Suro-Suro 23

1Nakava sumai, nikanoto i Paulusmo toPolibu Mbaso Agama bo niulina, “Sampesuvu-sampesuvuku. Sampe ri eo hitu, yaku natuvu nanoa, nagasa ri panggita nu Alatala.” 2Nangepe tesa i Paulus, naraumo i Ananias, Pakeni nTopanggeni Pesomba. Bo nituduna tona ri sinjori i Paulus mombasapa sumba i Paulus. 3Nanguli i Paulus ka i Ananias, “Komiu mboto kana rasapa nu Alatala! Komiu aga nabelo ri sumba. Komiu nonturo ri situ mombatangara yaku nantuntuni Atura-atura agama anu nipapola Nabi Musa, tano komiu mboto nombaliunaka Atura-atura haitu apa nitudumiu tona mombasapa yaku.”

4Tona ri sinjori i Paulus nanguli ka ia, “Iko nombasalai Pakeni nTopanggeni Pesomba anu nipelisi nu Alatala!”

5Nesana Paulus, “O, sampesuvu pura-pura, ledo nisaniku iamo Pakeni nTopanggeni Pesomba. Ane nisaniku, ledo kuuli tesa pangane, sabana riara Buku Gasa nitulisi ivei: ‘Nee mombasalai pakeni ntodeamu!’ ”

6Nipeinta i Paulus naria toSaduki, bo toFarisi riara Polibu Mbaso Agama haitu. Jadi, niulinamo ka ira pura-pura, “Sampesuvu-sampesuvu! Yaku hii toFarisi muni bo muli ntoFarisi! Yaku nitangara ri sii sabana yaku nomparasaya tona namate mpuu-mpuu matuvu mpanjili!”

7Nangepe haitu, toFarisi bo toSaduki ri sia nosinggarau mbotomo, sampe Polibu haitu natebagi randua libu. 8Haitu najadi sabana nantuntuni panggava ntoSaduki, tona namate ledo matuvu mpanjili. Pangulira muni ledo naria malaeka nTupu, bo ledo muni naria nyawa nu manusia. Tapi toFarisi niparasayara pura. 9Jadi nadaa mpuumo kagado. Neangga bara sako-ndua toFarisi anu najadi guru agama bo ira mpuu-mpuu nombabali tesa ntoSaduki. Niulira, “Ane panggava kami, i Paulus hitu ledo ntoto naria salana, nau aga sakide. Bara naria anitu bara malaeka nTupu notesa ka ia.”

10Posinggarau haitu mpuu-mpuu nakanano, sampe tadulako naeka mbelaka raposibitesi ntodea i Paulus. Sia sampe nituduna tantarana mangala i Paulus lako ri tatanga ntodea haitu bo nanggeni ia hau ri asrama tantara.

11Kamaile bongina, i Pue Yesus neangga ri sinjori i Paulus bo nanguli, “Pakaroo raramu. Nipatolelemumo tesaKu ri ngata Yerusalem, ivesia muni tesaKu kana mupatolele ri ngata Roma!”

ToYahudi Nasintuvu mompatesi i Paulus

12-13Naeo mpadondo, nelabi patapulu toYahudi nonia mompatesi i Paulus. Ira pura-pura nosumpa ane dopame rapatesira i Paulus, dopa mangande, dopa manginu. 14Hau ira ri ngayo balengga-balengga ntopanggeni pesomba bo totua-totua ntoYahudi bo nanguli, “Kami hii nosumpa puramo, kami dopa mangande dopa manginu, ane dopa rapatesi kami i Paulus! 15Jadi, kami merapi komiu bo toPolibu ntanina mompakatu sura ka tadulako Magau Mbaso, merapi ala i Paulus rakeni mpanjili mantingayo Polibu Mbaso Agama Yahudi. Ulika ia da nariapa bara sako-ngaya rapekutanamiu nte i Paulus. Bo kami masadia mompatesi ia ri dala, dopame ia makava ri sii.”

