Lik Ejiptơ 40

Pơjum ơn Hìu Ing Duh Khoai

1Yàng Jehôwa đơs mơ Môise lah: 2“Mê bơtào tĕ Hìu Ing Duh Khoai la Sàl Tòm Mat tòm ngai dùl kơnhai dùl. 3Ơn tĕ tòm hơ̆ Đài Bơta Cơng Tàng, lồc behơ̆ ai bài kơrnìng cang kìng gơ. 4Cèng tus tĕ cơnòng mơ ràng tơlik tĕ ală phan gơrê bal mơ gơ. Gen cèng tơmut tĕ jơng đèng mơ ơn ală đèng di tiah gơ dê. 5Ơn tĕ cơnòng màh chu kơlhô di đap Đài Cơng Tàng mơ yồng bài kơrnìng di mpồng mut Hìu Ing Duh Khoai dê. 6Ơn tĕ cơnòng ơn phan chu pơrguc di đap mpồng mut Hìu Ing Duh Khoai la Sàl Tòm Mat; 7ơn tĕ thùng dà di tiah digùl Sàl Tòm Mat mơ cơnòng duh khoai mơ tuh dà tòm hơ̆. 8Bơtào tĕ ƀlàng jơng hìu gùt dar gơ mơ yồng bài kơrnìng di mpồng mut ƀlàng jơng hìu.

9Ai tĕ mơñà bong mơ bong Hìu Ing Duh Khoai mơ jơh ală phan tòm hơ̆; ơn is sàng goh Hìu Ing Duh Khoai bal mơ jơh ală phan bal mơ gơ, gen gơ rơp gơlik sàng goh. 10Gen bong tĕ mơñà cơnòng ơn phan chu pơrguc bal mơ jơh ală phan ngui bal mơ gơ; ơn is sàng goh cơnòng duh khoai gen gơ rơp gơlik gơs sàng goh rlau jơh. 11Bong mơñà tĕ thùng dà mơ jơng gơ dê; ơn is gơ sàng goh. 12Cèng tĕ Arôn mơ ală kòn klau khai dê tus di mpồng mut Sàl Tòm Mat dê mơ ai dà rào goh bol khai.

13Gen tơnsoh tĕ Arôn in ală ồi ào ơn is sàng goh, bong mơñà khai in mơ ơn is khai sàng goh nàng khai rơp gơs cau gơnoar ơn phan duh khoai duh broă Añ. 14Cèng tus tĕ ală kòn klau khai dê mơ tơnsoh bol khai in ào liah, 15bong tĕ mơñà bol khai in kung be mê neh bong mơñà bèp bol khai in nàng bol khai rơp gơs ală cau gơnoar ơn phan duh khoai duh broă Añ. Bơta bong mơñà bol khai in nàng gơs cau gơnoar ơn phan duh khoai rơp gơpơnjat tus di ală rài tơnơ̆.”

16Môise lơh jơh ală bơta tòm toh jat be Yàng Jehôwa neh sồr khai.

17Behơ̆ Hìu Ing Duh Khoai neh geh bơtào tòm ngai dùl kơnhai dùl nam bàr. 18Tòm tŭ Môise bơtào Hìu Ing Duh Khoai, khai ơn ală trồm jrong mơnàng di tiah gơ dê, bơtào ală mpàn, tơmut ală ròc dra digùl mơ bơtào ală jrong. 19Lồc behơ̆ khai ai sàl tìm hơđang Hìu Ing Duh Khoai mơ lă ală blah gơltau hơđang tòm toh jat be jơnau Yàng Jehôwa neh sồr khai.

20Khai kung ai Mpàn Cơng Tàng mơ ơn gơtòm đài, tơmut ală mơng tùng đài dê mơ ơn bơnap bơta tơwài glài hơđang đài. 21Gen khai tùng đài tơmut tòm Hìu Ing Duh Khoai mơ yồng bài kơrnìng cang Đài Bơta Cơng Tàng tòm toh jat be jơnau Yàng Jehôwa neh sồr khai.

22Môise ơn cơnòng tòm Sàl Tòm Mat di tiah đah Hìu Ing Duh Khoai, bơdìh bài kơrnìng; 23mơ pràng piang lă pơdơng hơđang gơ, di đap Yàng Jehôwa, tòm toh jat be jơnau Yàng Jehôwa neh sồr khai. 24Khai ơn jơng đèng tòm Sàl Tòm Mat, di đah đơm Hìu Ing Duh Khoai, tòm toh mat mơ cơnòng, 25mơ chu ồs ală đèng di đap Yàng Jehôwa, tòm toh jat be jơnau Kơnràñ neh sồr khai. 26Môise ơn cơnòng màh tòm Sàl Tòm Mat, di đap bài kơrnìng, 27mơ chu kơlhô ƀô bơlhu hơđang hơ̆, tòm toh jat be jơnau Yàng Jehôwa neh sồr khai. 28Gen khai yồng bài kơrnìng di mpồng mut Hìu Ing Duh Khoai.

29Khai ơn cơnòng ơn phan chu pơrguc rềp di mpồng mut Hìu Ing Duh Khoai la Sàl Tòm Mat, mơ ơn hơđang hơ̆ ală phan ơn chu pơrguc, mơ ală phan ơn mơ kòi mbo, tòm toh jat be jơnau Yàng Jehôwa neh sồr khai. 30Khai ơn thùng dà di tiah digùl Sàl Tòm Mat mơ cơnòng duh khoai, mơ tuh dà tòm hơ̆ nàng rào goh, 31Môise, Arôn bal mơ ală kòn klau khai ngui thùng dà hơ̆ rào tê mơ jơng bol khai dê. 32Tŭ lơi bol khai mut tòm Sàl Tòm Mat hala tus rềp di cơnòng duh khoai gen bol khai rào goh tòm toh jat be jơnau Yàng Jehôwa neh sồr Môise.

33Gen Môise bơtào ƀlàng jơng gùng gùt dar Hìu Ing Duh Khoai mơ cơnòng duh khoai, mơ yồng bài kơrnìng di mpồng mut tòm ƀlàng jơng gùng dê. Behơ̆, Môise neh lơh sir jơh ală broă.

Bơta gơklŏ Yàng Jehôwa dê

(Khà Làng Bol 9:15-23)

34 # I Bơtau 8:10-11; Esai 6:4; Ejek 43:4-5; Yalt 15:8. Gen gơs dô puk mhwal jơm gòm Sàl Tòm Mat, mơ bơta gơklŏ Yàng Jehôwa dê bềng lìu Hìu Ing Duh Khoai. 35Môise ò rgơi mut tòm Sàl Tòm Mat tài bơh gơs puk mhwal jơm gòm hơđang gơ, mơ bơta gơklŏ Yàng Jehôwa dê bềng lìu Hìu Ing Duh Khoai.

36Tòm jơh ală gùng lòt làng bol Israel dê, tŭ lơi puk mhwal guh bơh di hơđang Hìu Ing Duh Khoai gen bol khai lik lòt; 37mơya dilah puk mhwal ò guh hơđang gen bol khai ò lik lòt, jơl tus di ngai puk mhwal guh hơđang. 38Behơ̆, puk mhwal Yàng Jehôwa dê ơm hơđang Hìu Ing Duh Khoai tòm trồ ngai, mơ gơs ồs tòm mhwal tòm trồ mang, di đap mat jơh làng bol Israel tòm jơh ală gùng lòt bol khai dê.

Currently Selected:

Lik Ejiptơ 40: KPM2018

Highlight

Copy

Compare