Romans 3
3
Asenha-ton Nateioteriwasonterakwen.
1Sénha ontèken Sitaeró꞉nons ronatesenʼní꞉ios tsi ní꞉ioht ne iáh tehatisitaeronons, ethòne? Thènen onhtèken satèkena tsi iontatewarakwétarons? 2Éso, kwáh tokènʼen, tsíkʼnahontahiotiératon! Ne tiotierentákwen, Rawenni꞉io tesakówi ne Sitaeró꞉nons nahathinónstate ne rahoteriwanhotátshera. 3Ónhkatine ní꞉ioht tòhka ótiake iáh tehotiriwatóken? Ne kén kéntons neh Rawenni꞉io iáh tahoriwatokenhake? 4Ohrihwihioʼonwe tsi iáh! Ne Rawenniʼio ónenk tsi enhoteriwakwarísion, iawerohátien tsi kwáh iaʼteionkwétake tsi iakonówens, Tsi niwáton noriwatokénti,
“Ónenk tsi enséneste tsi teshérits nónen ensatáti;
Ónenk tsi ensatkwéni ne sariwasónha nónen teiesaiatórete.”
5Nók éhthoh, tòhka-a nónen thènen teionkwaterientawénrie, nonkwesónha kwáh enwenéhake eniontʼkáto nenʼne neh Rawenni꞉io taiérits? Onhnahóten aihtewakwéni aihtewénron? Ne Rawenni꞉io tehaterientawénries nónen ensonkwaréwate? (Kíʼ kén꞉en éhʼtho ní꞉ioht tsi wáktare tsi ní꞉ioht tsi rontátis nonkwesónha.) 6Iáh neh tekéntons! Thoká-a neh Rawenni꞉io iáh tethoriwaiéri, onhní꞉ioht tsi tasakoiatórete nonkwesónha?
7Nók tòhka-a tsi iáh tewakeriwatóken roriwáwaʼse ne Rawenni꞉io rahohiataterítsera tsi iónnis ne rahoriwakwarisióntsera tsi akátake ó꞉ni sénha awenéhake? Onhniʼiohtiéren tsi sékon ní꞉i éhʼtho ní꞉ioht tsi aiontréwate tsi síken ní꞉ioht ne roriwáneren? 8Nontiéren tsi iáh taihtewénron, ethókiʼ, “Ánion wahét꞉ken tsi nitewátier tòhka nónwa neh éntewe ne iohiánere” ótiake nónkwe, kwáh thokén꞉en, ionkenikonrakaréwaton tsi ionkeriwáros tsi neh kíʼ ne kwáh neh wáken! Kwáh enhonwathiréwate, tsi natehonaténtion.
Iáh Ónhka Ne Rónkwe Tehoriwakwarísion.
9Neh káti꞉ontèken, ne tewasitaerónons sénha tionʼníʼios tsi ní꞉ioht neh iáh tehatisitaeronons? Kwáh iáh! Ónenk wakenéston neh Sitaeró꞉nons tánon ne iáh tehatisitaerónons kwáh neh sahonónhʼna ratikwékon thóh non nihathiʼiatóron nahosastenserákon ne kariwáneren. 10Tsi niwáton ne Oriwatokéntis:
“Kwa iáh ónhka tetsionkwetaiéris,
11iáh ónhka teiakonikonraiéntas,
ónhka ó꞉ni ronwasénʼnaiens ne Rawenni꞉io.
12Onhkweʼtakwékon wahonwatʼkarathéniaʼse ne Rawenni꞉io;
Kwáh ratikwékon tehonaterientawénrie;
Iáh ónhka teiakohiótens ne iohiánere,
kwáh iáh neh tionkwétha.
13Tsi rathisakáronte neh teskaieróntare ne tehiotsionwakaráwen tsi iehiáta;
ronʼnasákes rónsta tsi nihathinikonrátha,
tánon nowennasónhas ne iakoriótha, kwáh tsi ní꞉ioht nóniare eniakorióten nenʼiakokári, nàkon ne rathisáke;
14tsi rathisakaróntes kwáh titkáhere ne ionewárat tánon iotakwáswat.
15Kwáh íken tsi rathiʼiatastóre nasakothikaréwate ó꞉ni nasakothírhio;
16nek iehonénras tsi nahoténsons ne tenhatirithánion ó꞉ni kwáh íken tsi ionikonratsentserowánen ne kwáh tsík nonwéson nienhónne.
17Iáh nonwénton tehothiʼienteráhon nahontahíta tsi iohatátie neh skénnen,
18khés nahothiweientetáʼon nahonwatsianíseke ne Rawenni꞉io.”
