Éxodo 32
32
1Moisés Sinaí orqomanta mana usqhayta urayk'amusqanrayku, israelitakuna tantakuspa, Aaronta nerqanku: Egiptomanta orqhomuwarqayku, chay Moiseswan imachus kasqanta mana yachaykuchu. Chayrayku ñawpaqeykuta rispa pusanawaykupaj, dioskunata ruwapuwayku, nispa.#Hch 7.40. 2Chantá Aarón nerqa: Warmiykichejpa, churiykichejpa chantá ususiykichejpa ninrinkupi kashan, chay qori jaluchukunata orqhospa, apamuwaychej, nispa.
3Jinataj israelitakunaqa ninrinkumanta qori jaluchunkuta orqhokuspa, Aaronman jaywarqanku. 4Paytaj jap'ispa qorita ninapi unuyacherqa. Chaymantataj cincelwan t'illmispa, waka uñaman rijch'akoj lantita ruwarqa.#32.4 Waka uñaman rijch'akoj lantita ruwachikusqanku, imajtinchus chaypacha runakuna yuyaj kasqanku toro manchay kallpayoj kasqanta. Chayrayku yuyaj kasqanku wakaqa runa ashkha wawayoj kananpaj yanapayta atisqanta. Chantá israelitakuna waka uña lantita rikuspa nerqanku: Israelitakuna, kaymin Egiptomanta orqhomuwarqanchej, chay diosninchejqa, nispa.
5Chantá Aarón chayta rikuspa, waka uñaj ñawpaqenpi uj altarta ruwarqa. Chaymantataj israelitakunata nerqa: Q'aya Tata Diospa sutinpi uj raymita ruwasunchej, nispa.#32.5 Tata Diospaj raymita ruwana: Israelitakuna waka uña lantita yupaychaspa, yuyarqanku mana waj diostachu yupaychashasqankuta. Diosrí, payta waka uña lantitawan khuska yupaychanata mana munarqachu, imajtinchus Diosqa payllata yupaychanankuta munarqa. Waka uña lantita waj llajtayojkuna yupaychayta yacharqanku. Ex 32.4; 20.4.
6Q'ayantenqa tutamanta jatariytawan, israelitakuna uywa ñak'asqa q'olachinata, k'acha kawsakuy jaywanatawan ima waka uña lantiman jaywarqanku. Chaymantataj tiyaykurikuspa, mikhorqanku, ujyarqanku ima. Chantá kusiririkuspa tukuy imaymana khuchiriyota ruwanaman qokorqanku.
7Chantá Sinaí orqopi Tata Dios Moisesta nerqa: Kunanpacha kay orqomanta urayk'uy, imaraykuchus Egiptomanta orqhomusqayki runakunaqa millayta ruwashanku. 8Paykunaqa kamachisqaymanta usqhayllata t'aqakuspa, qorita unuyachinku waka uña lantita ruwakunankupaj. Chaymantataj lanti ruwakusqankuman q'olachisqa jaywanata jaywaspa, yupaychashanku, nishankutaj: Israelitakuna, kaymin Egiptomanta orqhomuwarqanchej, chay diosninchejqa, nispa.#Dt 9.11-12.
9Chay jawa Tata Diosqa Moisesta nillarqataj: Noqa yachaniña kay runakuna rumi sonqo kasqankuta. 10Kunanqa ama jark'awaychu. Noqa paykunapaj sinch'i phiñasqa kasqayrayku, wañuchispa paykunata tukuchisaj. Qanmantataj waj jatun aylluta sayarichisaj, nispa.
