Khà Làng Bol 35
35
Ală ƀòn dờng cau Lebi dê
1 #
Jôs 21:1-42. Tòm ală ƀlàng ring Môap di gah Jordan đah do Jerikô Yàng Jehôwa đơs mơ Môise lah: 2“Sồr tĕ ală cau Israel ai ală cau Lebi in ală ƀòn dờng nàng ơm bơh di ală sre brê mơ ală cau Israel rơp dòp geh. Mơ ai tĕ bol khai in ală ƀlàng ñhơt ơm gùt dar ală ƀòn dờng. 3Gen bol khai rơp gơs ală ƀòn dờng nàng ơm mơ ală ƀlàng ñhơt ală kơnrồ, belàt mơ ală phan poan jơng ndai bol khai in. 4Ală ƀlàng ñhơt gùt dar ală ƀòn dờng mơ mê ai ală cau Lebi in gơ rơp pò ơnàng dô rbô pram rhiang tal#35:4 pơgap 450 m. bơh di dơrñang ƀòn dờng dê.
5Đah bơdìh ƀòn dờng was tĕ pe rbô tal#35:5 pơgap 900 m. đah mattơngai lik, pe rbô tal đah đơm, pe rbô tal đah mattơngai mut, mơ pe rbô tal đah đang, gơs ƀòn dờng ơm digùl. Bol khai rơp gơs ù tiah hơ̆ lơh gơs ƀlàng ñhơt ală ƀòn dờng in.”#35:5 pơgap 900 m.
Ală ƀòn dờng kìng crŭ
6“Prau nơm tòm ală ƀòn dờng bol mê ai ală cau Lebi in rơp la ală ƀòn dờng kìng crŭ, la tiah dô nă cau neh tơnchơt cau rgơi dô tus ơm tềng hơ̆. Ai tĕ bơtơl tai bol khai in poan jơt bàr nơm ƀòn dờng ndai tai. 7Jơh ală ƀòn bol mê pal ai ală cau Lebi in poan jơt phàm nơm ƀòn dờng, bal mơ ală ƀlàng ñhơt gơ dê. 8Ală ƀòn dờng mơ bol mê ai ală cau Lebi in bơh di ù tiah ală cau Israel dòp geh la pal ai jat sre brê kòp jơi bơtiàn la dờng hala dềt: Ai tĕ oă bơh di jơi bơtiàn gơs oă ƀòn dờng, mơya ai tĕ êt bơh di jơi bơtiàn gơs dô êt.”
9 #
Yalw 19:2-4; Jôs 20:1-9. Gen Yàng Jehôwa đơs mơ Môise lah: 10“Yal tĕ ală cau Israel in mơ đơs mơ bol khai lah: ‘Tòm tŭ bol mê tiă hiòng Jordan mơ mut tòm Kanaan, 11gen sac rwah tĕ dô êt ƀòn dờng lơh gơs ƀòn dờng kìng crŭ bol mê dê, la tiah dô nă cau neh gơtup gơtơl tơnchơt dô nă cau gen khai rgơi dô tus tềng hơ̆. 12Ală ƀòn dờng hơ̆ rơp la ală tiah kìng crŭ bơh di cau sal tê wơl, tồ dô nă cau neh gơkòl glài tơnchơt cau rgơi klàs chơt lài mơ tŭ khai kong cahrña di đap mpồl jơnum. 13Prau nơm ƀòn dờng bol mê ai rơp la ală ƀòn dờng kìng crŭ bol mê dê. 14Ai tĕ prau nơm đah do hiòng Jordan dê mơ prau nơm tòm Kanaan lơh gơs ală ƀòn dờng kìng crŭ. 15Prau nơm ƀòn dờng do rơp la dô bă tiah kìng crŭ ală cau Israel in, ală cau ơm ing in mơ ală làng bol ndai in ơm kis digùl bol khai, tồ cau lơi neh gơtup gơtơl tơnchơt dô nă cau gen khai rgơi dô tus tềng hơ̆.
