Titus 2
2
Norihwí꞉io Karihonniennítshera
1Nók níse ónenk tsi ne enserihónnien tsi nahóten tkiaténros ne orihwí꞉io karihonniennítshera. 2Serihónʼnien ne thoʼtèions ne tóhsa ahatinekakátsʼtahke, ahontatkweniénstahke, tánon thoʼnatateniarótaron; nahioriwíʼioke tsi thoʼnetákwen, ne rahotinonronkwatsherákon, ó꞉ni tahathiwisátsʼtheke. 3Kwá nòn꞉ne ne sáka ietʼtsirihónnien ne tiotíʼions konnónhkwe, nahkonterihwahténtiate tsi nahtehiothonwentióʼon ónhka ne iakoriwiʼióston tsi ahiakónnheke. Iáh teiówenk nónhka ahiakotisennákshate tóhkaʼ ó꞉ni tahiotirenkénnion nakontinikírake notsítsia. Ónenk tsi enhiakotirihónnien nahóten ne ioiánereh. 4Tsi naiáwenʼne tsi ahkonwatirihónnien ne kén nitiotihiónsa nahonwatinorónkwake ne iotiniákʼkons ó꞉ni ne akotiʼiohokónha, 5né꞉ne ahontakontatheniarótaroke, tánon ahiotiriwahtokénhake tsi iotiniákon nakotiʼiotensheriʼióhake nahotinonskónshon, nahonwahtiwénnarahkwe ne iotiniákʼkons, nená꞉a ne tóhsa ónhka wahétken tsi ní꞉ioht tsi ahiontáti tsi nòkwa ne ateriwanotátshera tsi nitewétha ne Rawenní꞉ioke.
6Né nòn꞉ne sáka ietʼtsiretsáron ne kén nithotihiónsa nahontahontateniarótaroke. 7Noriwahkwékon ónenk tsi í꞉se tentiesatenienthénsthe tsi nisewehʼienní꞉io Sariwatokénhak tánon tasanikonrahsahatónhak ne sarihonniennítshera. 8Ne íh꞉sas ne tkawennaiéris né꞉ne tóhsa ahónton naieriwahkátathe, ne nahónton nahonwanatéhate ne iesáshions ne tsi iáh tahatikwéni ne thénen wahétken ahionkhiʼiénhase.
9Ne ratináskwas ónenk tsi enhonwahtiwénnarakwe ne ratihiatakwení꞉ios ó꞉ni ahontahonwatinikonraiérite tsi nahorihoténsons. Iáh tehioteriwíson nahontahonwatiwennóko 10Tó꞉sa ó꞉ni ne thènen ahonwahtinénsko. Kék, teiotonwentióʼon nahonnéhneste tsi tiókonte tionkwetaiéris ó꞉ni rohtirihwahtó꞉ken, ne nahontakáhawe nahioiénawahse ne karihonniennítshera tsi nòkwa ne Rawenni꞉io Sonkwahiatákwas kwá tsi nahóten thènen nahʼhóntiere.
11Asèhken ne Rawenni꞉io rahwenéston ne rahoténrat né꞉ne aʼkoiatakehnhátshera nonkwetakwékon. 12Nètho kenténrat ionkwahrihonniénnis nahitewatiakwarísi nahóten ne iáh tehioriwi꞉iostontseraien tsi ionkwatenniseratenion ó꞉ni ne tsi ionwentsiates ahoskanektseras, tánon tsi nihionkwatenniserathenions titewahniarotarok, ionkwatonkwetakwarishiónhak, tánon aionkwahrihwiʼióstonhke tsi tiónnhek ne kén꞉en ionwentsiáte 13tsi nihionkwárahre nètho iawenniserahnerákwak ionkwarahratsʼténni, nónen ne rahohiatanerahkwátshera ne rosastenserowáhnen Ní꞉io ó꞉ni ne Sonkwaiatákwen Ié꞉sos Kerístos entathathénesthe. 14Iehotatatʼkáwen ní꞉i onhkwariwáhke, nahonsahshonkwaniákente ne kwák tsi nahiotónhake ne kariwáksenke tánon nashontiónnien kwáh orihwí꞉io rahónha khók rahonkwetaʼsónha ahitewáhton ó꞉ni kwáh tahionkwasterihénseke ioiánere tsi naitewáhtiere.
15Ietsirihónnien kí꞉ken nahorihoténsons tánon kwáh sewahsatsʼtenserakwékon ísewats tsi nenietʼtsinikonrahreke tánon ietʼtsihiatʼthéten ne ietʼtsihiatahónsate. Kwáh tóhsa ónhka ietʼtsiríhon naiesakénron.
Matthew, Mark, Luke, and John were translated by Sosé Onasakenrat and published by the Montreal auxiliary of the British and Foreign Bible Society in 1880. The text of these books is in the public domain.
The text of the following books is copyright © Kanien’kehá:ka Aotióhkwa Tehatiwennaténie’s Kahiatonhseratokénhti (Mohawk Bible Translation Team): 2 Corinthians (2001), Jonah (2002), Ruth (2005), Daniel (2005), Esther (2006), and Proverbs (2007).
All other text is copyright © Harvey Satewas Gabriel, 2023.