Roma 14

Nee mombasalai sampesuvumiu sampomparasaya ane panggavana nosisala ante panggavamiu

1Naria topomparasaya dopa naroso pomparasayara, sampe da naingu rarara pokainggu mbana raoseakara. Tona ivehaitu kana ratarimata ante nabelo, bo nee rapakasala panggavara. 2Rapana, naria tona nomparasaya ia namala mangande mpengaya-ngaya kandea. Tapi tona ntanina anu dopa naroso pomparasayana, nanguli ledo nipokono nu Alatala kita mangande bau, aga uta-uta mamala rakandeta. 3Tona nangande mpengaya-ngaya kandea ledo masipato momparitambe tona ledo nangande bau. Bo tona ledo nangande bau, ledo muni masipato manjalai tona nangande mpengaya-ngaya kandea. Sabana topangande mpengaya-ngaya haitu muni nitarima nu Alatalamo majadi todeaNa. 4Roata haitu batua nu Alatala, ledo batuata. Ledo masipato kita manjalai batua ntona ntanina. Bara makana bara masala batua haitu, haitu urusa nu tuana mboto, ledo urusata. Bo tona nangande mpengaya-ngaya kandea haitu tantu rareke nakana sabana Tupu nakuasa nombatulungi ia novia anu nakana.

5Naria muni topomparasaya nanguli naria eo nopokopa pade eo-eo ntanina. Tapi topomparasaya ntanina nanguli pura-pura eo nasimbayu. Ledo nakuya, asaa pura-pura tona mpuu-mpuu nomparasaya riara ntaira Alatala nompokono anu nipoviara. 6Tona nompakaoge eo nipakatantu, sabana ira madota mompakadamba Tupu. Bo ivesia muni tona anu nangande mpengaya-ngaya kandea. Nikandera mpengaya-ngaya kandea sabana ira madota mompakadamba Tupu, bo niulira tarima kasi ka Alatala. Tona ledo nangande bau haitu, ledo nikandera sabana ira madota mompakadamba Tupu, bo ira muni nanguli tarima kasi ka Alatala. 7Kita topomparasaya natuvu ledo aga nompakadamba karota mboto. Bo kita namate ledo aga nangoseaka dotata mboto. 8Ane kita da natuvu, kita natuvu mompakadamba Tupu, bo ane kita mamatemo, kita mamate mangoseaka dota nTupu. Nau da natuvu nau namatemo, kita batena todea nTupu. 9Haitumo sabana i Yesus Kristus namate bo natuvu mpanjili lako ri kamateNa, ala Ia mamala majadi Tupu nu pura-pura manusia, nau tona da natuvu nau tona namatemo.

10Jadi, nee rapakasala roa-roamiu sampomparasaya. Bo nee raparitambemiu ira. Apa kita pura-pura kana mantingayo Alatala bara maipia bo Ia mombatangara kita pura-pura. 11Nisanita haitu sabana nitulisi riara Buku Gasa ivei:

<<Alatala nanguli, <TesaKu hitu mpuu-mpuu nakana:

pura-pura tona kana mantaputu ri ngayoKu.

Pura-pura tona kana mompangaku Yakumo Tupura!> >>

Yesaya 45:23

12Jadi, sampesuvu-sampesuvu, kita simbo mantingayo Alatala bo mesana tempo Ia mompekutana anu nipoviata.

Nee sampe anu rapoviata mompakeni roa-roata movia dosa

13Jadi, nemo raposipakasalata. Agina kita mompasimbuku nemo rapoviata nuapa-nuapa anu mompakeni roata sampomparasaya manavu riara dosa. 14Yaku nosangu rara ante i Pue Yesus, jadi nisaniku mpuu ledo ria kandea nuapa-nuapa nipopali ri panggita nu Alatala. Tapi ane maria tona nomparasaya sangaya kandea nipopali, ia mpuu-mpuu masala ane rakandena. 15Ane rapana yaku mompakadua rara roaku sampomparasaya sabana nikandeku anu nirekena nipopali, yaku muni madosa apa yaku natuvu ledo nompotove roa. Jadi nee sampe pomparasaya nu roa rapakagero sabana kandea nikandeta. Apa ira muni sampesuvuta sampomparasaya, anu nitoloki i Kristus ante kamateNa. 16Jadi, ane maria anu nireketa nabelo, tapi anu haitu nombabato pomparasaya nu roata, agina nee rapoviata, ala pokaingguta ledo rasalai ntona. 17Apa anu nopoko riara Poparenta nu Alatala, ledo anu nikandeta atau niinuta. Anu nopoko, kita manoa rarata, bo matuvu mosinggabelo ante roata, bo madamba rarata sabana Nosa Gasa nu Alatala naria riara ntaita. 18Ane ivesia pangoseakata i Kristus, kita mompakadamba rara nu Alatala, bo roata muni mombabila kita.

19Haitu sampe kita kana mompasimbuku matuvu mosinggabelo ante roata, bo mosipakaroso rara. 20Nee rapakagerota anu nabelo nipovia nu Alatala riara nggatuvu roata, sabana nikandeta anu nireke nu roa nipopali. Kakanana pura-pura kandea namala rakande, ledo ria nipopali. Tapi kita nasala ane anu nikandeta mompakeni roata manavu riara dosa. 21Agina domo mangande bau atau manginu panginu anu nepakalangu atau movia nuapa-nuapa anu mompakeni roata manavu riara dosa. 22Ane niparasayata pokaingguta haitu ledo nasala, aginamo rabolita pomparasayata haitu riara ntaita ri ngayo nu Alatala. Nasana mpuu kita ane nipoviata anu niparasayata riara ntaita nabelo, bo ane pekiri rara ntaita mboto ledo nanjalai kita. 23Tapi ane nonggai rarata nangande, nasala kita ane rakandeta kandea haitu, apa ledo nioseakata anu niparasayata. Bo nuapa-nuapa nipoviata anu ledo nangoseaka pomparasayata, pokainggu haitu dosa.

Currently Selected:

Roma 14: TLEDOV

Highlight

Copy