Lik Ejiptơ 39
39
Ồi ào ală cau gơnoar ơn phan duh khoai dê
1Bol khai ngui che brài dà tơlir trồ, dà gur mơ dà phồng mơ lơh gơs ală ồi ào nàng duh broă tòm Tiah Sàng Goh. Bol khai kung lơh gơs ală ồi ào ơn is sàng goh Arôn in jat be Yàng Jehôwa neh sồr Môise.
Ephot
2Bol khai lơh ephot mơ màh, mơ che brài dà tơlir trồ, dà gur, dà phồng, mơ che dơmài lơbơn. 3Bol khai klơn màh lơho be ală pang sră mơ siat gơs che jòng nàng tòmbơcă bal mơ che brài dà tơlir trồ, dà gur, mơ dà phồng, mơ bài che dơmài lơbơn, hơ̆ la broă dô nă cau chài rgơi lơh. 4Bol khai jing ală chèo pơnì ephot dê, ơn di bàr mum gơ dê nàng rgơi kơt bal. 5Che tàñ hàng mơnĕ kơt ntơh kung behơ̆, gơ gơs dô bă bal mơ ephot mơ lơh gơs mơ màh bal mơ che brài dà tơlir trồ, dà gur, dà phồng, mơ bài che dơmài lơbơn, tòm toh jat be jơnau Yàng Jehôwa neh sồr Môise. 6Bol khai klơn tòm dơwàng màh ală lŭ màng gơcrà neh pac sơnđan ală kòn klau Israel dê, pac be cau pac ƀang kì 7Gen bol khai kơt gơ di ală chèo pơnì ephot dê nàng lơh gơs lŭ màng kirsơnre bơh ală kòn klau Israel dê, tòm toh jat be jơnau Yàng Jehôwa neh sồr Môise.
Chèo kơt ntơh
8Bol khai kung lơh gơs chèo kơt ntơh, hơ̆ la broă dô nă cau chài rgơi lơh. Bol khai lơh gơ kung be lơh ephot, hơ̆ la mơ màh bal mơ che brài dà tơlir trồ, dà gur, dà phồng, mơ bài che dơmài lơbơn. 9Gơ gơs poan gah ring bal, jòng dô emban,#39:9 Dô emban ndròm mơ dô nđàm tê. ơnàng dô emban. 10Bol khai pơnđềt hơđang gơ poan sèng lŭ màng: sèng dùl gơs lŭ kĕ phồng, lŭ kĕ gur, mơ lŭ màng tơlir dà; 11sèng bàr gơs lŭ màng gơcrà, lŭ màng tơlir trồ mơ lŭ màng tơlir ñhơt; 12sèng pe, lŭ màng gur tơlir, lŭ màng pơrhê, mơ lŭ màng gur; 13sèng poan gơs lŭ màng rmit, lŭ kĕ pơrhê mơ lŭ màng gơcrà. Ală lŭ màng do rơp ơn tòm ală dơwàng màh bơka hàng mơnĕ. 14Gơs jơt bàr nơm lŭ màng, dô nơm pac dô sơnđan kòn klau Israel dê, pac kung be cau pac ƀang kì hơđang kòp nơm dô sơnđan tòm jơt bàr sơnđan jơi bơtiàn dê.
15Di chèo dềt kơt ntơh bol khai lơh ală che rơnjài mơ màh ngan, tàñ bal be dô dang che. 16Bol khai lơh bàr nơm dơwàng mơ màh bơka hàng mơnĕ mơ bàr nơm dơwàng di bàr mum chèo kơt ntơh, 17Bol khai kơt bàr dang che rơnjài màh tòm bàr nơm kòng hơ̆ di ală mum chèo kơt ntơh, 18mơ kơt bồ đah ne ală che rơnjài tòm bàr nơm dơwàng, kơt gơtòm ală chèo dềt di pơnì ephot, đah đap. 19Bol khai lơh bàr nơm dơwàng mơ kơt gơ di bàr mum đah ne chèo kơt ntơh, đah dơlam di gah ephot. 20Mơ bol khai lơh bàr nơm dơwàng màh ndai tai mơ kơt gơ di tiang đah đap ală chèo pơnì ephot dê, rềp di gùng jing hơđang che kơt but ephot dê. 21Bol khai ai dô dang che tơlir trồ mơ kơt ală dơwàng chèo kơt ntơh tòm ală dơwàng ephot dê, tồ gơđềt bal mơ che kơt di but nàng chèo kơt ntơh ò sơntă bơh di ephot, tòm toh jat be jơnau Yàng Jehôwa neh sồr Môise.