19Kén nónwa ionkwateriéntare kwáh oriwakwékon ne kaianerénsera niehéken tsi niháti ne thóh nónwe ne kaianerénsera ronastonhátie, neh akakwéni onhkwetaʼkwékon taiakótaste ne tóhsa ahonsahatirahiátakwe tánon nawéneste tsi Rawenni꞉io seh tenhaiatórete nohontsiakwékon. 20Asèken iáh ónhka ne rónkwe neh tahotakwarísi rahohénton ne Rawenni꞉io neh naháiere tsi nikarihwanóntons ne kaianerénsera; tsi nikaiérha ne kaianerénsera nahahónnien ne rónkwe nahaiénterene tsi roriwáneren.
Tsi Níʼioht Ne Rawenni꞉io Tsi Sakotakwarísions Nonkwesónha
21Nók nónwa neh꞉ne Rawenni꞉io rahoteweiénʼna tsi ní꞉ioht tsi shesakotakwarísions nonkwesónha tsi natehóntere ne raónha kwáh iawenestáhon, tánon kwáh iáh othénʼnen tatekanerénkston ne kaianerénsera. Ne kaianerénsera tánon ne rotitokenséhakwe tonatʼkáwen ne rahothiriwanirátʼtsera. 22Ne Rawenni꞉io neh sesakotakwarisháta neh tsi tonwethákwen ne Ié꞉sos Kerístos. Rawenni꞉io thoʼnihaiérha tsi niʼiákon tonwethákwen ne Kerístos, asèken iáh noʼiáh tehioháhaien onʼnakaiéren nonkwesónhas nahonsahotiʼianerásten tsi natehónthere ne Rawenni꞉io. 23Kwáh onhkwetaʼkwékon iakoriwáneren tánon aíhnon nióre thónʼnes ne Rawenni꞉io rahononsthatserákon. 24Nók kíʼ tsi kwáh iáh othènen tehiokáraien ne Rawenni꞉io rahoténrat, kwáh okwetakwékon tsi tiakoteriwaseronniénʼni tsi natehóntere ne raónha, thoʼnihóson rahonháke ne Kerístos Ié꞉sos, tsi nikáien sesakonerénsions. 25Rawenni꞉io wahatenikonrísa neh tsi rawenheión꞉ne thoʼnahontáwe tsi niʼiawénhon nètho nonkwesónha ahonsaionthatenikónrense nakoriwaneraháktsera, neh tsi rahonháke non nithonethákwen. Rawenni꞉io thoʼnihóson thoʼnahontáwe nahariwanírate ne rahoriwakwarisióntsera. Tsi nitsawénon, rothakastáton tánon iáh tehokenhenʼiónʼon nakoriwaneraháktsera nonkwesónhas. 26Nók kíʼ nónwa kén nikaháwis ken niehaiéra nonkwesónhas akoriwaneraháktseras, nahariwanírate ne rahoriwakwarisióntseras. Tsi thoʼní꞉ioht Rawenni꞉io renéstha tsi rahónhak khók roiánere, tánon ó꞉ni kwáh onkwetakwékon sehsakoha-arátha tsi niháti entonwétakwe ne Ié꞉sos.
27Onkáti nekénʼen, naihtewakwéni taihtewataterénsaron knahótenk? Kwáh iáh othènen! Tánon nahóten kíʼ karihónʼnis? Ne ken tsi ionkwatewenʼnarákwen ne kaianerénsera? Iáh, nók neh kíʼ tionkwetákwen. 28Asèken thoʼní꞉ioht tsi iaihtewása nek khók ne tewethákwen sotakwarísions ne rónkwe rahohénton ne Rawenni꞉io, nók iáh tsi nahontónhake ne kaianerénsera. 29Káthon ken ne Rawenni꞉io nek khók ne Sitaeró꞉nons Rahotiní꞉io? Iáh kén raónha ó꞉ni tesakoní꞉io ne iáh tehatisitaeronons? Kwáh seh raónha ó꞉ni. 30Rahónhak khók ne Ni꞉io, kwáh ó꞉ni ensakotakwarísion neh Sitaeró꞉nons tsi natehóntere ne raónha neh entewanónton tsi nithonetákwen, neh nònʼne sháka ne iáh tehatisitaerónons. 31Ne ken kéntons entewatiakwarísi neh kaianerénsera tsi neh kíʼ tionkwetákwen? Iáh, iáh totèiot; kwáh, entewatiénawasʼte ne kaianerénsera.
Currently Selected:
Romans 3: MHK
Highlight
Share
Compare
Copy
Want to have your highlights saved across all your devices? Sign up or sign in
Matthew, Mark, Luke, and John were translated by Sosé Onasakenrat and published by the Montreal auxiliary of the British and Foreign Bible Society in 1880. The text of these books is in the public domain.
The text of the following books is copyright © Kanien’kehá:ka Aotióhkwa Tehatiwennaténie’s Kahiatonhseratokénhti (Mohawk Bible Translation Team): 2 Corinthians (2001), Jonah (2002), Ruth (2005), Daniel (2005), Esther (2006), and Proverbs (2007).
All other text is copyright © Harvey Satewas Gabriel, 2023.
