Khà Làng Bol 20
20
Bơta chơt Miriam dê
1Tòm kơnhai dùl, jơh dô mpồl jơnum cau Israel tus hơ ƀlàng ngềt ngơt Jin, mơ bol khai ơm dơh wơl tòm Kades. Tềng hơ̆ Miriam chơt mơ geh tơp.
Dà gơlik bơh di lŭ klềr tòm Meriba
(Lik Ejiptơ 17:1-7)
2 #
Lik 17:1-7. Mơ tai, ò gơs dà mpồl jơnum in, mơ làng bol pơjum bal tòmdră mơ Môise mơ Arôn. 3Bol khai tòmlah mơ Môise mơ đơs lah: “Niam rlau la bol hi neh chơt tòm tŭ oh mi bol hi dê gơpừ chơt di đap Yàng Jehôwa! 4Ñchi bơh tài ồng cèng mpồl jơnum Yàng Jehôwa dê tus tòm ƀlàng ngềt ngơt nàng bol hi mơ mpồl phan poan jơng bol hi dê pal chơt tềng do taih? 5Ñchi bơh tài ồng cèng bol hi lik lòt bơh di Ejiptơ tus hơ tiah iơh rmơh do taih? Tềng do ò gơs kòi mbo hala plai chi ƀal, plai ño hala plai lừu. Mơ ò gơs dà nàng hùc!”
6Môise mơ Arôn lòt bơh di mpồl jơnum tus hơ mpồng mut Sàl Tòm Mat dê mơ tơmbic să blup mat tòm ù, mơ bơta gơklŏ Yàng Jehôwa dê tơlik mơ bol khai. 7Yàng Jehôwa đơs mơ Môise lah: 8“At tĕ gai jra, gen mê mơ Arôn bi mê dê hòi mpồl jơnum pơjum bal. Đơs tĕ mơ lŭ ne di đap bol khai mơ gơ rơp gơlik dà. Mê rơp cèng dà gơlik bơh di lŭ klềr mpồl jơnum in tồ bol khai mơ mpồl phan poan jơng bol khai in hùc.”
9Behơ̆ Môise ai gai jra bơh di đap Yàng Jehôwa, tòm toh jat be Kơnràñ neh sồr khai. 10Khai mơ Arôn hòi mpồl jơnum pơjum bal di đap pơnai lŭ, mơ Môise đơs mơ bol khai lah: “Ơ ală cau jak tòmdră, dan ơm iat do: Bol hi pal cèng bol mê in dà gơlik bơh pơnai lŭ do sơl ơ?” 11Gen Môise yò tơwòr tê mơ ai gai jra khai dê pòng pơnai lŭ tòm bàr dơ̆. Dà hòr lik, mơ mpồl jơnum bal mơ mpồl phan poan jơng bol khai dê hùc.
12Mơya Yàng Jehôwa đơs mơ Môise mơ Arôn lah: “Tài bơh bol mê ò dòn kơnòm di Añ, nàng ràng tơlik Añ la sàng goh di đap ală cau Israel, bol mê ò cèng mpồl jơnum do mut tòm lơgar Añ ai bol khai in.”
13Hơ̆ la tòm dà Meriba#20:13 Meriba: Tòm jơnau Hebrơ, jơnau do gơs gơtha la “jòi jơnau”. la tiah cau Israel tòm pơndang mơ Yàng Jehôwa, mơ la tiah Kơnràñ neh ràng tơlik să tòm Kơnràñ sàng goh digùl bol khai.
Edôm ò ai Israel lòt gan
14Môise sồr ală cau kong sồr lòt bơh di Kades tus hơ bơtau Edôm mơ đơs lah: “Israel oh bơtau dê đơs be do: Bơtau git jơh ală bơta bòl glar kalke neh gơtơntus hơđang bol hi. 15Ală ồng pàng bol hi dê neh mù tòm Ejiptơ, mơ bol hi neh ơm tềng hơ̆ jŏ sơnam. Cau Ejiptơ gơwèt iơh mơ bol hi mơ ală ồng pàng bol hi dê, 16mơya tòm tŭ bol hi hòi driau mơ Yàng Jehôwa, Kơnràñ neh kơno jơnau hòi driau bol hi dê mơ sồr dô nă cau gơnrơh cèng bol hi lik bơh di Ejiptơ. Tŭ do bol hi ơm tòm Kades la dô nơm ƀòn dờng ơm lồi di nhàr ù tiah bơtau dê. 17Dan ai bol hi in lòt gan lơgar bơtau dê. Bol hi rơp ò lòt gan ƀlàng sre hala suơn ño lơi, hala hùc dà bơh di tơrlung lơi. Bol hi rơp lòt jat gùng dờng mơ ò dah đah ma hala đah kiau jơl tus di tŭ bol hi neh lòt gan lơgar bơtau dê.”
18Mơya Edôm ho wơl lah: “Bol mê ò di lòt gan tềng do; dilah bol mê pơnđơl lòt gen bol hi rơp lik lòt mơ ai đào brồ lơh bol mê.” 19Cau Israel ho wơl lah: “Bol hi rơp lòt jat gùng dờng, mơ dilah bol hi hala mpồl phan poan jơng bol hi dê hùc dà lơi bơtau dê gen bol hi rơp tơm jền dà hùc hơ̆. Bol hi kòñ mìng lòt gan mơ jơng lơm, ò kòñ bơta lơi ndai.” 20Bol khai ho wơl tai lah: “Bol mê ò di lòt gan.” Gen cau Edôm lik lòt mơ dô mpồl ling dờng mơ pràn kơldang ngan tòmdră mơ Israel. 21Tài bơh cau Edôm ò ai cau Israel in lòt gan lơgar bol khai dê gen cau Israel pơrlac wơl bơh di bol hơ̆.
Arôn sang rài
22Jơh dô mpồl jơnum cau Israel dê lik lòt bơh di Kades mơ tus hơ mơnơm Hôr. 23Di mơnơm Hôr, rềp di nhàr lơgar Edôm, Yàng Jehôwa đơs mơ Môise mơ Arôn lah: 24“Arôn rơp geh cèng tus bal mơ ồng pàng khai dê. Khai rơp ò mut tòm lơgar Añ ai cau Israel in, tài bơh bàr nă bol mê tòmdră mơ jơnau sồr Añ jê tòm dà Meriba. 25Ai tĕ Arôn mơ Eleajar kòn klau khai dê mơ lam bol khai guh hơ mơnơm Hôr. 26Hồ tĕ ồi ào Arôn dê mơ tơnsoh Eleajar in la kòn klau khai dê, bơh Arôn rơp geh tă cèng ơm bal mơ ồng pàng khai dê; khai rơp chơt tềng hơ̆.” 27Môise lơh jat tòm toh be jơnau Yàng Jehôwa neh sồr: Bol khai guh hơ mơnơm Hôr di đap mat jơh dô mpồl jơnum. 28#Lik 29:29; Khà 33:38; Yalw 10:6.Môise hồ ală ồi ào Arôn dê mơ tơnsoh Eleajar in la kòn klau Arôn dê. Mơ Arôn chơt tềng hơ̆, hơđang bồ mơnơm. Gen Môise mơ Eleajar mù bơh mơnơm, 29mơ tòm tŭ jơh dô mpồl jơnum neh git la Arôn neh chơt rau, jơh dô hìu Israel ñìm rac bơh khai tòm pe jơt ngai.
Currently Selected:
Khà Làng Bol 20: KPM2018
Highlight
Copy
Compare
Share
Want to have your highlights saved across all your devices? Sign up or sign in
© 2018 United Bible Societies. All rights reserved.