16Tapi naria saito kabilasa, pinoana i Paulus, nangepe niara haitu. Hau ia ri asrama tantara bo nitesana nia ntona haitu ka i Paulus. 17Naupu nangepe tesa nu pinoanana, i Paulus nompokio saito balengga ntantara bo nanguli ka ia, “Keni kabilasa hitu hau ri ngayo nu tadulako. Naria anu ratesana ka ia.”

18Balengga ntantara haitu nanggeni kabilasa hau ri ngayo nu tadulako bo nanguli, “I Paulus anu nitarunggu, nerapi yaku manggeni ngana hitu ri ngayomiu, apa naria anu ratesana ka komiu.”

19Tadulako haitu nombanini kabilasa haitu hau motesa ri santanina ala ledo raepe ntona. Nipekutanana, “Nuapa mutesa ka yaku?”

20Nesanamo kabilasa haitu, “ToYahudi nasintuvu merapi komiu manggeni i Paulus mantingayo Polibu Mbaso Agama maile. Raulira da nariapa bara sako-ngaya rapekutanara nte i Paulus. 21Tapi kuperapi nte komiu, nee mpuu rapoiyomiu perapira haitu. Apa nelabi patapulu ira nasadiamo mombalava i Paulus ri dala. Ira pura-pura nosumpa ledo mangande bo ledo manginu ane dopa rapatesira i Paulus. Nasadiamo ira. Ira damo nompopea pesanamiu.”

22Nangepe haitu, tadulako nanguli, “Nee muuli ka isema-sema nipopaisanimumo nia haitu ka yaku.” Bo nituduna kabilasa haitu manjili.

I Paulus nikeni hau ri ngayo Gubernur Feliks

23Naupu haitu, tadulako nompokio randua tantarana, bo nanguli ka ira, “Pakasadiamo roatu tantara biasa bo pitupulu tantara mesavi jara, bo roatu tantara motavala. Bongina hitu tinti sasio, komiu kana malai lako ri sii hau ri ngata Kaisarea. 24Pakasadia muni jara rapesavi i Paulus. Kenimo ia bo jagaimo ia pakabelo-belo sampe makava ri ngayo Gubernur Feliks.” 25Naupu sia, tadulako notulisi sura ka i Feliks ivei:

26“Gubernur Feliks nibilaku. Tabe lako nte yaku i Klaudius Lisias.

27I Paulus hitu nisaka ntoYahudi bo sakidepa nipatesiramo. Niepeku ia todea Magau Mbaso Roma, jadi nikeniku salunu tantara nompakasalama ia. 28Naupu haitu nikeniku ia hau ri Polibu Mbaso Agamara, sabana yaku madota mangisani nuapa ntoto salana nipangadukara. 29Ri sia, niepeku pangaduara aga nosinggambela ante atura-atura agamara mboto. Ledo ria salana anu masipato ratarunggu atau rahuku mate ka ia. 30Naupu haitu, niepeku naria nia ntoYahudi mompatesi ia. Jadi kaliu-liu nituduku ia rakeni tou ri ngayomiu. Nituduku muni pura-pura topompangadu ia, kana tou manggeni pangaduara ri ngayomiu.”

31Naupu tadulako notulisi sura haitu, tantara-tantarana nangoseaka anu niparentana ka ira. Nialara i Paulus bo nikenira ia nalai bongina haitu sampe nakava ri ngata Antipatris. 32Naeo mpadondo, pataatu tantara nolipa nggadamo nanjili, bo tantara nojara napolamo nanggeni i Paulus hau ri ngata Kaisarea.

33Nakavapa hamai, tantara nojara haitu nombadekei sura nu tadulakora ka gubernur, bo nidekeira munimo i Paulus ka ia.

34Naupu Gubernur Feliks nombaca sura haitu, nipekutanana i Paulus, “Ri umba ngatamu?”

Nesana i Paulus, “Yaku toKilikia.”

Nisani gubernurpa i Paulus lako ri propinsi Kilikia, anu nambela bagia niparentana, 35niulinamo, “Nabelomo. Kuparesa parakaramu, ane makava topangadu ri sii.” Jadi nituduna tantara mombajagai i Paulus ri banua mbaso nipovia i Herodes bara ipia.

Currently Selected:

Suro-Suro 23: TLEDOV

Highlight

Copy