16Dilah dô nă cau lơi pòng dô nă cau ndai mơ dô nơm phan ngui mơ lòs tian gơs cau hơ̆ chơt, cau pòng hơ̆ la dô nă cau tơnchơt cau; mơ cau tơnchơt cau gen pal kong tơnchơt. 17Hala dilah dô nă cau lơi gơs dô pơnai lŭ tòm tê rgơi tơnchơt cau, mơ khai pòng cau lơi ndai tian gơs cau hơ̆ chơt, gen cau pòng hơ̆ la cau tơnchơt cau; cau tơnchơt cau pal kong tơnchơt. 18Hala dilah dô nă cau lơi gơs tòm tê phan ngui mơ chi rgơi tơnchơt cau, mơ khai pòng dô nă cau ndai tian gơs cau hơ̆ chơt, gen cau pòng hơ̆ la cau tơnchơt cau; cau tơnchơt cau pal kong tơnchơt. 19Cau sal tê bơh mhàm rơp tơnchơt cau neh tơnchơt cau; tòm tŭ khai tìp cau tơnchơt cau hơ̆, khai pal tơnchơt cau hơ̆. 20Dilah gơs dô nă cau lơi gơs nùs gơjrañ mañ kòñ tơnchơt cau mơ khai chồl tơlo dô nă cau ndai hala kòñ tơng phan lơi di cau hơ̆ tian gơs cau hơ̆ chơt 21hala dilah tòm bơta gơjrañ mañ khai kơndap tê lơh cau hơ̆ chơt, cau hơ̆ pal kong tơnchơt; khai la dô nă cau tơnchơt cau. Cau sal tê bơh mhàm rơp tơnchơt khai tòm tŭ tìp khai.
22Mơya dilah gơs dô nă cau ò gơs nùs gơjrañ mañ mơ chồl tơlo dô nă cau ndai hala nisơna tơng phan lơi di khai, 23hala ò gŏ khai mơ tơndùh dô pơnai lŭ hơđang khai rgơi lơh khai in chơt, mơ khai chơt, gen tài bơh khai ò di la cau sò tơm mơ tài bơh khai ò gơs nùs kòñ lơh iơh di cau hơ̆, 24mpồl jơnum pal cahrña digùl cau hơ̆ mơ ală cau sal tê bơh mhàm jat ală jơnau sồr lam do. 25Mpồl jơnum pal dong gàr cau kong yă neh tơnchơt cau bơh di cau sal tê bơh mhàm mơ sồr cèng brê khai wơl hơ ƀòn dờng kìng crŭ la tiah khai neh dô tus. Khai pal ơm tềng hơ̆ jơl tus di tŭ chơt cau gơnoar lam bồ ơn phan duh khoai, la cau neh geh bong mơ mơñà sàng goh. 26Mơya dilah tŭ lơi cau neh kong yă hơ̆ lik lòt đah bơdìh ală nhàr neh lơh nền gùt dar ƀòn dờng kìng crŭ la tiah khai neh dô tus 27mơ cau sal tê bơh mhàm tìp khai đah bơdìh ƀòn dờng, cau sal tê bơh mhàm rgơi tơnchơt cau kong yă hơ̆ mơ ò gơkòl glài tơnchơt cau. 28Cau kong yă pal ơm tòm ƀòn dờng kìng crŭ khai dê jơl tus di tŭ cau gơnoar dờng ơn phan duh khoai chơt; mìng tơnơ̆ mơ tŭ chơt cau gơnoar dờng ơn phan duh khoai sồng khai rgơi rê wơl hơ sre brê tòm khai dê.
29Hơ̆ la ală bơta sồr lam jat bơta boh lam mê in mơ jơh ală rài rơp tus in, bulah ơm tiah lơi kung behơ̆ sơl.
30 #
Yalw 17:6; 19:15. Cau lơi tơnchơt dô nă cau gen pal kong tơnchơt kung be dô nă cau tơnchơt cau mìng jat jơnau lơh cơng ală cau lơh cơng dê. Mơya ò gơs cau lơi rơp kong lơh glài tơnchơt dilah gơs jơnau lơh cơng mìng dô nă cau lơh cơng dê lơm.
31Bañ dòp phan tơwài bơta kis dô nă cau tơnchơt cau, la cau pal kong chơt. Ngan la khai pal kong tơnchơt. 32Bañ dòp phan tơwài bơta kis cau lơi neh dô tus hơ dô nơm ƀòn dờng kìng crŭ tồ khai geh gơnoar rê wơl mơ kis tòm lơgar tòm khai dê lài mơ bơta chơt cau gơnoar dờng ơn phan duh khoai dê. 33Bañ lơh ƀơ̆ ƀơl lơgar mê ơm kis. Lơh gơhòr mhàm la lơh ƀơ̆ ƀơl lơgar, mơ phan ơn tơwài glài ò rgơi tơwài wơl ù tiah mơ mhàm neh tuh hơđang, lòi mìng mhàm cau neh lơh gơtuh mhàm gơ dê, 34Bañ lơh ƀơ̆ ƀơl lơgar la tiah bol mê ơm mơ la tiah Añ ơm sùm, bơh Añ la Yàng Jehôwa ơm sùm digùl ală cau Israel.’”
Currently Selected:
Khà Làng Bol 35: KPM2018
Highlight
Copy
Compare
Share
Want to have your highlights saved across all your devices? Sign up or sign in
© 2018 United Bible Societies. All rights reserved.
