Lik Ejiptơ 32
32
Kơnrồ kòn mơ màh
1 #
Broă 7:40. Tòm tŭ làng bol gŏ Môise ơm jŏ mơ ò mù bơh hơđang mơnơm, gen bol khai pơjum gùt dar Arôn mơ đơs lah: “Ơ ồng, lơh tĕ ală yàng#32:1 Rct: hala dô nă yàng. nàng tề lam bol hi, bơh đah pơnah mơ Môise do, la cau neh tă cèng bol hi lik klàs bơh di Ejiptơ, bol hi ò git bơta lơi neh gơtơntus di khai rau.” 2Arôn ho mơ bol khai lah: “Hồ tĕ ală bơno di tồr ală bau ùr, ală kòn klau mơ ală kòn ùr bol mê dê, lồc behơ̆ cèng tus añ in.” 3Behơ̆ jơh làng bol hồ ală bơno tồr bol khai dê mơ cèng tus hơ Arôn. 4#I Bơtau 12:28; Broă 7:41.Khai neh dòp ală màh bơh di tê bol khai, ngui phan tŏ gơlơh gơs dô nơm rùp ràk gơs rùp kung be dô nơm kơnrồ kòn. Lồc behơ̆, bol khai đơs lah: “Ơ Israel do la yàng bol mê dê neh cèng bol mê lik klàs bơh di Ejiptơ.” 5Tòm tŭ Arôn gŏ behơ̆, gen khai bơtào dô nơm cơnòng duh khoai di đap rùp kơnrồ hơ̆; mơ khai yal lah: “Ngai hìng rơp gơs dô bơta pơjum sa Yàng Jehôwa in.” 6#I Kô 10:7.Behơ̆ tòm ngai tơnơ̆ làng bol guh gòñ, ơn ală phan ơn chu pơrguc mơ ơn ală phan ơn ring lơngai. Tơnơ̆ mơ hơ̆ bol khai nggui mơ ñô sa, lồc behơ̆ ñă ntào nàng kơnhơl gơlềng gơlàng.
7Gen Yàng Jehôwa đơs mơ Môise lah: “Mù tĕ, tài bơh làng bol mê dê, la làng bol mơ mê neh tă cèng lik klàs bơh di Ejiptơ neh gơlik ƀơ̆ iơh rau. 8Bol khai neh mhar sang lòi jơnau Añ neh sồr bol khai mơ neh lơh bol khai in dô nơm rùp ràk tŏ gơs rùp să kung be dô nơm kơnrồ kòn. Bol khai neh cùn khoai di đap rùp hơ̆, neh ơn phan ơn gơ in mơ neh đơs lah: ‘Ơ Israel! Do la yàng neh tă cèng bol mê lik klàs bơh di Ejiptơ.’” 9Yàng Jehôwa kung đơs mơ Môise lah: “Añ neh gŏ làng bol do la dô nơm làng bol kơldang bồ. 10Tŭ do lòi tĕ Añ in lơh is, tồ bơta gơjrañ dờng Añ jê gơhào khuh gơwèt mơ bol khai, nàng Añ tơnroh jơh bol khai. Gen Añ rơp lơh mê in gơlik gơs dô nơm làng bol dờng.”
11 #
Khà 14:13-19. Mơya Môise jòi jat bơta nđàc Jehôwa Yàng Tom Trồ khai dê mơ đơs lah: “Khoai Yàng Jehôwa, ñchi bơh tài Kơnràñ pal gơhào gơjrañ dờng gơwèt hơ làng bol Kơnràñ dê, la làng bol mơ Kơnràñ neh ngui gơnap gơnoar dờng bal mơ tê gơnoar pràn nàng tă cèng lik bơh di Ejiptơ? 12Ñchi bơh tài cau Ejiptơ rgơi đơs lah: ‘Hơ̆ la tài bơh nùs iơh mơ Kơnràñ neh cèng bol khai lik nàng tơnchơt bol khai tòm ală mơnơm, mơ nàng tơnroh jơh bol khai bơh di hơđang plai ù’? Dan Yàng pơrlac wơl bơh di bơta gơjrañ dờng Kơnràñ dê, dan nđàc sơngit mơ bañ đùh bơta rung rài hơđang làng bol Kơnràñ dê. 13#Sơnròp 22:16-17; 17:8.Dan Yàng kah wơl bơh Abraham, Isak, mơ Israel, la ală cau duh broă Kơnràñ dê, mơ Kơnràñ neh ai să tòm Kơnràñ mơ srat să ho nền mơ bol khai lah: ‘Añ rơp ai jơi bơtiàn bol mê in gơbơtơl oă kung be sơmañ hơđang trồ, mơ Añ rơp ai jơi bơtiàn bol mê in jơh lơgar mơ Añ neh ho mơ bol khai, mơ bol khai rơp geh lơgar hơ̆ lơh gơs sre brê jơl sùm sùm.’” 14Gen Yàng Jehôwa nđàc mơ ò đùh hơđang làng bol Kơnràñ dê bơta rung rài mơ Kơnràñ neh khơm rơp đùh hơđang bol khai.