Ală ồi ào ndai cau gơnoar ơn phan duh khoai dê
22Bol khai lơh ào jrùh ephot dê mơ bài dà tơlir trồ, hơ̆ la broă dô nă cau chài rgơi tàñ. 23Ào jrùh hơ̆ gơs trồm digùl gơlơh kung be ngko ào, jing gùt dar nàng ò sèt. 24Bol khai bơrkoat ală plai lừu mơ che brài dà tơlir trồ, dà gur, dà phồng mơ bài che dơmài lơbơn gùt dar tiang ào jrùh. 25Mơ bol khai lơh ală tang liang mơ màh ngan, mơ pơnđềt gơ digùl ală plai lừu gùt dar tiang ào jrùh; 26Ală plai lừu mơ ală tang liang gơ ơm pơnjat dô nơm do gen dô nơm ne gùt dar tiang ào jrùh soh tòm tŭ duh broă tòm Hìu Ing Duh Khoai tòm toh jat be jơnau Yàng Jehôwa neh sồr Môise.
27Bol khai lơh gơs ào liah soh dơlam mơ bài che dơmài lơbơn Arôn mơ ală kòn klau khai in, hơ̆ la broă lơh dô nă cau chài rgơi tàñ, 28bal mơ chèo pùt bồ mơ bài che dơmài lơbơn, ală che kơt di bồ mơ bài che dơmài, mơ ală ồi ào soh tòm dơlam mơ bài che dơmài lơbơn. 29Chèo pơnì mơ bài che dơmài lơbơn mơ che brài dà tơlir trồ, che brài dà gur, dà phồng, hơ̆ la broă dô nă cau chài rgơi jing bơka, tòm toh jat be jơnau Yàng Jehôwa neh sồr Môise.
30Bol khai ngui màh ngan lơh gơs dô pet dềt, ngui be sơgơn ơn is sàng goh, pac hơđang gơ be cau pac ƀang kì ală jơnau do: SÀNG GOH YÀNG JEHÔWA IN. 31Lồc behơ̆, bol khai ai dô dang che dà tơlir trồ mơ kơt gơ di chèo pùt bồ, tòm toh jat be jơnau Yàng Jehôwa neh sồr Môise.
Môise sền sơwì Hìu Ing Duh Khoai
32Behơ̆, jơh ală broă bơt bơtào Hìu Ing Duh Khoai, la Sàl Tòm Mat, neh lơh sir rau. Làng bol Israel lơh jơh ală bơta tòm toh jat be ală jơnau Yàng Jehôwa neh sồr Môise. 33Bol khai cèng Hìu Ing Duh Khoai tus hơ Môise: sàl mơ jơh ală phan ngui bal mơ sàl, ală kơlnĕ, ală mpàn, ròc dra, ală jrong mơ ală trồm jrong gơ dê. 34Phan tìm hơđang mơ gơltau belàt dam ñòm pơrhê, phan tìm hơđang mơ gơltau ka sur, mơ bài kơrnìng cang kìng Tiah Sàng Goh Ngan; 35Đài Bơta Cơng Tàng bal mơ ală mơng tùng, mơ bơnap bơta nđàc; 36cơnòng mơ jơh ală phan ngui bal mơ cơnòng mơ piang lă ơn pràng; 37jơng đèng mơ màh ngan bal mơ dô sèng ală đèng gơ dê mơ jơh ală phan ngui bal mơ gơ, mơ mơñà chu đèng; 38cơnòng duh khoai mơ màh, mơ mơñà bong, kơlhô ƀô bơlhu, bài kơrnìng mpồng mut tòm sàl; 39cơnòng duh khoai mơ kòng bal mơ lơ-i kòng gơ dê, mơng tùng bal mơ jơh ală phan ngui bal mơ gơ, thùng dà bal mơ jơng gơ dê; 40ală bài kơrnìng ƀlàng jơng hìu dê bal mơ ală jrong, mơ trồm jrong gơ dê, mơ bài kơrnìng mpồng mut di ƀlàng jơng hìu; ală che kơt mơ ală mơng sơntơp sàl, jơh ală phan ngui bal mơ Hìu Ing Duh Khoai mơ Sàl Tòm Mat dê; 41ală ồi ào ơn is nàng duh broă tòm Tiah Sàng Goh, ồi ào ơn is sàng goh Arôn in la cau gơnoar ơn phan duh khoai, bal mơ ồi ào ală kòn klau khai dê tòm tŭ duh broă kung be ală cau gơnoar ơn phan duh khoai.
42Làng bol Israel neh lơh jơh ală broă do tòm toh jat be jơnau Yàng Jehôwa neh sồr Môise. 43Môise sền sơwì ală broă mơ gŏ bol khai neh lơh tòm toh jat be Yàng Jehôwa neh sồr. Behơ̆ Môise ai lơngai bol khai in.
Currently Selected:
Lik Ejiptơ 39: KPM2018
Highlight
Copy
Compare
Share
Want to have your highlights saved across all your devices? Sign up or sign in
© 2018 United Bible Societies. All rights reserved.
