Khà Làng Bol 34
34
Nhàr lơgar Kanaan dê
1Yàng Jehôwa đơs mơ Môise lah: 2“Ai tĕ jơnau gơnoar sồr ală cau Israel in mơ đơs mơ bol khai lah: ‘Tòm tŭ bol mê mut tòm Kanaan, ù tiah rơp tă khà ai bol mê in lơh gơs sre brê rơp gơs ală nhàr gơ dê: 3Đah đơm lơgar bol mê dê rơp tơrgòm bal dô pơnah ƀlàng ngềt ngơt Jin rò gah nhàr lơgar Edôm. Đah mattơngai lik, nhàr đah đơm lơgar bol mê dê rơp sơntòm bơh di tiah lồi dut Dàlềng Boh, 4nhàr bol mê pal wèt đah đơm kơh mơnơm Akrapbim, lòt tơn tus hơ Jin mơ lik hơ nhàr đah đơm Kades Barnea, gen gơ rơp lòt tus tơn hơ Hajar Atdar mơ tus hơ Asmôn, 5nhàr bơh Asmôn pơdar tus hơ croh dà Ejiptơ, mơ gơ dơh wơl di dàlềng.
6Nhàr đah mattơngai mut lơgar bol mê dê rơp la gah Dàlềng Dờng.#34:6 Hơ̆ la Dàlềng Ơm Digùl Ù, jơnau Yoan la «Địa Trung Hải». Hơ̆ rơp la nhàr lơgar bol mê dê di đah mattơngai mut.
7Bơh nhàr đah đang lơgar bol mê dê gen lơh tĕ dô nơm gùng bơh di Dàlềng Dờng tus hơ mơnơm Hor, 8mơ bơh di mơnơm Hor tus di Lebô Hamat, mơ tiah lik hơ nhàr lơgar rơp lòt tus hơ Jedat, 9gen nhàr lòt tơn tus hơ Jiprôn mơ dơh wơl di Hajar Enan. Hơ̆ rơp la nhàr đah đang lơgar bol mê dê.
10Bơh nhàr đah mattơngai lik lơgar bol mê dê gen lơh tĕ dô nơm gùng bơh di Hajar Enan tus hơ Sepham. 11Nhàr lơgar rơp bơh di Sepham tus hơ Riplah đah mattơngai lik Ain dê mơ lòt tơn rò gah ală kơh mơnơm đah mattơngai lik dàlềng Kineret,#34:11 Tòm Sră Bơta Ho Bal Pa sơnđan la dàlềng Genesaret. Tiberias, hala Gaile. 12mơ nhàr rơp mù tus hơ hiòng Jordan mơ lồi di Dàlềng Boh.#34:12 Hala Dàlềng Chơt. Hơ̆ rơp la lơgar bol mê dê, bal mơ ală nhàr gơ dê tòm kòp đah.’”
13 #
Khà 26:52-56. #
Jôs 14:1-5. Môise ai jơnau gơnoar sồr ală cau Israel in mơ đơs lah: “Tă khà tòmpà tĕ lơgar lơh gơs sre brê. Yàng Jehôwa neh ai jơnau gơnoar sồr lah gơ rơp geh ai sin jơi bơtiàn mơ nggùl in, 14tài bơh ală hìu nhă jơi bơtiàn Ruben, jơi bơtiàn Gat mơ nggùl jơi bơtiàn Manase neh dòp geh sre brê bol khai dê rau. 15Bàr jơi bơtiàn mơ nggùl hơ̆ neh dòp geh sre brê bol khai dê ơm đah ne Jordan Jerikô dê, đah mattơngai lik.”
16Yàng Jehôwa đơs mơ Môise lah: 17“Do la sơnđan mat ală cau rơp gơs broă tòm tòmpà lơgar bol mê in lơh gơs sre brê: Eleajar cau gơnoar ơn phan duh khoai mơ Jôsue kòn klau Nun, 18mơ pồ bơtào tĕ dô nă cau at bồ tòm kòp nơm jơi bơtiàn nàng dong kòl tòm bơta tòmpà lơgar.
19Do la sơnđan mat bol khai dê: Kalep kòn klau Jephune bơh di jơi bơtiàn Juda; 20Semuel kòn klau Ammihut bơh di jơi bơtiàn Simeôn; 21Elidat kòn klau Kislôn bơh di jơi bơtiàn Benjamin; 22Bukki kòn klau Jogli, cau at bồ bơh di jơi bơtiàn Dan; 23Hanniel kòn klau Ephot, cau at bồ bơh di jơi bơtiàn Jôsep; 24Kemuel kòn klau Siptan, cau at bồ bơh di jơi bơtiàn Epraim kòn klau Jôsep; 25Elijaphan kòn klau Pharnac, cau at bồ bơh di jơi bơtiàn Jebulun; 26Paltiel kòn klau Asjan, cau at bồ bơh di jơi bơtiàn Isakar, 27Ahihut kòn klau Selômi, cau at bồ bơh di jơi bơtiàn Aser; 28Pedahel kòn klau Ammihut, cau at bồ bơh di jơi bơtiàn Neptali.” 29Hơ̆ la ală cau klau mơ Yàng Jehôwa neh ai jơnau gơnoar sồr tòmpà sre brê ală cau Israel in tòm lơgar Kanaan.
Currently Selected:
Khà Làng Bol 34: KPM2018
Highlight
Copy
Compare
Share
Want to have your highlights saved across all your devices? Sign up or sign in
© 2018 United Bible Societies. All rights reserved.