15Chòp Môise wơlke mơ mù bơh di mơnơm, at tòm tê bàr nơm mpàn bơta Cơng Tàng; gơs cih hơđang bàr đah mat, đah hơđap mơ đah ngkòi. 16Ală mpàn hơ̆ la broă Yàng Tom Trồ lơh gơs; jơnau cih hơđang hơ̆ kung la jơnau cih Yàng Tom Trồ dê neh pac hơđang ală mpàn lŭ. 17Tòm tŭ Jôsue kơno ntas làng bol driau dờng, gen khai đơs mơ Môise lah: “Gơs sap driau dờng tòmlơh tòm sàl.” 18Môise ho lah: “Hơ̆ ò di la sap driau pha lin, kung ò di la sap driau kong alah; mơya hơ̆ la sap đơs chò mơ añ kơno.” 19Tòm tŭ Môise tus rềp di sàl gŏ kơnrồ kòn mơ bơta tòmya, gen bơta gơjrañ khai dê gơhào khuh mơ khai sơrbì ală mpàn bơh di tê khai, jan bơcah lề lac di jơng mơnơm. 20Khai ai kơnrồ kòn mơ bol khai neh tŏ mơ chu gơtòm ồs, lồc behơ̆ khai tơnlề gơ gơs kơmbuh, rsìh kơmbuh hơđang dà, mơ ai làng bol Israel in hùc dà hơ̆.
21Khai đơs mơ Arôn lah: “Ñchi bơta làng bol do neh lơh bi in, mơ bi neh lam bol khai tòm tồi glài kơnjơ̆ behơ̆ taih?” 22Arôn ho lah: “Dan bañ gơjrañ, ơ yàng añ jê, kơnràñ git lah làng bol do jak lơh bơta iơh! 23Bol khai neh đơs mơ añ lah: ‘Lơh tĕ gơs ală yàng nàng tề lam bol hi; bơh đah pơnah mơ Môise do, la cau neh cèng bol hi lik klàs bơh di Ejiptơ, bol hi ò git gơs bơta lơi neh gơtơntus di khai rau.’ 24Gen añ đơs mơ bol khai lah: ‘Cau lơi gơs phan bơka să mơ màh gen hồ tĕ!’ Gen bol khai ai añ in màh hơ̆, añ sơrbì gơtòm ồs, mơ bơh hơ̆ gơlik gơs kơnrồ kòn do.”
25Môise gŏ làng bol neh gơlik gơlềng gơlàng, bơh Arôn neh lòi bol khai lơh khat gơboh, tian gơs kong ală cau sò tơm dơñŏ tơnhial. 26Gen khai ntào di gùng mut tòm sàl mơ đơs lah: “Cau lơi gơrê bal mơ Yàng Jehôwa gen tus tĕ mơ añ!” Jơh ală cau Lebi pơjum bal rềp mơ khai. 27Gen khai đơs mơ bol khai lah: “Yàng Jehôwa la Yàng Tom Trồ Israel dê neh đơs be do: ‘Kòp nă kơt tĕ dô nơm đào di wĕ he. Lòt rê ma kiau tòm sàl, bơh đah do tus hơ đah ne, mơ kòp nă sreh tơnchơt tĕ oh mi, cau bơyô mơ cau ơm rềp mơ he.’” 28Cau Lebi lơh jat tòm toh be jơnau Môise sồr; mơ tòm ngai hơ̆ gơs pơgap pe rbô nă cau tòm làng bol kong chơt. 29Môise đơs lah: “Ngai do bol mê neh ơn is să he nàng duh broă Yàng Jehôwa, tòm bơta tơnchơt ală kòn klau hala oh mi he dê, gen tàng ngai do Kơnràñ neh ai lơngai oh mi in.”
30Ngai hìng, Môise đơs mơ làng bol lah: “Bol mê neh tìs dô nơm glài kơnjơ̆ ngan. Mơya tŭ do añ guh tus hơ Yàng Jehôwa, digơlan añ rgơi dan bơta tơwài glài bol mê in.” 31Behơ̆, Môise tus wơl hơ Yàng Jehôwa mơ đơs lah: “Ơ Yàng, làng bol do neh tìs dô nơm glài kơnjơ̆ ngan ò git nđò! Bol khai neh lơh gơs ală yàng mơ màh bol khai in. 32#Đơs Crih 69:28; Yalt 3:5.Mơya tŭ do, dan Yàng toh glài bol khai in! Mơ dilah ò, dan Yàng jùt tĕ añ bơh di sră Kơnràñ neh cih.” 33Yàng Jehôwa ho wơl mơ Môise lah: “Cau lơi tìs glài mơ Añ gen Añ rơp jùt khai bơh di sră Añ. 34Tŭ do, lòt tĕ, lam làng bol lòt tus di tiah Añ neh đơs, mơ cau gơnrơh Añ jê rơp lòt lài mơ mê. Bulah behơ̆, tòm tŭ tus di tŭ tơngai lơh glài gen Añ rơp lơh glài tài bơh tồi glài bol khai dê.” 35Mơ Yàng Jehôwa đùh bơta kòp jê pluh plàng nàng lơh glài làng bol tài bơh bơta bol khai neh lơh mơ rùp kơnrồ kòn mơ Arôn neh mòn gơs.
Currently Selected:
Lik Ejiptơ 32: KPM2018
Highlight
Copy
Compare
Share
Want to have your highlights saved across all your devices? Sign up or sign in
© 2018 United Bible Societies. All rights reserved.
