Khà Làng Bol 25
25
Môap pơrlồm ơniai Israel
1Tòm tŭ Israel ơm tòm Sittim, ală cau klau rơp sơntòm tìs glài rềs àr mơ ală cau ùr Môap. 2Ală cau ùr hơ̆ neh jà bol khai sa ală phan ơn duh khoai ală yàng bol khai dê. Làng bol neh sa mơ cùn khoai di đap ală yàng hơ̆. 3Behơ̆ Israel lơh gơs dô bă bal tòm bơta duh khoai Baal Pheor dê. Mơ bơta gơhào gơjrañ Yàng Jehôwa dê gơhào khuh tòmdră mơ bol khai. 4Yàng Jehôwa đơs mơ Môise lah: “Kup tĕ jơh ală cau kwang at bồ làng bol do dê, tơnchơt bol khai mơ yồng ƀồc bol khai tòm bơta àng mattơngai dê di đap Yàng Jehôwa tồ bơta gơjrañ dờng Kơnràñ dê digơlan rơp geh rài bơh di Israel.” 5Behơ̆, Môise đơs mơ ală cau kwang cahrña Israel dê lah: “Kòp nă tòm bol mê pal tơnchơt ală cau gơp bơtiàn he la ală cau tui yô bal tòm bơta duh khoai Baal Pheor dê.”
6Tŭ hơ̆, dô nă cau klau Israel cèng tơmut tòm hìu nhă khai dê dô nă cau ùr Midian di đap mat Môise mơ jơh dô mpồl jơnum Israel dê, tòm tŭ bol khai ơm ñìm rac di tiah mpồng mut Sàl Tòm Mat dê. 7Tòm tŭ Phineas kòn klau Eleajar, la sau Arôn cau gơnoar ơn phan duh khoai neh gŏ bơta hơ̆, khai sang lòi mpồl jơnum, at dô nơm tà tòm tê khai dê, 8mơ lòt jat cau Israel mut tòm sàl ơm. Khai ai tà srơp bluh bàr nă bol hơ̆, srơp bluh cau Israel mơ bluh să jan cau ùr dê. Gen bơta kòp jê pluh plàng tơnroh cau Israel dơh wơl. 9Mơya ntum khà cau neh chơt tòm bơta pluh plàng hơ̆ la bàr jơt poan rbô nă.
10Yàng Jehôwa đơs mơ Môise lah: 11“Phineas kòn klau Eleajar, sau Arôn cau gơnoar ơn phan duh khoai, neh lơh Añ in rài bơta gơjrañ dờng bơh di cau Israel, khai kung duh hul be Añ bơh bơta ryŭ ryơm Añ jê digùl bol khai, tài behơ̆ tòm bơta duh hul Añ jê Añ ò gŏ tơnroh bol khai. 12Gen tàng, yal tĕ khai in lah Añ bơtào bơta ho bal ring lơngai Añ jê mơ khai 13Khai mơ ală kòn sau khai dê rơp gơs dô bơta ho bal gam sùm sùm tòm gơnoar broă ơn phan duh khoai, tài bơh khai neh duh hul bơh bơta ryŭ ryơm Yàng Tom Trồ khai dê, mơ neh lơh gơs bơta tơwài glài cau Israel in.”
14Sơnđan mat cau Israel neh gơkòl tơnchơt bal mơ cau ùr Midian la Jimri kòn klau Salu, cau kwang at bồ dô hìu nhă cau Simeôn. 15Mơ sơnđan mat cau ùr Midian neh gơkòl tơnchơt la Kôsbi kòn ùr Jur, dô nă cau kwang at bồ jơi bơtiàn hìu nhă Midian dê.
16Yàng Jehôwa đơs mơ Môise lah: 17“Gơwèt tĕ hơ cau Midian kung be cau sò tơm mơ tơnchơt tĕ bol khai, 18tài bơh bol khai gơwèt hơ bol mê kung be cau sò tơm tòm tŭ bol khai pơrlồm ơniai bol mê tòm broă Pheor dê mơ bi ùr bol khai dê la Kôsbi, kòn ùr dô nă cau kwang at bồ Midian, hơ̆ la cau ùr neh kòl tơnchơt tòm tŭ bơta kòp jê pluh plàng gơlik gơs tài bơh Pheor.”
Currently Selected:
Khà Làng Bol 25: KPM2018
Highlight
Copy
Compare
Share
Want to have your highlights saved across all your devices? Sign up or sign in
© 2018 United Bible Societies. All rights reserved.