11Moisestajrí chayta uyarispa, Tata Diosninmanta mañakorqa: Tata Dios, imaraykutaj aylluykej contranpi chay jina k'arajtapuni phiñakuwajri? Qanmin paykunata sinch'i atiyniykiwan tukuy imaymana t'ukunata ruwaspa, Egiptomanta orqhomorqanki. 12Egipto llajtayojkunaqa ninkumanchari: Diosqa israelitakunata mana allin sonqowan kaymanta orqhon, ch'innejpi wañuchispa kay pachamanta chinkachinanpaj, nispa. Chayrayku sonqoykita tiyaykuchikuspa, aylluykita ama jasut'iychu, ari. 13Kamachiyki Abrahamman, Isaacman, Israelman ima sutiykirayku tiluspa, nisqaykimanta yuyarikuy. Qan paykunata nerqanki: Noqa janajpi ch'askakunata jinapuni mirachisqaykichej, nisqayman jinataj wiñaypaj qankunaman kay jallp'ata qosqaykichej, nispa.
14Chantá Tata Dios sonqonta tiyaykuchikorqa, manañataj Israel ayllunta chinkachiyta yuyasqanta ruwarqachu. 15Moisesrí orqomanta urayk'amorqa, iskay p'alta rumipi kamachisqakuna qhelqasqata aparisqa. Chay p'alta rumikunaqa puraj lado uyanpi qhelqasqa karqa.#Dt 9.15. 16P'alta rumikunataqa Dios kikinmin ruwasqa, jinallataj chaykunapi kamachisqakunaqa Diospa qhelqasqanpuni karqa.
17Chantá Josueqa israelitakunaj ch'ajwasqankuta uyarispa, Moisesta nerqa: Maqanakuspapis ch'ajwashankuman jina jaramanta uyarikamushan, nispa.
18Moisestajrí kuticherqa: Mana maqanakupi atipaspa kusiywan qhaparisqankutachu, nitaj atipachikuspa waqaspa qhaparisqankutachu uyarishani. Manachayqa takishasqankuta noqa uyarishani, nispa.
19Chantá Moisés jaraman qayllaykuspa, waka uña lantita rikorqa, israelitakunatataj tusushajta tariparqa.#32.19 Tususharqanku: Israelitakuna qorimanta ruwasqa waka uña lantita tususpa, chantá takispa yupaycharqanku. Chantá manchay k'arajta phiñarikuspa, makinpi jap'isharqa, chay p'alta rumikunata orqo k'uchupi choqaspa p'akirparerqa.#32.19 Moisés p'alta rumita pampaman choqaspa p'akisqan, niyta munarqa Dios israelitakunawan trato ruwasqan p'akikusqanta. Chaywanpis chunka tawayoj chijllaypi nin, Tata Dios Moisespa mañakusqanta uyarisqanrayku, ayllunta mana qhesachasqanta. 31.18—34.35. 20Waka uña lanti ruwasqankutataj jap'iytawan, ninaman wijch'uspa unuyacherqa. Chaymantataj lantita ñut'uta kutaspa, yakuman jich'aykorqa. Jinaspataj, chay yakuta israelitakunaman ujyacherqa.#32.20 Lanti kutasqayoj yakuta ujyana niyta munarqa israelitakuna qorimanta lantita ruwachikuspa yupaychasqankumanta jasut'isqa kanankuta. Niyta munallarqataj, pikunachus lantita ruwachikojkuna juchallisqankumanta cuentayoj kasqankuta.
21Chantá Moisés Aaronta nerqa: Imanasorqankutaj kay runakuna kay jina jatunta paykunata juchallichinaykipajri? nispa.
22Aarontajrí kuticherqa: Ama phiñakuychu, tatáy. Qan allinta yachanki, kay runakuna mana allin kajta ruwanaman sonqo aysasqa kasqankuta. 23Paykuna niwarqanku: Pusanawaykupaj dioskunata ruwapuwayku, imaraykuchus Egiptomanta orqhomuwarqayku, chay Moisesqa imanakunchus, mana yachaykuchu, nispa. 24Noqataj paykunata nerqani: Pejpatachus qorin tiyajtenqa, apamuwaychej, nispa. Paykuna qorita qowarqanku, noqataj ninaman wijch'uykorqani. Jinamanta kay waka uña rikhurerqa, nispa.#32.22-24 Aarón nisqanman jina, waka uña lanteqa payllamanta rikhurisqa. Aarón ñawpa runa Adán jina, juchallisqanta rimarinantaqa, wajkunata juchacharqa.
