Titus 3
3
Karihwiʼióstontsera Karihonnienʼníhtshera
1Sehiehiaráhkwen ne sonkwetaʼsónha nahonwatiwénnarahkwe ne ratikoráhsons ó꞉ni ne rahonnonkwetaʼsónhas, nahonwatiwénnarahkwe, tánon nahonathateweiennentáʼon kwák tsi nahontahiotseráhton ne ahothiʼióten ne ioiánereh. 2Ietʼtsiróhri ne tóhsa thènen ne wahétken ahsakonénhase nónka hakénhake, nók saktakénhake ó꞉ni ahonterohserihióhake, tánon tiotkonʼónwe skénnon hakénhake tsi nihonnonʼnóten tsi natehóntereh. 3Asèhken ontionhá꞉a ó꞉ni iehiotherátsʼton tionkwatonʼnótʼthakwe, iáh theʼtewahtewennaráhkwaʼkwe, tánon thehionkwaterientawénrie. Tewahnáskwa kèn꞉ne tsi nòkwa ne onkwaskanektsheraʼókon ó꞉ni ne niatékon ahtenikonrohriátsheras ne kwáh tsík nahiotónhake. Kanhakwatserákon nón niʼionkwatiesatonhátieskwe tánon ne kahnoshátshera; ne rohnatsiakhésons ionkhísons tánon ní꞉i ietʼthísons. 4Nók nónen thóh ne raorihwahierítʼtshera ó꞉ni ne rahononronkwátshera ne Ní꞉io ó꞉ni ne Sonkwaiatákwas sonthotáshion, 5shashonkwaniákenthe. Iáh ne tehioríwahke ne thènen ne kahiotenserí꞉io ahionkwahiotén꞉en, nók ne aoríwahke, raonháke ne Ronikonrahtokénti, tsi raónha teshonkwáwis náse ahonsetewahnákerate ó꞉ni nonkwahtónnhets enshanóhare. 6Rawenni꞉io kwáh iókwas tsi tahothéniethe ne Ronikonratokénti nontionháke tsi nontáre rahonháke ne Ié꞉sos Kerístos Sonkwaiatákwas, 7nekáti nètho rahoténrat ionkwahrahratʼtieráien entionkwaianerásten tsi nòkwa ne Ní꞉io tánon entʼkáhawe naitewaiéna ne ionnheʼónwe atónnhets tsi nihtewaskáneks. 8Ne kíʼ ne kwá tóske íken natʼrhoriátshera.
Tewahkathonwentióni kwáh ákta tsi aisewahtennikonráren kíʼ nahorihoténsons, nekáti tsi nihiákon ne thonwethákwen ne Rawenni꞉io né꞉ne ahonnonthonʼniónheke nahatinakʼthóten nahotihioténseke ne kahiotenserí꞉ios, ne kíʼ ioiánere ó꞉ni onhkwetaʼkwékon enhiakoianerásten. 9Nók tsiotárho ne tehiotenonwahrorítonte ahterihotaróktsheras, nakarahwisthésonke naiesennarónnionke ne kasótʼtsheras, tekariwahtíronthe, ó꞉ni ne ionteriʼiosthákwa ne kaianerénsera. Kwáh iáh thènen tekástha iáh ó꞉ni thènen tehioríhonte. 10Ahrhàna tékeni iewáhteratst ietʼtsihiaronkáten tsi nikáien ne tehathinenrakʼkháshions, tánon ehʼthóne kwáh tóhsa thènen saietʼtsihiatsʼtérist. 11Sewahteriéntare ne thóh nihonnonkwethótens kwáh ionkwetahétken, tánon rahotiriwahneraháktsera kariwahnírats tsi tehonterientawénries.
Nonahkènkha Sahsakorihónten
12Nónen ienkheiaténiethe ne Artemas tóhka ó꞉ni ne Tychicus ne tionháke, iatesewahtátʼtiahat nahontáskwat kensera ne Nicopolis nónwe, tsioríwah tsi hiatewahkeriwahiéntase tsi thoʼnónwe hiatenkoseríhiake. 13Iatesewahtátʼtiahat natsisewasniénon ne tehariwakénas Zenas ó꞉ni ne Apollos nahontahiatásawen thahiatʼtáhakwe, tánon kwáh sewákʼkens niatakaiérike tsi nahoténshon taonathonwentiónike. 14Nontionkwetaʼshónhas ónenk tsi enhontatenakthótʼthase nahotihióten ne ioiánere, ne nahónton nahsakotiʼiénawahse ne kwáh tehiakothonwentiónis; iáh tatehiothonwentióʼon ne kwáh iáh thènen tahatísthake tsi ronnònnhe.
15Kwáh ratikwékon ne skátke iákwes iaʼihtsihiateniéten ne rahotinonwerathóntshera. Teietʼtsinonwerá꞉ton ne onkwatenrosónhas ne thonhetákwen.
Rawenni꞉io raʼoténrat sehwakwékon sewahkwekónhak.
Matthew, Mark, Luke, and John were translated by Sosé Onasakenrat and published by the Montreal auxiliary of the British and Foreign Bible Society in 1880. The text of these books is in the public domain.
The text of the following books is copyright © Kanien’kehá:ka Aotióhkwa Tehatiwennaténie’s Kahiatonhseratokénhti (Mohawk Bible Translation Team): 2 Corinthians (2001), Jonah (2002), Ruth (2005), Daniel (2005), Esther (2006), and Proverbs (2007).
All other text is copyright © Harvey Satewas Gabriel, 2023.