Suro-Suro 24

I Paulus nipangadu ntoYahudi

1Lima-mbongi kaliuna, Pakeni nTopanggeni Pesomba nosanga i Ananias ante bara sako-ndua pakeni-pakeni ntoYahudi, notua hau ri ngata Kaisarea. Nikenira muni saito tona napande notesa nosanga i Tertulus. Ira nantingayo Gubernur Feliks, bo nipangaduramo sala i Paulus.

2I Paulus nipokio mantingayo Gubernur Feliks, bo i Tertulus nompangadu i Paulus ivei: “Gubernur nibilaku. Kami todea riara pomparentamiu natuvu nasana. Lako ri kanotomiu nomparenta, nadeamo nipakabelo ri ngata kami. 3Pura-pura panggaviamiu anu nompakabelo ngata kami hitu, nitarima kami nte damba rara. Ledo nabasa-basa kami manguli tarima kasi. 4Pua, kami ledo madota masae gaga. Tapi nisani ntonamo kabelo raramiu, sampe kami merapi nte komiu ala raepemiu sampalai pangadua kami hitu. 5Nikita kami i Paulus tuu topegado nadaa ntoto. Nipakagadona toYahudi ri umba-umba ngata. Ia muni pakeni ntona nangoseaka pepatuduki i Yesus toNazaret. 6Ledo aga haitu, tapi ia madota mompakaruto Banua nu Alatala. Haitu sampe nisaka kamimo ia. [Patuju kami mombatangara ia mantuntuni atura-atura agama kami mboto. 7Tapi Tadulako Lisias nangago ia lako nte kami, 8bo niparentana ala pura-pura topangadu kana mantingayo komiu.] Jadi, Gubernur nibilaku, ane raparesamiu tona tutu, tantu rasanimiu lako ri tesana mbotomo, pangadua kami hitu nakana.”

9ToYahudi ntanina ri sia nompangadu i Paulus muni, bo niulira tesa i Tertulus nakana mpuu.

I Paulus nanjaliku karona ri ngayo i Feliks

10Naupu haitu, gubernur haitu nombalaeraka palena ka i Paulus ala ia mesana. Jadi i Paulus nanguli, “Gubernur nibilaku. Pua, nadamba raraku mombasaliku karoku ri sii ri ngayomiu, apa nisaniku komiu nompae-mpaemo najadi topotangara ri ngata hitu. 11Mamala rapekutanamiu mboto nte tona, aga sapulu rombongi kaliuna yaku nantende hau ri ngata Yerusalem hau metupu ri Banua nu Alatala. 12Ledo sanggania toYahudi gahaitu nanggava yaku nosinjanai, bara nompakagado todea ri Banua nu Alatala, bara ri banua-banua petupu, bara ri ngata. 13Ledo muni namala ira mompopakita ka komiu pangaduara haitu nakana. 14Tapi yaku kana mompangaku ri ngayomiu, yaku netupu nte Alatala nantuntuni pepatuduki i Yesus. Panguli ntoYahudi gahitu, pepatuduki haitu nasala. Tapi yaku bate-batena netupu nte Alatala anu nisomba ntotua kami nggaulu, bo nomparasaya pura-pura anu nitulisi riara Buku Atura Agama bo Buku Nabi-nabi. 15Yaku nasimbayu ante toYahudi gahitu, yaku muni nanjarumaka Alatala mompakatuvu pura-pura tona lako ri kamatera, tona nanoa bo muni tona nadaa. 16Haitumo sabana yaku nasaro nompasimbuku mokainggu nabelo ala ledo maria nuapa-nuapa nipoviaku masala ri panggita nu Alatala bara ri panggita nu manusia.

17Nasaemo yaku nompalaisi ngata Yerusalem. Tapi dopa nasae hitu, yaku nanjili hau ri ngata Yerusalem nanggeni doi petulungi ka tona napakasi ri sia, bo muni yaku madota mombadekei pesombaku ka Alatala. 18Tempo yaku da naria ri Banua nu Alatala nanggeni pesombaku nompakaupu ada pompakagasa karoku, naria bara sako-ndua toYahudi lako ri propinsi Asia nanggava yaku. Ledo naria todea nosanggani-nggani ante yaku, bo ledo muni naria kagado tempo haitu. 19Kakanana ira lako ri Asia kana maria muni ri sii mompangadu yaku ri ngayomiu ane maria mpuu pangaduara ka yaku. 20Tapi ira ledo ria ri sii, jadi aginamo tona ri sii anu nompangadu yaku, manguli pakalanto sala nuapa nikavara tempo yaku naria ri ngayo Polibu Mbaso Agama Yahudi. 21Ledo naria sala nikavara, aga sambela tesa niuliku ri ngayora anu ledo nipokonora, ivei: ‘Yaku nitangara eo hitu, sabana yaku nomparasaya tona namate kana matuvu mpanjili.’ ”

22Jadi Gubernur Feliks nompopenonto polibu haitu apa nisanina mami pepatuduki i Yesus. Niulina, “Kupakaupu parakara hitu ane mariamo Tadulako Lisias ri sii.” 23Naupu haitu niparentana balengga ntantara ala i Paulus batena rajagai. Tapi nau nijagai, ledo nitarunggu ntoto apa nidekeira ia nolipa-lipa sakide bo ledo nitagi roana nakava mantulungi ia.

I Paulus ri ngayo i Feliks bo i Drusila

24Bara sako-mbongi kaliuna, nanjilimo Gubernur Feliks nosanggani-nggani ante bereina nosanga i Drusila. I Drusila mai, toYahudi. I Feliks nantudu tona hau mangala i Paulus rakeni ri ngayona ala raepena i Paulus nombatentei pomparasayana i Yesus Kristus. 25I Paulus nanguli pokaingguta kana manoa, bo kita ledo mamala mangoseaka dota rarata nadaa, apa makava Eo Potangara ngena tempo Alatala mombatangara pura-pura manusia.

Nangepe tesa i Paulus, naeka mpuumo i Feliks. Nanguli ia, “Ivesiamo ruru. Ane maria loga damo kupokio pade motesa vai kita.” 26Kakanana nisarumaka i Feliksmo i Paulus mombadekei doi ka ia ala ia rakabasaka. Haitu sabana i Paulus nasaro nipokio i Feliks motesa-tesa ante ia.

27Rompae kaliuna, i Feliks nisambei, bo i Perkius Festus najadi gubernur ri bagia haitu. Tempo nolinja i Feliks, ia madota mangala rara ntoYahudi, jadi nipalambanamo i Paulus riara ntarunggu.

Currently Selected:

Suro-Suro 24: TLEDOV

Highlight

Copy