25Moisés rikorqa Aarón qhawakullasqanrayku, israelitakuna kacharparisqa jina munasqankuta ruwashasqankuta. Rikullarqataj israelitakunaqa tukuy awqanku asikunankupaj jina kashasqankuta. 26Chayrayku Moisesqa jara punkupi sayaspa, nerqa: Pikunachus Tata Diosman sayasqa kajkunaqa noqaman jamuychej, nispa. Chantá tukuynin levitakuna, maypichus Moisés kasharqa, chayman tantakorqanku. 27Chaymanta Moisés levitakunata nerqa: Israelitakunaj Tata Diosnin ajinata nin: Sapa ujniykichej espadaykichejta oqharikuspa, jaraman kutiychej. Chantá toldomanta toldo rispa, wawqeykichejta, kawsaqeykichejta, chantá qayllaykichejpi tiyakojkunata ima wañuchiychej, nispa.
28Levitakunaqa Moisespa nisqanta kasuspa, chay p'unchay kinsa waranqata jina qharikunata wañucherqanku.
29Chaymanta Moisesqa levitakunata nerqa: Kunan qankunaqa Diospa kamachinkuna kanaykichejpaj t'aqasqa kankichej, millayta ruwaj wawaykichejpa, chantá wawqeykichejpa contrankuta sayaykusqaykichejrayku. Chayrayku Tata Diosqa kay p'unchay qankunata saminchasunkichej, nispa.#32.29 Levitakunaqa Diospa sacerdotenkuna kanankupaj churasqa karqanku. Ex 29; Lv 8—9; Nm 25.10-13; Dt 33.8-11.
30Q'ayantin Moisesqa tukuy israelitakunata nerqa: Qankunaqa ancha jatunta juchallinkichej. Kunanqa Tata Dios kashan, chayman risaj. Ichapis Tata Diosmanta mañakojtiy juchallisqaykichejta pampachananta tariyman, nispa.
31Chantá Moisesqa maypichus Tata Dios kasharqa, chayman kutispa, nerqa: Israelitakunaqa qorimanta diosta ruwakuspa, jatunta juchallinku. 32Chaywanpis noqa mañarikuyki, paykunaj juchankuta pampachanaykita. Manachus juchallisqankuta pampachanki chayqa, kunanpacha qhelqaykimanta sutiyta orqhopuway, nispa.#32.31-32 Qhelqaykimanta: Ajinata nispa, llajtayojkunaj sutinku uj p'anqaman listasqa kananmanta nishan. Ez 13.9; 2 S 24.2-9; Jer 22.30. Astawanqa ñawirina 32.9-14 chijllaykunata. Kay chijllaykunapi nisqanman jina, Diosqa uj qhelqatapis jap'ishanman jina kashan. Chay qhelqapi Diosqa tukuy runaj sutinkuta listasqa. Listasqa kajpa sutinta orqhopuy niyta munarqa manaña kasqanta. Chayrayku chay qhelqaqa “kawsay qhelqa”, nispa sutichasqa. Sal 69.28; Ap 3.5. Jinallataj ñawirina Sal 56.8; 139.16.
33Chaywanpis Tata Dios Moisesman kuticherqa: Pichus noqaj contraypi juchallejpa sutillanta qhelqaymanta orqhopusaj. 34Kunanqa israelitakunata pusay, maymanchus pusanaykita nerqayki, chayman. Noqaj angelniytaj pusasonqa. Chaywanpis jasut'inay p'unchay chayamojtin, noqa paykunata juchankumanta jasut'isaj, nispa. 35Chaypacha Tata Diosqa israelitakunata wañuchej onqoywan jasut'erqa, Aarón waka uña lanti ruwasqanta yupaychasqankumanta.
Currently Selected:
Éxodo 32: DQPC
Highlight
Copy
Compare
Share
Want to have your highlights saved across all your devices? Sign up or sign in
Revisión Biblia Quechua Boliviano © Sociedad Bíblica Boliviana, 2017.
