa parlarikunapaj. nispataj suticharqa. Pillapis Tata Diosta tapurikuyta munajqa jaramanta llojsispa, Dioswan tantakuna toldoman rej. 8Israelitakuna Moisesta toldoman rishajta rikuspa, tukuyninku toldonku punkupi sayarikoj kanku. Chantá Moisés Dioswan tantakuna chay toldoman yaykunankama qhawaj kanku. 9Toldoman Moisés yaykojtinkamataj, sayashaj chhoqo phuyu#33.9 Chhoqo phuyu, Dioswan tantakuna toldo, chantá Diospa jatun kayninpa lliphipiynin ima Dios paykunawan kashasqanmanta señal karqa. Ex 13.21-22; 14.19; 40.33-38. urayk'amuspa, toldoj punkunpi sayaj. Chantá chaypi Tata Diosqa Moiseswan parlaj karqa. 10Dioswan tantakuna toldo punkupi phuyuta sayashasqanta rikuspataj, tukuy israelitakuna toldonku punkupi pampakama k'umuykuspa, Diosta yupaychaj kanku.
11Chaypi Tata Diosqa uyapura Moiseswan parlaj, imaynatachus pillapis kawsaqenwan parlarikun, ajinata.#Nm 12.7-8; Dt 34.10. Dioswan parlaytawantaj, Moisesqa jaraman kutimoj. Moisespa yanapajnin Nunpata churin Josuetajrí, nipuni jayk'ajpis Dioswan tantakuna toldomanta kuyurejchu.
Moisés Diospa uyanta rikuyta munan
12Chantá Moisés Tata Diosta nerqa: Qan niwarqanki: Israelitakunata qan pusay, nispa. Chaywanpis mana niwankichu noqawan rinanpaj pitachus kachamunawaykita. Jinallataj niwarqanki noqapi sumajta atinikusqaykita, khuyarikunawaykipajtaj sonqoyki kasqanta. 13Sichus cheqatapuni khuyarikuspa qhawarinawaykita tarini chayqa, imatachus ruwayta munasqaykita niway ari, noqa qanta munakusunaypaj, jinataj qan noqapi atinikunaykipaj. Amataj qonqaychu kay runakunaqa qanpata wawaykikuna kasqankuta, nispa.
14Chantá Tata Dios Moisesta nerqa: Noqa kikiy qanwan risaj, samarichisqaykitaj, nispa.
15Moisestaj kuticherqa: Sichus qan mana noqaykuwan khuskachu rinki chayqa, ama kaymanta orqhowaykuchu. 16Qan noqaykuwan mana riwajchu chayqa, noqa, jinataj aylluyki Israel imaynapitaj yachasqayku qan khuyarikuwasqaykutari? Noqaykuwan rejtiykeqa, sut'ita yachakonqa noqa, jinataj aylluyki kay pachapi runakunamanta t'aqasqa kasqayku, nispa.
17Chantá Tata Diosqa Moisesta nerqa: Kayta mañakuwasqaykitapis ruwallasajtaj, imaraykuchus noqa qanta allinpaj qhawayki, jinataj allinpi kawsakunchej, nispa.
18Moisestajrí kuticherqa: Jina chayqa, mañarikuyki jatun kayniykej lliphipiyninta rikuchinawaykita, nispa.
19Tata Diostaj kuticherqa: Noqa tukuy k'acha kasqayta ñawpaqeykipi rikuchisqayki, uyarinaykitataj sutiyta oqharisaj. Noqa khuyakusaj pitachus khuyakuyta munasqayta, yanapasajtaj pitachus yanapayta munasqayta. 20Uyaytarí manapuni rikuwankichu, imaraykuchus pipis rikuwajqa manapuni kawsanqachu, nispa.#33.19-20 Ex 3.6 nin, Moisesqa Diospa uyanta rikuyta mana munasqanta. Kay kutipirí Moisés mañakorqa Diospa t'ukuna kayninta rikuchinanta. Chaywanpis Dios nerqa t'ukuna kayninmanta uj chhikallanta rikuchinanta.
21Chantá Tata Dios Moisesta nillarqataj: Qhawariy, kay qayllaypi uj cheqa tiyan. Chayrayku chay chhanka patapi sayay. 22Jatun kayniypa lliphipiynin chaynejta pasashajtin, chhanka k'ajlluman churasqayki. Chantá chaynejta pasanaykama, makiywan pakaykusqayki. 23Chaymantataj makiyta oqharisaj, qantaj wasallaytaña rikunki. Uyaytarí manapuni rikunkichu, nispa.
Currently Selected:
Éxodo 33: DQPC
Highlight
Copy
Compare
Share
Want to have your highlights saved across all your devices? Sign up or sign in
Revisión Biblia Quechua Boliviano © Sociedad Bíblica Boliviana, 2017.
